Read Thado Chin Esther 5 Bible Online

Esther 5 - Thado Chin bible

Esther 5

¹Tun anithum channin ahitin ahi, Esther'in alengpon akivonin, lengpa in jon tah-a lengpa hongsung sungnunga chun adingtan: chule lengpa chu in kotpi jontah, leng in sunga alaltouna-a chun atouvin ahi.

²Chuin ahitin ahi, lengpan Esther lengnu chu thutana hongsunga adin amu phatnin, lengpa mitmun amanu chu lungsetna achangtan; chuin lengpan akhutna um sana tenggol chun Esther chu ahin japmin ahi. Hitichun Esther ahung naijin, chule tenggol muh chu athamin ahi.

³Chuin lengpan amanu jah-a, lengnu Esther, ipiham nadei? chule ipiham nathum? Lenggam akehkhat geija jong kipeding nahi, atitai.

⁴Chuin Esther'in adonbutnin, lengpan pha asah-a ahile, tunia keiman ama dinga kagonpeh anneh khomna-a hin lengpa le Haman hunglhon le kati, ati.

⁵Chuin lengpan, Esther seibang aboltheidin, Haman chu hinpui loijun, ati. Hitichun Esther'in agon nehkhom na-a chun lengpa le Haman chu ahungtai.

⁶Chuin lengpan judon khomna-a chun Esther henga, ipiham nathum? nakibolpeh ding nahi, chule na-ngeh chu ipi ham? lenggam kehkhat hijengjongle kibulhitpeh ding nahi, ati.

⁷Chuin Esther hin adonbutnin, kathum le kangeh chu:

⁸Lengpa mitmu-a lungsetna kachana, kathilthum hi lengpan phalpeh dinga pha nasah-a, Kathil ngeh bulhitpeh dinga pha nasahle, lengpa le Haman kagonpeh ding nehkhom na-a hunglhonin lang, lengpa seibangin jingle bolnange, ati.

⁹Hitichun Haman chu hicheni chun lunglhaisel le thanom tah-in apotdohtai. Ahinla Haman'in lengpa kotpi phunga Mordecai ama jana-a adindohlou le achalohlou chu amuphatnin, Mordecai chunga alunghang lheh jengin ahi.

¹⁰Ahijengvangin, Haman akitimham hamin: in ahunglhun phatnin agolho le ajinu Zeresh koudin asolin ahi.

¹¹Chuin Haman'in amaho henga ahaona loupije, achate tamdan, lengpan adopsangna thilho jouse, chule lengpa pipuiho le asohte chungvuma amasotsah dan chu aseijin ahi.

¹²Chukalvalin Haman'in aseibe kitnin, Henge, Esther lengnun nehkhom na agonna-a chun lengpa le kei tailou koimacha alutsahpoi; chule jingle avelin lengpa toh eikou kit lhonin ahi.

¹³Ahinla lengpa kotpi phunga tou Judah mi Mordecai kamu laisen, hicheho jousehin ima eiphatchom sahpoi, ati.

¹⁴Chuin ajinu Zeresh le agolho jousen ajah-a, tong somnga sang thingpel kisem hen, chule achunga chu Mordecai akikhai theinadin nangman lengpa henga jingle hinseijin: chuteng lengpa to thanom tah-in nehkhom na-a chun chen, atiuve. Chuin Haman'in hichu pha asan, thingpel chu asemsahtai.