Read Thado Chin Esther 2 Bible Online

Esther 2 - Thado Chin bible

Esther 2

¹Hiche hojouse nung, lengpa Ahasuerus alunghan na-a kon alungdam phatnin, Vashti le athilbol, chule achunga thupeh ho chu ahin geldoh-in ahi.

²Chuin ajenlea pang asohho chun lengpa henga, Lengpa-a dingin nungah theng donglai melhoi kiholpeh hen:

³Chule nungah theng donglai melhoiho jouse chu leng inpi Shushan'a, numei ho chingpa lengpa nukiso Hegai vettupna-a, numei ho umna in'a kholkhom dingin, lengpan alenggama gamkai jouse sunga vaipoho pansah hen. Chule amaho chu akisuhtheng nadinguva khoh thilho chu kipehen.

⁴Chule lengpa lunglhaina penpen nungah chu lengnu Vashti khel hihen, atiuve. Chule lengpan hichu pha asan, hitichun aboltai.

⁵Tun Shushan leng inpi sunga chun Juda mi khat aumin, amin Mordecai akitin, Jair chapa, Shimei chapa, Kish chapa Benjamin mi ahin;

⁶ Amahi Jerusalem'a kona Jeconiah toh kilhona sohchang dinga Babylon lengpa Nebuchadnezzar'in anapoh mangho lah-a chu jao ahi.

⁷Chule aman apangah chanu Hadassah, hichu Esther ahin, ahin khoukhah-in ahi: ajehchu amanu nulepa neilou ahin, chule nungahnu chu vetnom umle melhoitah ahi; Mordecai'in anu le apa thi nunga ama chanu dinga akilah ahi.

⁸Chuin ahung hitin ahi, lengpa thupeh le thuphondoh chu jah ahi-a, Shushan leng inpi-a nungah tampi Hagai vetsuina noija khopkhom ahi phatnin, Esther jong chu lengpa in'a numei ho vesuipa Hagai vetsui ding chun ahinpui taovin ahi.

⁹Hiche nungahnu chun amapa chu alunglhaisah lheh-in, amapa hepina achangtan ahi; hijeh chun amapan akisuh thengna dinga thil ngaikhoh ho, achan dinga thil kigotpeh ho, chule leng inpia kona amanu jenleding nungah sagi kipeho chu amanu apeloi jengin: chule aman amanu le ajenleding numei ho chu numei ho in'a mun phalai pena chun akoitan ahi.

¹⁰Esther'in vang amitele a-inkoho aseidohpon ahi: ajehchu Mordecai'in amanu henga seidoh hih-in tia aseipeh masah ahi.

¹¹Chule nisehle Mordecai chu numei ho umna in hong maija chun Esther iti uma, achungchanga ipi hungsoh doh dingham ti hetnadin avahle jingin ahi.

¹²Tun numei ho umdan dungjuija lhasomle lhani alhin jou chun, nungah ho chu leng Ahasuerus anga akilutlhah lhahdiu nikho ahung lhungtan ahi, (ajeh chu akisuhtheng nao nikho lhinga ahitan, lhagup myrrh thao kinu uva, lhagupma gimnamtui le numei ho kisuhthengna thildangho kinu uva ahi).

¹³Hitichun nungah ho jouse chu lengpa anga ahunguvin; chule numei khatcheh chu numei ho umna in'a kona lengpa in'a ache tengle adeichan chu akipe jin ahi.

¹⁴Nilhahle lutji-a, ajingle numei umna in nina, thaikem ho vetuppa lengpa nukisopa Shaashgaz vetsuina-a umdingin akile kitjin ahi. Amanu chu achunga lengpan lunglhaina aneija, amina akou tilouva lengpa henga avela lutkit talou ahi.

¹⁵Tun achanu dinga hinkivahdoh, Mordecai pangah Abigail chanu Esther, lengpa henga alutna ding phat ahunglhun phatnin, numei ho vetuppa lengpa nukisopa Hagai'in agot teho tailou amanun imacha dang angaichapoi. Chule Esther chu ama hinvaho jouse mitmun lungsetna achangin ahi.

¹⁶Hitichun alengchan kum sagi chana, lhasom channa, Tebeth lha-a chun lengpa Ahasuerus leng inpi sunga Esther chu ahin puilut taovin ahi.

¹⁷Chuin lengpan numei dangho jouse sangin Esther angailu penin, nungah theng dangho jouse sangin amitmun lungsetna le khotona achangtan ahi; hijeh chun aman amanu chu lallukhuh akhuh peh-in, Vashti khelin lengnun apansah tai.

¹⁸Chujouvin lengpan pipuiho jousele asohte din golvah loupitah, Esther golvah ngei chu abolin; gamkaiho-a choldona aphongdoh-in, lengpa gamkai dungjuijin thilpehho apen ahi.

¹⁹Chule aniveina-a nungahthengho chu akikhopkhom phatnun, Mordecai chu lengpa kotpi bulla atouvin ahi.

²⁰Hiche geichun Esther'in Mordecai'in ahilna bangin, aphungle amite chu aseidohpon ahi. Ajehchu aman ahin vahlai bangbanga Esther'in Mordecai thupeh angai ahi.

²¹Hiche nikholai, Mordecai chu lengpa kotpi bula atouji laichun, lengpa kotngah ho lah-a nukiso mini Bigthan le Teresh chu alunghang lhontan, leng Ahasuerus chunga khut lhah ding ago lhontan ahi.

²²Chuin thil umdan chu Mordecai'in ahetan, aman lengnu Esther ahilin; chule Esther'in Mordecai minin lengpa henga ahetchen sahtan ahi.

²³Chuin hiche thu chu akikholtoh phatnin, atahbeh ahi akihechentan, hijeh chun anilhonin thinga akhailih taovin ahi. Chuin hichu thusimbua lengpa masanga akisunlut tan ahi.