Read Thado Chin Potdohbu 1 Bible Online

Potdohbu 1 - Thado Chin bible

Potdohbu 1

¹ Tun hichehi Egypt gama hunglutna Israel chateho min chu ahi; amitakip le a-insung miteu Jacob toh ahungun ahi.

²Reuben, Simeon, Levi, chule Judah,

³Issachar, Zebulun, chule Benjamin,

⁴Dan le Naphtali, Gad le Asher,

⁵Chule Jacob taiguija kona pengdoh mihing chu aboncha mi somsagi ahiuve. Joseph vang chu Egypt gama ana umsa ahitai.

⁶Chuin Joseph le asopite chule chuche khanga miho jouse chu athigam taovin ahi.

⁷ Chujouvin Israel chate chu achipha lheh jengun, apungtul tullun, atamlheh jeng taovin, chule hattah ahitaovin; gamsung chu alosoh taovin ahi.

⁸ Tun Egypt gama chun Joseph hephalou lengthah khat ahung lengchang tan ahi.

⁹Chuin aman amite jah-a, Veuvin, Israel chate mipi hi eiho sangin atamjouvin, chule ahatjouvin ahi.

¹⁰ Hungun, eihon amaho hi chingthei tah-in bolu hite: achuti louleh amaho pungcheh cheh-untin, hung hitiding ahi, gal kisatna khattou ahung umteng, amaho imelmateu lama hung pangun tin, eiho eisat untin, hitichun gamsunga konin potdoh getnunte, ati.

¹¹Hijeh chun amahon apohgih houva amaho gimbol dingin achunguva tohvai homho apansah taove. Chule amahon Pharaoh dingin gou kholna khopiho Pithom le Rameses asauvin ahi.

¹²Ahivangin amahon amaho chu abolgim chanun apung cheh-un, akhangcheh cheh-un ahi. Chuin amahon Israel chate jehchun alunggim taovin ahi.

¹³Chule Egypt miten Israel chate chu gimtah-in ana-u atohsah-un ahi.

¹⁴Amahon natoh hahsatah ho bon nganin, cheh-in, chule loujaova natoh jat tintangin ahinkhou chu asugenthei lheh jengun: ana-u atohsahna jouseuva genthei tah-in atohsah-un ahi.

¹⁵Chule Egypt lengpan Hebrew mi naososah teni, khatnu min Shiphrah le khatnu min Pu-ah chu akihoupin;

¹⁶Ajah lhona, Nangnin Hebrew numei ho nao nasosah lhonteng, naososahna touna chunga chun amaho chu velhonin; iti hama hichu pasal ahile natha lhonding ahi: ahin numei ahivangle hinghoi lhonin, ati.

¹⁷Ahivangin naososah teni chun Pathen aging lhonin, Egypt Lengpa thupeh bangchun abol lhonpon, ahin naosen pasal ho chu ahinghoiji lhonin ahi.

¹⁸Chuphatnin Egypt lengpan naososah teni chu akouvin, ajah lhona, Ipi dinga hicheho hi nabol lhona, naosen pasal ho chu nahing hoi lhon ham? ati.

¹⁹Chuin nao sosah teni chun Pharaoh jah-a, Hebrew numei hohi Egypt numei ho tobang ahilou jeh-u ahi; ajehchu amaho adamtheijun, nao sosah ho ahengu alhun masangle anasoh lhaji taovin ahi, atilhone.

²⁰Chutichun Pathen'in nao sosah teni chung chun aphalam tah-in na atongin ahi: chuin miho chu apung tul tul jengun, nasatah-in ahatdoh taovin ahi.

²¹Chuin ahitin ahi, nao sosah teni chun Pathen aginjeh lhonin, a-insungmi lhonding apen ahi.

²² Chuin Pharaoh'in amite chu athupeh-in, Pasal chapang pengtapou chu vadunga seplutnun, numei chapang tapou chu hing hoijun, atitai.