Read Thado Chin NEHEMIAH 2 Bible Online

NEHEMIAH 2 - Thado Chin bible

NEHEMIAH 2

¹Chuin ahitin ahi, Artaxerxes lengchan kal kum somni lhin kum, Nisan [2] lha sungin a-anga lengpitwi aumin, keiman lengpitwi chu kalan lengpa chu kapetai. Tuma sangin amasanga lungkham mel kamusah khapon ahi.

²Hijeh chun lengpan kajah-a, anala nahipon, namaiso anguinave itidan ham? imachadang hiponte, lungdonna nanei ahi, ati, chuphatnin kakicha behset jengtai.

³Chuin keiman lengpa jah-a, lengpa hingsotnin, ipidia kamaiso nguida dingham? kapu kapate khopi, lhankhuh ho umna chu mang thah-in aum gamtai, kotpiho jouse meijin akagam tan, ahomkeo ahitai, kati.

⁴Chuin lengpan kajah-a ipi nathum nomham? eitin, hiti chun keima van Pathen henga kataotai.

⁵Chuin lengpa henga Lengpa lunglhai nading ahia, nasohpa nangma mitmu-a hi lungset theidol kahile, Judah gama kapu kapate lhankhuh ho umna khopi-a chun neisolin lang gasaphange, kati.

⁶Chuin lengpan kajah-a (lengnu jong akoma atoupet ahi) itih changei nagatham ding ham? itih phatleh nahung kilekit ding ham? atin, hiti chun lengpan soldingin pha eisan, chuin keiman aphat kateptai.

⁷Achung chonin lengpa henga chun, Lengpa lunglhaina ahileh Judah gam kalhun kahse-a eichesah uva, eihen-oh louna diuvin vadunglen lama gamvaipoho mudin lekhathot neisutpeh inlang,

⁸Chule Lengpa gam ngahpa Asaph dingin jong, inpitoh kimat kotpi-a pangding, khopi kul-a ding, chule kagachenna inding thing, eipehtheina dingin lekha neisut peh-in katin ahi. Chule ka Pathen khut thahat kachunga aumdung juijin, imajouse chu lengpan eiphatsah pehtai.

⁹Chuin keijong vadung len gal lama gamvaipo ho henga kahungin, lengpa lekhathot ho chu kapen ahi. Chuin lengpan sepai lamkaiholeh, sakol chungtou galsatho chu eikilhonpi din ahin solin ahi.

¹⁰Chuin Horon mi Sanballat le sottola pang Ammon mi Tobiah sohpan anajahtah uchun, Israel chate khantouna ding ngaito din mi ahunguve tin, analung himolheh-un ahi.

¹¹Hitichun Jerusalem'a kahungin nithum kanichong tai.

¹²Chuin jan-in kathouvin, keimatoh kaumpi mi phabep kahiuvin, Jerusalem dinga katohgot ka Pathen'in kalungthima eikoipeh chu, koima kahilpon, katouna gancha tilou chu kahenga gamchadang aumpoi.

¹³Chule jan laijin kapotdoh-in, phaicham lama kotpi lampi chu kajuijin, dragon twikul mai lampileh ehbohna kotpi phung geijin kachepeh-in, Jerusalem kulbang chimsa leh akotpi meijin akahvamsaho chu kavetohsoh keije.

¹⁴Chujouvin twinah kotpi phung gei, lengpa twikul geijin kachen, ahin che-apat hin katouna gancha chu achepai theina ding mun aumtapoi.

¹⁵Chuin jan-in vachadung kajottouvin, kulbang chu kavelen, chuin kakinungle kitnin, phaicham kotpi-a chun kalutnin hitichun kakinungle kit tai.

¹⁶Vaihomte chun hoija kache, ipikabol jong eihedoh pouvin, chule Judah te thempuho, milen milalhole vaihomho chule hiche natonga pangdingho henga jong kasei pon ahi.

¹⁷Chuin keiman amaho jah-a, igen theinao nasatje hi namuvin, Jerusalem agohkeova aumle, akotpi phungho jouse meijin akasetai tijong namuve: hungtemun, mi i-sah louva i-um louna dingun, Jerusalem kulpi chu saphakitnu hite, kati.

¹⁸Chuin keiman amaho chu kadinga phatah ka Pathen khutleh lengpan kajah-a anasei thu jouse chu kaseipehtai. Chuin amahon kipatdoh-u hitin, saote, atiuve. Hitichun napha tongding chun abanthau ahatsah taove.

¹⁹Ahinla Horon mi Sanballat le Ammon mi sottollea pang Tobiah leh Aram mi Geshem, amahohin ajahdoh phatnu chun, eidai chavaijun, nahsahmotah-in eibolun, nathil boluhi ipi hitam? lengpa douna-a kiphin ding nahiuvem? atiuve.

²⁰Chuin amaho chu keiman kadonbut nin, van Pathen'in eilolhinsah untin, hijeh chun keiho ama lhacha hohi kipat ungting kasahdoh dingu ahi. Nangho vangin Jerusalem'a chanle thuneina chule hetjingna naneipouve, katin ahi.