Read Thado Chin NEHEMIAH 6 Bible Online

NEHEMIAH 6 - Thado Chin bible

NEHEMIAH 6

¹Tun ahung hitin ahi, Sanballat le Tobiah le Arab mi Geshem chule kamelmaho adangsen bang kisahdoh le aphalou akidalha abeitai ti ajah phatnun, (kotpi kotho kabuto loulai vangin,)

²Sanballat le Geshem'in, hungin lang Ono phaicham khoho khatna kimutou hite, tin thu ahinthot lhonin ahi. Ahinla amahon kachunga engkhanna thilphalou abol gotnu ahi.

³Chuin keiman ahenguva thupole ho kasolin, na loupitah katoh jeh-in kahungsuh theipoi. Kahungsuh-a kadalhah kah-a, natoh ibola tangding ham? katin ahi.

⁴Ahinla hitobang hin mi liveijen ahinsolun, keiman kadonbut ngaiman kadonbut jin ahi.

⁵Chuphatnin chutobangma chun angavei channa-in, Sanballat'in kahenga lekhathot kihongsa khat asohpa ahinchoi sah-in,

⁶Asunga chun hiti hin akisune: Pathen heloulaiho henga akiseijin, Geshem injong aseijin ahi, hichu nangle Judah ten kiphin nagotnu ahi. Hiche dinga chu kulpi bang hi nasem phatnu ahi, akisei dungjuija nangma amaho leng nahi theina dinga ahi.

⁷Chule Judah gama lengkhat aume tia nathu phong jalle ding themgao tamtah Jerusalem'a napansah tai. Chule tun hiche thuho dungjui jahi lengpa henga thu alhut dingu ahitai. Hijeh chun, tun hungin lang kihou khomu hite, ati.

⁸Chuphatnin keiman thu kathotnin, nasei banga thil kibol khatcha aumpoi, nangma lungchama nasemthu ahibouve, kati.

⁹Ajehchu amaho jousen eikichatjeh uva, kanatoh-u pilhin louna dinga kakhutnu hatmosah ding eitiu ahi. Hijeh chun tun vo, Pathen kakhutnu hatsah in.

¹⁰Hiche jouhin Mehetabeel cha Delaiah chapa Shemaiah henga kachen, ama a-in'a kot kikha khum ahin, chule aman aseije, Pathen'in a-houin sungeija kimuto hitin, houin kotkhah ho ikhadiu ahi, ajehchu nangma thatdinga hungding ahiuve; henge, janteng nangma thatdinga hungdiu ahi.

¹¹Chuin keiman hitin kati, kei tobang mikhat chu jam intem? keitobanga ahinna huhdoh go-a houin sunga lutding koi umam? lut louhel ding kahi.

¹²Chule ven, ama Pathen sol ahipoi ti kahethemtai. Hiche gaothuhi keima douna-a asei ahi, ajehchu Tobiah le Sanballat'in athalah lhon ahi.

¹³Hijeh-a chu keima katijatna, ati bangu kabola, chule thil engkhanna nei ahi tia eisuhminset nuva, eihouset theina dinguva, athalah-u ahibouve.

¹⁴Ka Pathen, Tobiah le Sanballat hi, anatoh dungjui cheh leh Naodiah themgaonu, chule themgao dang dangho kichatsah eigohohi hetpeh jingin.

¹⁵Nisomnga le nini lutnin Elul lha nisomni le ninga lhinin kulbang chu jo ahitai.

¹⁶Chuin ahitin ahi, Pathen helouho leh kamelma teovin, nakitong jouse amutah un, amaho alungthoi lheh-un, hiche nakitonghi Pathen natoh ngei ahi ti ahetauve.

¹⁷Chukalvalin hiche laichun Judah milen milal hon Tobiah chu lekha tamtah athotnuvin, chujongle Tobiah lekhathot jong amujiuve.

¹⁸Ajehchu Judah mitamtah ama koma kihahselji ahiuvin, ajehchu amachu Arah chapa Sehchaniah tupa ahin, achapa Johanan chun Berechiah chapa Meshullam chanu ji-a anei ahi.

¹⁹Keima jahdin anatohphat aseijiuvin chule kathuseiho jong ama koma alhutjiuve. Chule Tobiah hin kei kichatsah nadinga lekha ahinthotji ahi.