Read Thado Chin Esther 1 Bible Online

Esther 1 - Thado Chin bible

Esther 1

¹ Tun Ahasuerus nikho laijin ahung hitin ahi, (hiche Ahasuerus hi India'a kona Ethiopia changei gamkai jakhatle somni le sagi chunga analeng changin ahi)

²Chuche laichun, Shushan'a um leng inpia Ahasuerus lengpa alenggam laltouna-a atoujin,

³Alengchan kal kumthum channa-in, aman pipuiho le asohho jouse dingin golvah abolin; Persia le Media thaneina, gamkai pipuiho, chule milenho chu amasanga aumuvin;

⁴Chule aman alenggam loupitah haona, chule alal loupina nasatah jabola aumna chu nikho tamtah, nijakhat le nisomget sungin avetsah-in ahi.

⁵Chuin hiche nikhoho chu akichai phatnin, lengpan leng inpi honsunga chun alen aneo khenlouvin, Shushan leng inpia mi jouse chu nisagi golnop abolpin;

⁶Hia chun akang, a-engle aduma kisem pondal ho chu, tupat patngat le dangka sumkola akikhaijin, chule songval khompi ho-a chun akihenin; chule sanale dangka-a kisem tounaho chu songlhongnal sanpeh, adum, akang, avoma kisemho chunga chun akidon ahi.

⁷Chuin amahon amaho chu sana khonin leng ju chu adon diuvin ahomun, (akhonho chu achomcheh ahi,) chule lenggam kipohna dungjuijin, ju aneng jengjung jengin ahi.

⁸Chule hichea adonu chu dan dungjuija kibol ahin; koima acham louva kibol aumpoi: ajehchu lengpan amijouse chu amacheh dei dungjuija abolpeh dinguva a-in'a vaipoho chu athupeh cheh ahi.

⁹Chule lengnu Vashti jong chun lengpa Ahasuerus leng inpia chun, numei umjouse chu golnop abolpin ahi.

¹⁰Nisagi lhin ni-a, lengpan ju adona alung akipa petnin, aman Mehuman, Biztha, Harbona, Bigtha, chule Abagtha Zethar, chule Carcas, Ahasuerus anga kinbol nukiso sagiho chu asolin,

¹¹Lengnu Vashti chu melhoitah ahijeh-in, mipile milenho vetsah dinga, aleng lukhuh puma lengpa anga ahinpui dingun thu apen ahi.

¹²Ahivangin Vashti lengnu chu anukisoho-a kona leng thupeh-a hungding chu anompon; hijeh chun lengpa alung ahangtan, alungsa tuntun jengin ahi.

¹³Chuphatnin lengpan michingho, phat umchan hethemho henga chun aseijin, (ajehchu dan le thutanje heho chungchanga lengpa umdan ngai mong ahi.

¹⁴Chule ama bantah-a hochu Persia le Media'a milen sagiho Carshena, Shethar, Admathah, Tarshish, Meres, Mersena, chule Memucan ahiuvin, amaho chu lengpa angsunga lutmasapen le lenggam sunga alenpenho ahiuvin ahi;)

¹⁵Ahasuerus lengpan nukiso ho-a kona apeh thupeh amanun anittah loujeh-a, dan dungjuija Vashti lengnu chunga ipi ibol diu hitam? tin adonge.

¹⁶Chuin Memucan'in lengpa le pipuiho anga chun adonbutnin, lengnu Vashti in lengpa heng seh-a dihloutah abol hilouvin, Ahasuerus lengpa gamkai jouse-a, milen jousele mipi jouse chunga jong abolkhel ahi.

¹⁷Ajehchu Ahasuerus lengpan, Vashti lengnu amasanga hinpuidia thupeh apehle, amanu ahungpon ahi ti thuhi ahung kiseison tengle, lengnu natoh hi numei ho jousen hin hedoh-untin, amahon amitmuva ajiteu chu ajalou dingu ahitai.

¹⁸Hiche banga chu Persia le Media'a numei ho lengnu thilbol jajouse chun lengpa pipuiho jouse henga chu lengnu natoh ajah-u chu aseidingu ahi. Hitia chu kitaitom nale lunghana tamtah sohdoh ding ahi.

¹⁹Lengpa lunglam ahile, Vashti chu Ahasuerus lengpa masanga hunglut talou ding ahi tin ama-a konin leng thupeh khat sohdoh hen, chule hichu khelkit tahlou dingin Media le Persia dan lah-a kisunlut hen; chule lengpan lengnu mun chu ama sanga phajo dangkhat pehen.

²⁰Chule aman apeh ding leng thupeh chu alenggam pumpi-a akiphon dohteng (ajeh chu lenggam chu lentah hija ahi), numei jousen ajiteu chu alen hihen aneo hijongle jana apehcheh dingu ahi, ati.

²¹Chuin kithumopna hin lengpa le pipuiho chu alung lhaisah lheh-in; chule Memucan thusei dungjui chun lengpan aboltai.

²²Hitichun lengpan gamkaiho jouse-a, agamkai jouse alekhajem cheh uva, amitakip apao cheh-un, Pasal tinin a-insung cheh-a vai ahom cheh dingu ahi tin, amitakip pao dungjuija phonjal dingin lekha athottan ahi.