Read Thado Chin Esther 7 Bible Online

Esther 7 - Thado Chin bible

Esther 7

¹Hitichun lengpa le Haman chu Esther lengnun agon nehkhom na-a chun ahung lhontan ahi.

²Chule anini channi jong chun lengpan don khomna-a chun Esther chu adongin, Esther lengnu, nathum chu ipiham? nangma kinop peh ding nahi, chule na-ngeh chu ipiham? lenggam kehkhat pehding hijengjongle, kibolpeh ding nahi, ati.

³Chuin lengnu Esther'in adonbutnin, Vo lengpa namit mu-a lungsetna kachana, lengpa lung ahile, kathumna-a hin kahinkho hi eikipe henglang, kangehna-a hin kamite hinkho kipehen.

⁴Ajehchu keiho, keimale kamitehi, suhmang ding, tha dingle, suhgamhel dinga eikijoh doh-u ahitai. Ahinla keihohi sohpa le sohnu dinga eikijohdoh maimaiju hilevang, melmapan lengpa thil suhmang ditdoh jouding hihih jongle, ima seilouva kaum jengding ahi, ati.

⁵Chuin Ahasuerus lengpan Esther lengnu adonbutnin, ajah-a, alungsunga jong chutobang gahgel ngama chu koihija, hoija uma ham? ati.

⁶Chuin Esther'in, doubol le melma chu hiche mi-engsepa Haman hi ahi ati. Chuin Haman chu lengpa le lengnu anga chun akichatan ahi.

⁷Chuin lengpa ju donkhom na-a kon chun lunghang tah-in adingdoh in, leng inpi honsung lama achetai. Chuin Haman chu adingdoh-in ahinkho kihuhna dingin Esther lengnu henga ataotai; ajehchu lengpan achunga setna angaito chu ahet ahitai.

⁸Chuin lengpa chu hona konin donkhomna mun'a akile kitnin, chule Haman chu Esther umna jalkhun chunga chun analhun ahi. Hichun lengpan, kamasang tah-a jong aman hiche insunga hi lengnu suhset ding agot ham? ati. Chutia lengpa thusei petchun, Haman chu amai atompeh taove.

⁹Chuin nukiso ho lah-a khat Harbonah chun, lengpa anga, Vetan, lengpa dinga thupha seipa Mordecai khailihna dinga Haman'in tong somnga sanga asem thingpel chu Haman in'a akitunge, ati. Chuin lengpan, hiche chunga chun ama khailih-un, ati.

¹⁰Hijeh chun amahon Haman chu Mordecai kikhaina dinga asem thingpel chunga chun akhai taove. Chujouvin lengpa chu alungdamtai.