Read Thado Chin NEHEMIAH 9 Bible Online

NEHEMIAH 9 - Thado Chin bible

NEHEMIAH 9

¹Tun hiche lha nisomni le nili nin, Israel chaten khaopon akisilun, achunguva leivui akinuvin an ngollin kikhopna aneijun ahi.

²Chuin Israel chilhah phung chu gamdangmi ho lah-a konin, akisepdoh un adingun, chule achonset nau leh apu apateu khangitlouna jouseu aphongun, ahi.

³Chule amaho aumnacheh uva ading doh-un, chuche nikho hopli-a hopkhat sung chun Pakai a-Pathen'u danthupeh lekhabu chu asimun; chule hopli-a hopkhat danga chun a-Pathen'u ahouvun ahi.

⁴Chuin Levi ho thuseina dinga kisepsang chunga chun Jeshua, Bani, Kadmiel, Shebaniah, Bunni, Sherebia, Bani le Chenani hohi adingun, awsangtah in Pakai a-Pathen'u asamun ahi.

⁵Chuin Levi ho, Jeshua, Kadmiel, Bani, Hashabnah, Sherebiah, Hodijah, Shebaniah le Pethahiah chun dingun lang na Pathen chu atonsotnin choi-anun, chule pachatna leh vahchoina tincheng chunga namin loupichamkim chu nunnom hen, atiuve.

⁶Nangma bou Pakai nahi, nangman van nasemin, vanle vanho ngeisunga umjouse, leisetle asunga aumjouse twipiho chule asunga umjouse, chu Nangin nachingtup'in, chule van janelin nahouvun, ahi.

⁷ Nangin Abram chu Chaldea gam Ur kho-a kona nahinpuidoh-a, amindinga Abraham hinsah-a Pakai Pathen chu nangma nahin,

⁸ Chule namasanga ama milungkitah ahina namudoh a, chule Kanaan mite, Hit mite, Ammor mite, Perizz mite, Jebus mite chule Girgas mite gam pehdinga amatoh thulhuna nanasem achilhahte kapeh ding ahi, natin chule nangin nathuho chu nasubu lhit jie, ajehchu nangma chondihtah nahi.

⁹ Egypt gama kapateu thohgimna namujingin, chule twipi sana akanao najahpeh-e.

¹⁰ Chule Pharaoh le asohte jouse le agamsung mihem jouse chunga melchihna le thil kidangho namusah-in ahi. Ajehchu amahon amaho dounan kiletsahtah -in thil anaboluve, ti nahedoh-in ahi. Hitichun tuni banghin min khat nana neije.

¹¹ Amaho twikhanglen lailunga tolgoa achetheina dingun, nangin amasanguva twikhanglen chu nasukhenin, song twihat lah-a kiseplut bangin, abolgenthei hochu twithuh lah-a naseplutnin ahi.

¹² Chukal valin amaho achenau lampia vah pehdin, sunle meilhang khompin chule janleh meikong khompin amaho chu nanapuijin ahi.

¹³ Chule Sinai lhang chunga konin jong nahung kumlhan, van'a konin amaho nakihoupin, amaho thutanlhah dihna dan dihtahho, tepnadan phaho le thupeh ho napen,

¹⁴Chule nacholdo nitheng chu amaho nahetsah-in, chule nasoh Mosi khutna konin danho, tepna danho, danho, amaho thu napen ahi.

¹⁵ Chule agilkel tengule van'a konin changlhah napen, chule adangchah tengule songpi-a konin twi naputdoh sah-in, amaho pehdinga nana thutepna gama acheuva, agalo nadingun amaho nathutep-in ahi.

¹⁶ Ahinla amaho leh kapateu chun kiletsah tah-in anabollun, alouchalun, nathupeh hochu angainom pouve.

¹⁷ Chule thu amangnom pouvin, alah uva nathil kidang bolhojong anahsah pouvin, ahinla alouchalun akiphinun, asoh hinao mun'a kilekitdin gal lamkai ding akilhenun, ahivangin nangin ngaidam dinga kigosa jingpa Pathen milungset themle hepina-a dim, lunghang vahlou khotona-a dim nahin, amaho namoh dalhah ngaipon ahi.

¹⁸ Ahi, amahon akilhajol bongnou lim anasemuvin, hichehi ahi, na Pathen'u, Egypt gama kona nahinpuidoh uva chu, atiuvin, chule lunghana nasatah-in naphin seuve;

¹⁹ Hijongle hepina dimset chun gamthipmah amaho nadalha pon, lampia sunle amaho puidingin meilhang khompin chule amaho salvah dingle achenao lampi hildingin janleh meikong khompin, nadalha jipon ahi.

²⁰Amaho hil dingin nalhagao pha chu napen, na manna chu akam sunguva lutding na-itpon, chule adang chah naova amaho twi napen ahi.

