Read Thado Chin Esther 4 Bible Online

Esther 4 - Thado Chin bible

Esther 4

¹Mordecai'in thil kibol jouse amudoh phatnin, Mordecai'in apon jouse abotkeh-in, khaodip pon akiselin vut akinun, khopi sung laitah-a ahungdoh-in, hatah le lungna tah-in akapmin;

²Chule lengpa kotpi chan geijin ahunge: ajehchu khaodip pon kisila chu koimacha lengpa kotpi-a luttheilou ahi.

³Chule gamkai jouse-a, lengpa thupeh le thuphondoh lhunna chana chun, Judah teho lah-a lunghemna nasatah toh, anngolna, kana le penna aumin: chule mitam tah-in khaodip pon akisilun vut lah-a alumun ahi.

⁴Hitichun Esther soh numei ho le anukiso ho chu ahungun hichu ahunghil taovin ahi. Chuphatnin lengnu alungkham behseh jengtan, akhaodip pon chu aholhah-a akivon dingin Mordecai chu pon agah thotnin; ahinla aman hichu akisanpon ahi.

⁵Chujouvin Esther'in, ama vetup dinga kipansah, lengpa nukiso ho lah-a Hatach chu akouvin, Mordecai chungchanga ipi iti hija, chule ipidinga chuti umham? ti gahetoh din thupeh apen ahi.

⁶Hitichun Hatach chu lengpa kotpi maija khopi lamlena Mordecai henga chun achedoh-in ahi.

⁷Chuin Mordecai'in achunga thusoh jouse, chule Judah te suhmangna dinga Haman'in lengpa goukhol na-a sum pedinga akitepnaho chu ahilin ahi.

⁸Chule aman Esther avetsah-a, ahenga ahilchetna, chule amanu lengpa angsunga galut dinga thu apeh-a, amanu ahenga agataova, chule amite dinga ngehna aganei theina dingin, amaho suhmang nadinga Shushan'a kona thutanlhah kithotdoh lekhat khat jong apen ahi.

⁹Chuin Hatach chu ahungin, Mordecai thusei jouse chu Esther ahiltan ahi.

¹⁰Esther'in Hatach henga aseikitnin, chule Mordecai henga hitia agasei dingin thupeh apen ahi.

¹¹Lengpa sohte jousele lengpa gamkai sunga um jousen, koi hijongle, numei hihen pasal hijongle, aman akou louva lengpa hongsung sungnunga hunglut ho chu, aman dan khatseh aneijin, amachu kithat ding, amavang lengpan sana tenggol ama lama adop khumho bou chu hingding ahi, ti ahesoh keijun ahi. Ahinla nisomthum sunghin lengpa henga lut dingin keima eikikou tapoi, ati.

¹²Chuin amahon Esther thu chu Mordecai aseipeh-un ahi.

¹³Chuin Mordecai'in Esther hitia adonbut diuvin athupeh-in ahi, Judah te jouse sangin leng inpi sunga hoidoh nange tin kigel hih-in.

¹⁴Ajehchu nangma tuphatna hi nathipbeh-a ahile, mun danga kona Judah te letdohna le hoidohna um teiding ahin, nangmale napa insung vang namanthah diu ahi. Hitobang phatna dinga hi lenggam sunga nahungpan ahi kon ahetnem? ati.

¹⁵Chuin Esther'in hiche donbutna hi Mordecai hetsahdin amaho chu asolin:

¹⁶Cheovin, Shushan'a um Judah te jouse kichomkhomu vinlang, keidingin an ngolun, chule nithum sung sunle jan-in nelou donlouvin umun: keimale kasoh numei hon jong hitobanga chu an kangol diu; chule dan hihih jongle lengpa koma kagalut ding ahi: kamanthahle mangthah tange, ati.

¹⁷Hitichun Mordecai chu achedoh-in, Esther'in athupeh jouse chu aboltan ahi.