Read Thado Chin Esther 6 Bible Online

Esther 6 - Thado Chin bible

Esther 6

¹Hiche jan chun lengpa a-imuthei hihbeh-in, chule thusoh ho kisutlutna thusimbu chu ahinchoi diuvin thupeh apen, chule hicheho chu lengpa angah asimun ahi.

² Chuin Bigthana le Teresh lengpa kotngah-a pang nukiso tenin, Ahasuerus lengpa chunga khut lhahdia agotlhon, Mordecai'in ana seidohpeh thu kisun chu amudoh-un ahi.

³Chuin lengpan aseijin, hiche jeh-a hi ipi janale choi-atna Mordecai kibolpeh am? ati. Chuin ajenlea pang lengpa sohten, ima akibol pehpoi, atiuvin ahi.

⁴Chuin lengpan, hong sunga koi umam? ati. Tun Haman chu lengpa aman asem thingpel chunga Mordecai khaiding thusei dingin, indan ponunga chun ahunglutnin ahi.

⁵Chuin lengpa sohten ajah-a, vetan, hong sunga Haman adinge, atiuve. Chuin lengpan, hinlutsah un, ati.

⁶Hitichun Haman ahunglut tai. Chuin lengpan ajah-a, lengpan ajabol nompa henga ipi kibolpeh le phantem? ati. Tun Haman'in alungsunga, lengpan keisanga ajabolnom koi umding ham? tin agelin ahi.

⁷Chuin Haman in lengpa chu adonbutnin, lengpan ajabol nom mipa ding chun,

⁸Lengpan akivon lengvon, lengpa tounaji sakol, chule lengpa kikhuhji lallukhuh chu hin kilahsah hen:

⁹Chule lengpan ajabol dingpa chu ajep theina dingin, hiche von le sakol chu lengpa pipu lulpen ho lah-a khat khutna kipehen: chule amachun khopi lamlena sakol chunga chun ama chu puile henlang, amasanga chun: lengpan ajabol nom mi chu hiti ahi kibol ding ahi, tin samphongle hen, ati.

¹⁰Chuin lengpan Haman jah-a, kino-in, nasei bang chun von le sakol chu galan, chule lengpa kotpi phunga tou Juda mipa Mordecai henga khun gabolin: naseiho chu khatcha akipel umlou ding ahi, atitai.

¹¹Hitichun Haman'in von le sakol chu alan, Mordecai chu avonpeh-in, sakol chunga khopi sung lamlena ahinpuijin, amasanga chun, lengpan ajabol nom mi chu hitia hi kibol ding ahi, tin asampeh-in ahi.

¹²Chuin Mordecai chu lengpa kotpi phunga ahungkit tan ahi. Haman vang chun ponlu akikhun, lunghem tah-in a-in lama acheloitai.

¹³Chuin Haman'in ajinu Zeresh le agolho jouse henga achunga thilsoh jouse chu aseitai. Hichun amiching hole ajinu Zeresh'in ahengah, ama masanga nalhuhpatna Mordecai chu Judah te son ahile, nangman ama najo louhel ding, amavang thonlouva a-anga nalhuhtei ding ahi, atiuve.

¹⁴Chuin amaho amatoh akihoulim nalai uvin, lengpa nukiso ho khat ahungin, Esther lengnun asem nehkhom na-a dingin Haman chu mangang tah-in ahung puitan ahi.