Read Thado Chin Esther 3 Bible Online

Esther 3 - Thado Chin bible

Esther 3

¹Hicheng jouhin Ahasuerus lengpan Agag mi Hammedatha chapa Haman chu apanmun akalsah in, amasotsah in, chule apipui chankhompi jouse chungvuma touna adopehtan ahi.

²Chule Lengpa kotpi phunga um asohte jouse akunun, Haman chu jana apeovin ahi: ajehchu lengpan ama thudola hitia chu thu apeh ahi. Ahin Mordecai vang kun jong akunpon, jana jong apepoi.

³Chuin lengpa kotpi phunga um soh ho chun Mordecai henga, ibola leng thupeh nasuhkhel ham? atiuvin ahi.

⁴Tun ahitin ahi, amahon ajah-a niseh-a asei seijuva, aman angaipeh lou phatnun, amahon Mordecai thu ache achelou hetnadin, Haman ahiltaove: ajehchu aman amaho henga Judah mi kahi tin aseijin ahi.

⁵Chuin Haman'in Mordecai chu kunjong akunlouva, chule jana jong apehlou chu amudoh phatnin, Haman chu lunghan na-in adimtan ahi.

⁶Chuin aman Mordecai chungseh seh-a khut lhading chu imalouvin ageltan ahi; ajehchu amahon Mordecai jat mite chu ama ahetsah-u ahitai. Hiche jehchun Haman'in Ahasuerus gamsung pumpi-a Mordecai mite, Judah ho jouse chu suhmanghel ding agotan ahi.

⁷Ahasuerus lengchan kal kum somle kumni lhinna-a, lha masapen, hichu Nisan lha ahin, amahon Haman angsunga pur kiti vangvetna khat, ani anin, chule alha alhan, lhasomle lhani channa, Adar lha geichun, asang asang jengun ahi.

⁸Chuin Haman'in lengpa Ahasuerus henga, Nalenggam sung gamkai jouse mipi ho lah-a hin namkhat kithecheh-a le vahcheh-a aumun; chule adan uchu mijouse-a toh akitohpon; chule lengpa dan jong anit pouvin ahi. Hijeh chun amaho nomlhat sah ding chu lengpa dinga phatchomna bei ahi.

⁹Lengpa lunglam ahile, amaho chu suhmang ding ahi tin kisunhen: chule keiman chuche tong dinga nganseho khutna chun, lengpa goukhol na-a din dangka talent sangsom penge, ati.

¹⁰Chuin lengpan akhutna konin akhutjem aladoh-in, Judah te melmapa, Agag mi Hammedatha chapa Haman chu apetan ahi.

¹¹Chuin lengpan Haman henga, dangka le miho chu naphatsah sah-a nabol dinga kipehdoh nahitai ati.

¹²Chuin lha masapen nisomle nithum lhin nin, lengpa lekhasunho chu akikou khomin, Haman thupeh dungjuijin, lengpa gal lamkaiho heng, gamkai jouse-a vaipoho heng, chule gamkai tina mipi chunga vaihomho henga alekha jem-u dungjui cheh le apaovu dungjui cheh-in Ahasuerus lengpa minin thupeh khat asunun, lengpa khutjem chu anam khumun ahi.

¹³Chule lha somle lhani na, hichu Adar lha ahin, ni somle nithum ni lhin nikho leh, nikhat sunga, Juda te jouse khangdong le tehse, chapang le numei ho abonuva suhmang ding, thading, suhgamhel ding, chule anei agou jouseu chomgamhel dingin, lekhathot ho chu lengpa gamkai jouse-a lekhapole ho-a konin akithot tan ahi.

¹⁴Chuche nikho-a dinga akigot chehna dinguva, hiche lekha chu mijouse-a dinga kisun ahito lhonin, hichu sutsona gamkai jouse-a dan banga mijouse henga phondoh dinga thupeh ahi.

¹⁵Lengpa dinga athupeh dungjuijin lekhaho chu gangtah-in akihomdoh tan; chule thuphondoh chu leng inpi Shushan'a phondoh-in aumtai. Chuin lengpa le Haman chu judon dingin atoulhonin, ahinla Shushan khopi sung chu alungdong gamtaove.