Read Thado Chin NEHEMIAH 8 Bible Online

NEHEMIAH 8 - Thado Chin bible

NEHEMIAH 8

¹Chuin mipi jouse chu mihem khat bang jengin twikul kotpi masang lamlena chun akikhom khommun, chule amahon Pakaiyin Israelte dan thupeh Mosi dan lekhabu chu hinpodoh dingin, lekhasunpa Ezra henga aseitaove.

²Chuin thempu Ezra chun, anumei apasal houkhom ho henga leh ahekhen themthei ho jah ding chun, amasanguva lhasagi na, ani masa nin danthupeh chu ahinpodoh tai.

³Chuin aman twi kotpi phunga um khopi lamlen masanga chun numei pasal leh ahethei dingdol jouse masanga chun jingkah-a pat nin sunkim geijin asimdoh peh in: chule dan thupeh chu mijousen anakhang uva lunglut tah-in angaisoh keijun, ahi.

⁴Chuin danthusun Ezra chu thuseina dinga lhongpeh kidosang chunga chun adingin, akoma chun Mattithiah, Shema, Anaiah, Uriah, Hilkiah le Maaseiah adinguvin; chule ajet le veija chun Pedaiah, Mishael, Malchijah, Hashum, Hashbaddanah, Zekeriah, le Meshullam adinguvin ahi.

⁵Chuin Ezra'in mipi jouse mitmun lekhabu chu aphongin; (ajeh chu mipi jouse chungvuma dinga ahin) chuin aphohdoh phatnin mipi jouse chu adingun:

⁶Chuin Ezra'in Pakai Pathen len chu athangvah-in ahi. Chuin mipi jousen adonbut un; “Amen, Amen” tin akhut hou adomsangun: chule alu akunsah-un, amaiju tolla asulut nun Pakai chu ahou taovin, ahi.

⁷Chule Jeshua, Bani, Sherebiah, Jamin, Akkub, Shabbethai, Hodiah, Maaseiah, Kelita, Azariah, Jozabad, Hanan, Pelaiah, le Levi hojong chun mipi hochu danthu peh ahetchet sah-un: chule mipi hochu adinnau munna chun ading jingun ahi.

⁸Hitichun amahon Pathen dan thupeh lekhabu chu kichentah-in asimun, chule athuchu ahilchet peh in, asimdoh hochu ahetkhenthem sah-un ahi.

⁹Chuin Tirshatha Nehemiah le dan thusun thempu Ezra, chule mipi hille-a pang Levi hochun, mipi jouse henga chun; tuni nikho hi Pakai na Pathen dinguva nikho theng ahin, lunghem hih-un, kapjong kap hih-un, atiuvin ahi, Ajeh chu amahon danthupeh thu cheng hochu ajah phatnuva mipi jouse chu kapma ahiuve.

¹⁰Chuin aman ahenguva, cheovin lang, athao thao neuvin lang, alhum lhum donun: imacha kigon louho dingin chan thotpeh-un: ajeh chu tunihi i-Pakai dinguva nikho theng ahin, lung jong lungdong hih-un; ajeh chu Pakai kipana chu na thahat nau ahi.

¹¹Hitichun Levi hochun mipi hochu athipsah-un, tunihi nikho theng ahin, chule lungjong lungkham hih un, atiuve.

¹²Chuin ahenguva kiphongdoh thuho chu ahetcheh tah jeh-un, aneh dingle adonding chule chanho thotdoh dingle kipah tah-a umdingin akikhen dohtaove.

¹³Chuin ani ni lhinnin, Mipi jouse lah-a apateu insung luchang holeh Levi holeh thempu hochu, dan thusun Ezra henga; dan thupeh ho hetchet theina dingin akikhomun, ahi.

¹⁴ Chule Pakaiyin Mosi anapeh, Israel chate chu lhasagi channa kut sunga lhambuh sunga chengdio ahi: tia dan thupeh lekhabua kisun chu amahon amuvin ahi.

¹⁵Chule hitia chu amahon akhopi jouseule Jerusalem khopi sunga alhangsap leuva, lhangvum lama potdoh unlang Olive thingbah ho, chah thing bah ho, lenmui bah ho, tumkao ho, chule lhambuh ho-a sem dinga akijih banga, aphonjal lediu ahi.

¹⁶Hitichun mipi hochu acheuvin, hitiho chu ahinpouvin; ama ama in chung dingle ahonsung dinghou, chule Pathen in hongsung ho-a, twi kotpi khopi lamlen; chule Ephraim kotpi khopi lamlen sunga lhambuh in akisemun, ahi.

¹⁷Chule gal hinga kikai hungkile kit mipi ho jouse chun, lhambuh ho akisonun, lhambuh ho noija chun atouvun Nun chapa Joshua nikholaija pat hiche nikho geija hi Israel chaten hitia hi anabolkhah loulaiju ahi. Hitichun kipa na lentah anaumin, ahi.

¹⁸Chujongle ani anin ni masa ni-a pat achaini geijin, Pathen danthupeh lekhabu chu asimin ahi. Chule amahon nisagi kut abollun, chule aumdan dungjui jin, aniget nichu thupeh dungjuija kikhoppi theng nikho ahi.