Read Thado Chin Esther 9 Bible Online

Esther 9 - Thado Chin bible

Esther 9

¹Tun lhasom le lhani lhina, hichu Adar lha ahin, chuche lha nisomle nithum ni, lengpa thupeh le thuphondoh chu tohlhah-a aumding nikho, Juda mite chunga amelma teovin thaneina anei diuva akinepnao nikho chu ahung nai phatnin, (amaho ana hotbol ho chunga Judah te joh-in vai ahomna diuva thu chu akaleh-a heija aum vang chun)

²Judah te chu Ahasuerus lengpa gamkai sung jouse-a chun khopi jouse-a, achunguva thilse boldingho chunga khut lhadin akikhomun ahi: Chule koiman amaho atingjou pouve; ajehchu amaho kichatna chu mijouse chunga chua ahitai.

³Chule gamkaija vaipoho jouse, gal lamkaiho, chule lengpa vaipoho chun Judah te akithopiuve; ajehchu achunguva Mordecai ginna achutan ahi.

⁴Ajehchu Mordecai chu leng insunga alen lhehtan, chule aminthanna chu gamkai jouse-a akithang sohtan ahi; ajehchu hichepa Mordecai hi akhangtou tultul jengin ahi.

⁵Hitichun Judah ten amelmateu jouse chu chemjamin abansat gamun, athatnun, asumangun, chule ahotbolteu chunga boldinga lomtah chu abol taovin ahi.

⁶Chule Shushan inpia Judah ten mi janga athatnun asumangun ahi.

⁷Chuin Parshandatha, Dalphon, chule Aspatha,

⁸Chule Poratham, Adalia, chule Aridatha,

⁹Chule Parmashta, Arisai, Aridai chule Vaizatha.

¹⁰Hammedatha chapa Haman chapa som, Judah te melmaho chu amahon athatnun; ahinla galthil chu ima alapouvin ahi.

¹¹Hichenia Shushan leng inpia kithatho chu amijat lengpa angsunga ahinpolut nun ahi.

¹²Chuin lengpan lengnu Esther jah-a, Judah ten Shushan inpia mi janga athatnun, asumanguvin, chule Haman chapate misom jong chu athat taove: lengpa gamkai dang jouse-a ipi aboluvem? Tun ipiham nathum? Hichu kibolpeh ding nahi. Ahiloule ipiham nangehbe? Hichu kibolding ahi, ati.

¹³Chuin Esther'in, lengpa lunglam ahile, Shushan'a um Juda te chu tunikho-a dinga thuphondoh kibol banga, jing nikho jongle abol diuvin phalna kipehen, chule Haman chapate somho hi thingpel'a kikhai hen, ati.

¹⁴Chuin lengpan chutia bolding chun thupeh apetan ahi. Chule thupeh apeh chu Shushan'a akipen; chule amahon Haman chapate som chu thingpel'a akhailih taove.

¹⁵Ajehchu Shushan'a um Judah te chu Adar lha, ni somleli nin akikhom khomun, Shushan'a mi jathum athat uvin; hinlah athilhou vang imacha alapouvin ahi.

¹⁶Ahinla Juda mi adang dangho lengpa gamkai sunga umho chu akikhomun, ahinnao huhna-in apanguvin, amelmateuva konin akicholdo uvin, agalteu chu sangsomsagi le sangnga athatnun ahi; hinla anei agouhou chunga akhut alha pouve;

¹⁷Hiche hi Adar lha ni som le nithum ni ahi. Chuin hiche lha mama nisomle nili channin amaho akicholdo uvin, hiche nikho chu golvah le kipa nikhon amanguvin ahi.

¹⁸Ahinla Shushan'a um Judah te chu chuche lha ni somle nithum ni, chuleh nisomle nili nin akikhomun; chule hiche lha mama nisomle ninga channin akicholdo uvin, hiche nikho chu golvah le kipa nikhon amanguvin ahi.

¹⁹Hijeh-a chu kulpi kikai khum lou khoneo ho-a Judah te chun, Adar lha nisomle nili ni chu kipa le golvah nikhon amangun, chule choldoni akilhaovin, khat lekhat thilpeh kipehto nikhon amanguvin ahi.

²⁰Chuin Mordecai jin hichehohi asunin, Ahasuerus lengpa gamkaiho jouse-a um Judah te, naija le gamlha-a umho jouse henga lekha athotnin,

²¹Adar lha nisomle nili le nisomle ninga ni hi kum seh-a anitdiuva alah uva phudoh-a,

²²Hiche nikho-a chu Juda te amelmateova kona acholdonao nikhou, chule chuche lha chu amaho dinga lunggim na-a kon kipana aso-a, chule lunghemna-a kona choldo nikho sodohna lha ahin: hitia chu amahon hiche nikho teni chu golvah le kipa nikho, khatle khat thilpeh kipehto nikho, chule gentheiho thilpeh peh nikho-a amandiuvin athotnin ahi.

²³Chuin Judah te chun amahon ana bolpatsao bangle, ahenguva Mordecai hinsut banga chu bol dingin asang taove.

²⁴ Ajehchu Agag mi Hammedatha chapa Haman, Judah te melmapa chun Judah te douna-a amaho suhmang ding anagotna, chule Pur anasana, hichu vangvetna ahin, amaho chu thagama, suhgam ding anagot ahi.

²⁵Ahinla, Esther chu lengpa anga ahung phatnin, lengpan lekha-a thupeh apen, amapa lung ngaito phalou, Judah te douna-a abol hochu ahungkinung le-a, abona ama luchunga achuh-a, chule amale achapate chu thingpel'a khailih ahina dingin nathupeh tan ahi.

²⁶Hiche jeh-a chu hiche nikhohi Pur mina konin Purim asah-u ahi. Hijeh chun hiche lekhathotna thucheng jousele, chuche chungchanga athilmu hou jouse, chule amaho chunga hunglhungho jeh chun,

²⁷Judah ten amaho chung le, asohteu chung, chule amaho jop chan chunga din, akisun dungjuija thonlou hela akitep dungjuija kumseh le hiche nikho ni hi anit dingun asudetnun ahi.

²⁸Chule hiche nikho teni hi geldoh jinga uma, insung tina, gamkai tina, chule khopi tina akhang akhanga kinit jingding ahi. Chule hiche Purim nikho teni hi Judah te lah-a kona kilamang louding, chule hicheho hetjingna jonghi achilhah teova kona mangthah louding ahi.

²⁹Chujouvin Abihail chanu lengnu Esther le Juda mi Mordecai'in thaneina jouseto thon, Purim suhdetna dingin lekhathot aniveina asun lhonin ahi.

³⁰Chuin aman lekhathot ho chu, Ahasuerus lenggama gamkai jakhatle somni le sagi-a cheng Judah te jouse henga, lungmona thu le thutah thu toh athot than,

³¹Judah mi Mordecai le Esther lengnun ajui diuva aphatsah lhon dungjuile, a-an ngolu le akanao thudola amaho tah dingle achateu dinga thuphondoh anabol banguva, phat kitep dungjuija hiche Purim nikho hi suhdetna aumna dinga athot ahi.

³²Chuin Esther thuphondoh chun Purim thudol chu asudet tan; chuleh hichu lekhabua akisunlut tai.