²¹Ahi, gamthipma chun kum somli sung nanavah-in, hitichun imacha alhasam pouvin, asil le achenu achulpon, akeng houjong apompon, ahi.

²² Chukal valin lenggam holeh nampi hochu napen, gam ningkoi tina amaho nahom khennin, hitichun amahon Sihon gam Heshbon lenggam leh, Bashan lengpa Og gamchu alotauve.

²³ Achateu jongchu van'a ahsi jatnin napunsah-in, chule amahon alodinguva apateu henga nana tepsa gamsunga chun napuilut tan ahi.

²⁴ Hitichun achateu chu alutnun gamchu alotaovin, chule nangman gamsunga chun Kanaan miho chu amaho masanga nasunemin, anop aninguva aboldiuvin alenghouleh chugama miho chu akhutnuvah napedoh tai.

²⁵ Chule amahon khopi det holeh leiset phaho chu alauvin, chule thilkeu dimset inhole, twikul kilaiho, lengpilei ho, Olive honho, theiphung tamtah jong alotaovin, ahi. Hitichun aneuvin, avasetnun, ahung thaovun, chule naphatna lentah achun akipah un, ahi.

²⁶ Hijengjongle sei angaipouvin, nangma dounan akiphinun, chule nadan thupeh thuchu anung angatnun, nangma lama ahung kiheikit nadinguva, amaho douna-a nathu hettohsahna themgao hou chu athatnun, chule amahon nasatah-in aphinseuvin, ahi.

²⁷Hijehhin amaho sugenthei amelmateu khutna chun napedoh in, alungdon laijuva nangma nakou phatnu chun, van'a konin nanangai peh-in, chule namihepi nadimset chun amelmateuva konin ahuhdoh dingu nanapei.

²⁸Ahin amaho akicholdo jouvun, amahon namasanga engkhan abolkit taovin, hijeh chun amelmateu khutna dingin nadalha jitan; hitichun amelma teovin, achunguva vai ahomin, ahinla ahung kihei juva nangma nasap tenguleh, van'a konin nahin ngaijin, chule nami hepina dungjuijin amahochu vel tamtah na huhdohjin ahi.

²⁹ Chule nadan thupeh thua amaho nahinpui kit theina dingin, amaho dounan nahet tohsahjin ahi. Hijongle amaho kiletsah tah-in aumun, nathu peh ho angaipouvin, nathu tanlhah ho dounan achonseuvin, (min abola ahile, ama hina-a chu hingding ahi) chule alengkouvu ahih leuvin, angong avaiputnun chule angainom pouve.

³⁰ Ahinla kum tamtah amaho nanathoh ham hamin, chule na themgaoho mangchan nalhagaovin amaho dounan nana hettohsah jin ahi. Hijongle anakhangu asung pouvin, hijeh chun nangman gamsunga cheng miho khutna napedoh-in ahi.

³¹Hijeng jongle nahepina lentah jalchun, amaho nasumang hel jipoi, notjong nanot thap pon, ajehchu nangma khotonale hepina-a dim Pathen nahi.

³² Hijeh chun tun, ka Pathen, akitepna le akhotona chingjing, loupitahle thilbol thei chule tijat umtah Pathen, Assyria lengho phat laija pat tuni nikho geija, keihole kaleng teho, kapipui hou, kathempu hou, kathemgao hou, kapatehou chule nampite jouse chunga hahsatna hung lhung jousehi thilneo maimai jin anasandan.

³³Ipi hitajongle kachunguva thil nalhunsah jousehin nadih-e, ajehchu nangman adih nabolin, keihovang giloutah-in kachon jiuve.

³⁴Nangma amaho douna-a nana photchen sahna dan thupeh, nathupeh ho leh nathu photchen sahna ho chu, kalenghou, kapipui hou, kathem puhou, kapu kapa tehouvin anitpouvin, ngaijong angainom pouve.

³⁵Ajehchu naphatna lentah chule amasanguva gam lentahle phatah amaho napehjing vangin, amahon aleng gamuva nangma naja nompouvin, a-engkhan bolnaova konin jong ahung kilehei pouvin ahi.

³⁶Vetan, tun misoh kahitao vin, gamle asunga theiga le thilpha, kapu kapateu nehdinga nanapeh chu ven, chemunna chun keiho soh in kapangun ahi.

³⁷Kachonset jeh uva kachung uva leng dinga neisem peh houvinla gamga soh ho anetam valun, kati chungule kagancha teo chunga jong nopsahnan vai ahomun, chule keiho kahesoh behset taove.

³⁸Chule hitiho jouse jeh hin thulhun dettah kasemun, chule kasunun, kapipui hou, Levi ho, chule kathempu hou vin hichu namdet anam khumun ahi.