Read Thado Chin NEHEMIAH 4 Bible Online

NEHEMIAH 4 - Thado Chin bible

NEHEMIAH 4

¹Ahinla ahung hitin ahi, Sanballat'in kulbang kasemphatnu ajahtah-in, alung ahanglheh jengin Judah te chu ataitomin, i-sah loutah-in aboltan ahi.

²Chule asopiholeh Samaria sepaiho masanga chun hitin thu aseijin, hiche milhachom Judah hohin ipiham abolu? amahole amaho kisadoh joudingu hinam? ganlhaina abolmong dingu hinam, nikhat na asahdoh mong dingu hinam? meijin akahsetsa, bohnen lah-a kilhukhom songho chu akaldoh uva asemphat joumong dingu hinam? ati.

³Hichun akoma um Ammon mi Tobiah chun, ahinai cheho insah hi iti sahjongleu achunga sial khattou gakaldohleh, asongbang hohi chimlha talou ding ham? ati.

⁴Vo, ka Pathen'u ngaijin, i-sah louvin kaumun, eihou setnao jousehi amaho chunga lhunsah inlang, amaho jong hoilai gam hama sohchang dingin michomgamte khutna pedoh-in.

⁵Chule akhangit lounao immangpeh hih in, chule achonsetnao chu nangma-a konin thaimangin umdahen, ajehchu kulbang semho masanga nangma naphinseuvin ahi.

⁶Hitichun kulbang chu kasauvin, chule kulbangho chu akimlai gei kajopmatsoh taove. Ajehchu mipi honjong natoh thanopna lung apucheh un ahi.

⁷Ahinla ahung hiti, Sanballat, Tobiah le Arabia mite, Ammon mite, chule Ashdod miten, Jerusalem kulbang sahphat ahia, chule akehlai jouse akisemphatai ti ajahtah-un, alunghang lheh taovin,

⁸Chuin abonchauvin akihougu sohkeijun, chule Jerusalem chu kisatpi-a suhtang agotauve.

⁹Hijeng jongle ka Pathen'u henga kataovun, asun ajanin amaho ngah-a velhiding kakoijingun ahi.

¹⁰Chuin Judah chun, thilpoho athachol gamtaovin, ahin bohnenla tampi aumnalaijin, hijeh-a chu kulbanghi i-sah joulou dingu hitante ati.

¹¹Imelma teovinla, amaho lah-a igalut uva, igathaova, anatoh-u igasuh tangpeh tokah seuva ahet loudingu ahi, mujong eimu pouvinte tin aseijui.

¹²Chule ahitin ahi, akenguva cheng Judah te chu ahungun, kajah uvah amaho muntina kona hunguva eihung delkhum dingu ahi, tin somveijen ahungseijui.

¹³Hijeh chun kenjong kulbang polam pang anem nalai le asanglai munho chun mipi ho chu, a-in kokon achemjamu, atengchao chule thalpi hotoh thon panmun kasemsah-e.

¹⁴Chule kathoudoh-in kagavelen, milen milal, vaihomhole mipi ho jah-a, amaho khu kichahih beh-un, Pakai loupi kidang le thahat tah neipa chu sumil louvin, nasopi hou, nachapateo, najiteule na-inko huhnadin satnun kati.

¹⁵Chule ahitin ahi, kamelma teovin athil gonnu kahetdoh uva, chule Pathen'in athilgonu asuh chatvai pehtah-in, keiho jong ama ama natoh cheh tong dingin kakinungle kit taove.

¹⁶Chule ahitin ahi, hiche nikho-a pat hin, keima lhachate mi akeh khatnin na atongun, chule akehkhat hochu tengcha, lumle thalpi chule ompho aki-ah un, chule vaihomte chu Judah te insung mite nunglama apanguve.

¹⁷Kulbang seho, chule pohgih pohon apohgih-u pumin akhut langkhat nun na atongun langkhatna manchah akichoicheh un ahi.

¹⁸Hitichun insaho chun achemjamu apanguva akikocheh-un, insah chuto akopmun, chule sumkon mutna pangpa chu keima koma aume.

¹⁹Chule keiman milen milal holeh vaihomho chule mipi henga chun, inatoh-u hi anasan alenlheh-in, kulbang isahnaova hin ikigamlat thei lheh-un,

²⁰Hijeh chun sumkon gin najah nalamcheh uvah keiholam hindelluvin, i-Pathen'un eiho dia gal eisatpeh diu ahi, kati.

²¹Hitobang tah hin na ka tongun, mi akeh khatnin jingkah khovah lhah-a pat nilhah jan ahsi sophat geijin tengcha akidopmun ahi.

²²Hiche bangma hin chepettah hin mipi jah-a chun, jana eingah dingule suna natonga pang ding koihileh alhacha hotoh Jerusalem'a gehsoh keijuhen tin kaseije.

²³Hitichun keima jong, kasopite hojong, kasottol houjong, kanungjuija eingah uva pangho kisilpet tailouvin koimachan kavonnu sop dingin jong kasutlha pouvin ahi.