Read Thado Chin Esther 8 Bible Online

Esther 8 - Thado Chin bible

Esther 8

¹Hiche ni chun Ahasuerus lengpan Judah te melmapa Haman in chu Esther lengnu apetan ahi. Chuin Mordecai lengpa masanga ahungin ahi; ajehchu Esther'in ama chu ama dinga a ipi ahi aseipeh ahitai.

²Chuin lengpa chun Haman'a kona alah akhutjem chu aladoh-in, Mordecai chu apetan ahi. Chule Esther'in Mordecai chu Haman insung vaipon apansahtai.

³Chuin Esther'in lengpa anga thu aseikitnin, akengbula alhun, mitlhi pumin Agag mi Haman'in Judah te douna-a thilphalou agon chu alahdoh din angeh-e.

⁴Chuin lengpan sana tenggol chu Esther lama adomdoh-in ahi. Hitichun Esther athoudoh-in, lengpa anga adingin,

⁵Hitin aseije, Lengpan pha asah-a, amitmua lungsetna kachana, chule hiche thil hi lengpa anga adih-a akilah-a, amitmua alunglhaina kahile, lengpa gamkai jouse sunga um Judah te suhmangna dinga Agag mi Hammedatha chapa Haman'in anabol lekhaho chu akheldohna ding kisun hen:

⁶Kanam mite chunga hunglhung ding setna chu ken iti kamu-a kadoujou dingham? Ahiloule kasopiho kisuh mangna ding chu iti kamua kadoujou dingham? ati.

⁷Chuin Ahasuerus lengpan Esther lengnu le Judah mi Mordecai hengah, veuvin, Judah te chunga akhut alhah jeh-a thingpel'a akhailih-u Haman in chu, keiman Esther kapeh ahitai.

⁸Nanghon nadeilam tah-un lengpa minin Judah te dingin jong lekha sunun, chule lengpa khutjema chun sinkhana nam khumun: ajehchu lengpa mina kisuna, chule lengpa khutjema sinkhana kinamkhum chu koimachan akhelthei louhel ahitai, ati.

⁹Chuin chuche phatlai lha thumna, hichu sivan lha ahin, nisomni le nithum nin lengpa lekhasunho chu koukhom in aumun; abonchan Mordecai'in athupeh dungjuijin, India'a pat Ethiopia gei, agoma gamkai jale somni le sagi-a um Judah te heng, gal lamkaiho heng, gamvaipoho le pipuiho henga thotdin lekha asunun; gamkai jouse chu amaho lekhajem'in, mijouse chu apao cheh-in, chule Judah te dingin jong alekhajem dungjuile apao dungjuijun athot uvin ahi.

¹⁰Chuin aman Ahasuerus lengpa minin asunin, lengpa khutjemin sinkhana anamkhumin, lekha chu lekha pole-a pang sakol chung, sangan chunga touho, sangongsang, chule sangongsang khangdongho apohsah-un ahi.

¹¹Hia chun lengpan khopi tina cheng Judah te jouse chu ahinkhou kihuhna dinga akikhop khomuva, amaho hindel khum ding thahatna jouse mihem le gamkai chu naosen le numei geija asumanguva, atha uva, asuhgamhel uva, chule anei agouhou chu galthil choma akichom diuvin aphalpeh-in,

¹²Hichu nikhat sung, lha somle lhani na, hichu Adar lha ahin, nisomle nithum nileh, Ahasuerus lengpa gamkai jouse-a tohdoh-a umding ahi.

¹³Gamkai tina mijouse pehdinga thuphondoh kisunson chu, Juda te chu hiche nikho-a amelmateu chunga phula dinga kigosa dema aumna dinguvin, mijouse henga akihom jaltan ahi.

¹⁴Hitichun kino dingle kikinsah dinga lengpa thupeh ahi jehchun, sangan le sangongsang chunga tou lekhahomho chu akipatdoh taove. Chule thuphondoh chu leng inpi Shushan'a kihomdoh ahi.

¹⁵Chuin Mordecai chu lengpa angsunga konin lengvon adum le akang, sana lallukhuh loupitah, tupat ponnem le ponsandup kivon pumin apotdoh-in: chuin Shushan khopi chu akipah-un chule athanomlheh jengun ahi.

¹⁶Judah te chun vah, kipana, thanopna, chule jana aneitauvin ahi.

¹⁷Chuin gamkaitin le khopitin, lengpa thupeh le thuphondoh lhunna channa chun Judah ten kipana le thanopna aneijun, golvah abolun chule akichol douvin ahi. Chuin gamsunga mitamtah chunga chu Judah te ginna achuh jeh-in, Juda mi asohgam taove.