Read Thado Chin NEHEMIAH 5 Bible Online

NEHEMIAH 5 - Thado Chin bible

NEHEMIAH 5

¹Chule mipi holeh ajiteu chu asopihou Judah te douna-in nasatah-in akapmun ahi.

²Ajeh chu amaho abang khatnin, keiho kachapa teoleh kachanu teotoh tampi kahiuvin hijeh chun kaneh uva kahintheina dingun anneh kilah unge atiuvin ahi.

³Abang khatnin kel jeh-in keihon kalou mun jouseu, kalengpilei jouseu le ka-inu neh chohna din katungjou taove, atiuve.

⁴Abangkhat kitnin, keihon kalou munnu kalengpileiju lengpa kai pehdin sum pa lahnan katungdoh soh taove atiuvin, ahi.

⁵Tuchanin katahsao hi kasopihou tahsavou bang ahin, kachateu jong amaho chate tobang ahiuve. Chule ven, kachapateu hi sohchanga um gamdingu ahitai. Kachanuteu phabep jong sohchanga um ahitaovin, huhdohna je kaheta pouve, ajehchu kagam houleh lengpilei ho midang achang taove, atiuvin ahi.

⁶Chuin hicheng thuho kajah-a, akao-aw kajahtah-in, keima kalung ahangbehseh jengtan,

⁷Hichun keiman kalung kanageltoh masan, milen milal tele vaihoma pangho chu kahousen, nangho amitakipmin nasopi hou batman apung nakilahcheh uve, kati, chule amaho thu gelkhom dingin mi tamtah kakoukhomin ahi.

⁸Chuin keiman ajah uva Pathen hephalou lah-a kijohdohsa isopihou chu ijochanun ilhatdoh-un, nanghon nasopi hou Judah te chu joh nagotjingu ham? eihole eiho lah-a jong ikijoh dingu ham? katin, chutah-in adailhahel taovin, donbut nading ahetapouve.

⁹Kasei kitnin, nathilbolu hi aphahih beh-e, imelmateu Pathen helouhon eihouset jeh uva Pathen kicha jinga naum dingu hilouham? kati.

¹⁰Hitobang chun keimale kasopite chule kalhachaho jong sum chule changle mim kana palahsah jiuve, Kangeh nahiuve, apung uma palah sahhi haitaohite.

¹¹Kangeh nahiuve, tuni tah hin, alouhou alengpilei hou, a olive honhou, a-inhou, chujongle hop jakhat chunga hopkhat nalahjiu sum hihen, chang hihen, lengpitwi hihen chule thao hijongle lepehsoh kitnun, katin ahi.

¹²Chuin amahon, keihon lepehkit nunge, chule amaho-a konin imacha ngehpou vinge, hitichun nasei bangtah-in boluvinge, atiuve. Chujouvin, keiman thempuho kakouvin, thutep bangtah-a abolsohkei nadiuvin kaki hahsel sahtai.

¹³Chujongle kaponchol chen chu kathingin, hitin kati, hiche thutep banga molsolou jouse chu Pathen'in ama insung le anatoh na-a konin hitobang hin thinglha hen, chule agoh keuseh-in umuhen, chuin mipi kikhomho jouse chun, atisoh keijun, Pakai avahchoi taove. Chule mipi ho chun hiche kitepna banghin aboltauve.

¹⁴Hiche kalval hin amaho chungle Judah ho chunga gam vaipodia eikipansah-a pat leng Artaxerxes kum somni alengchan kum-a pat kum somthumle kumni alengchan gei; hichu kum somle kumni sunga hin, keile kasopi hon gamvaipo anneh chu kanepouve.

¹⁵Ahin, keima masanga gamvaipoa anapangho chun mipi hodinga pohgih tampi anapeuvin, dangka shekel somli simtha louvin changlhah le lengpitwi analahpeh jiuvin, ahi. Alhachaho jengin jong mipi chunga vai ahomun, ahinla kenvang, ka Pathen kakichat jeh-in hitobanghin kabolpoi.

¹⁶Ahi, hiche kulbang bolna-a hi kapan jing ahin, gam himhim kachopouve, kalhachate jouse jong natongin aumkhom jingun ahi.

¹⁷Hiche chungchonin, ikimvel uva namtina konle Pathen helouhole ahung kikhom khomho simlouvin, Judah teleh vaihomlete lah-a keima dokhanga an ananejing mi jakhat le somnga aumjinguve.

¹⁸Nikhat sunga kei nehdinga kigong chu bongchal khatleh deilhencheh kelngoi gup, chule ahcha hojong keidingin asemun, nisom alhinsehle lengpitwi akimin akhol khomun, hichan geihin eikigonpeh jongle mipi ho asohchannao anasatjeh-in, keiman gam vaipo kahina-a, kipe changlhah chu kanejipoi.

¹⁹Ka Pathen hiche mite dinga kathilbol jouse dungjui hin, nangin keima phatnading neigelpeh jingin.