Read Thado Chin Potdohbu 10 Bible Online

Potdohbu 10 - Thado Chin bible

Potdohbu 10

¹Chuin Pakaiyin Mosi henga, Pharaoh koma galutnin: ajehchu hiche kamelchihna hohi amasanga kamusah theina dinga, amale asohte lungsung chu katahsah ahi:

²Chutia chu nangman nachapate le natupate nabenga Egypt gamsunga kathilbol ho leh alah uva kamelchihna bolho naseipeh uva; chule keima Pakai kahi nahetna dingu ahi, ati.

³Chuin Mosi le Aaron Pharaoh hengah ahunglut lhonin, ajah-a, Hebrew mite Pakai Pathen'in hiti hin ati, Nangma itihchan ka-angsunga kineosah ding nada nahlai ding ham? Keima eihou theina dingun kamite soldoh tan.

⁴Chutilouva, kamite nasoldoh nomlouva ahile, ven, jingle nagam pumpi-a khaokho kahin lhalut ding ahi.

⁵Chule koiman tol amu theilou leuva amahon leiset chung alosoh dingu ahi: chule gel suhset moh, nahenga umnalai jouse chu anehjou hel diu, chule nangma-a dinga keh loujaova thingphung jouse jong chu aneh jouhel dingu ahi.

⁶Chule amahon na-insung le nasohte jouse insung, chule Egypt mite jouse insung chu alodim sohdiu; hichu napateu le naputeuvin jong leiset chunga achenuva pat tuni geija amukhah lou dingu ahi, ati. Chuin ama akiheijin, Pharaoh henga konin apotdoh tai.

⁷Chuin Pharaoh sohte chun ahenga, Hiche mipahi itih chan eiho dinga thanga pang dingham? Pakai a-Pathen'u chu ajen theina diuvin miho chu soldoh tan: Egypt gamhi suhmangin aumtai ti nahet loulai ham? atiuve.

⁸Chuin Mosi le Aaron chu Pharaoh henga ahinpui kitnun ahi. Chuin aman aheng lhonna, Cheovin, Pakai na-Pathen'u chu gajen taovin: ahin koi koi cheding nahiuvem? ati.

⁹Chuin Mosi'n, Keiho kakhangdong hou le katehse hou toh, kachapateu le kachanuteu toh, kabong honhou le kakelngoi honhou toh kache dingu ahi; ajehchu keihon Pakai henga Kut kabol dingu ahi, ati.

¹⁰Chuin aman ajah lhona, Keiman nachasen houtoh kasoldoh uva ahile, Pakaiyin na-umpiu hen: chingtheijun, ajehchu namasanguva thilphalou aume.

¹¹Chutiponte: tun nangho pasal chengchu cheovin lang Pakai chu gajen taovin: ajehchu hichu nangaichatnu ahi, ati. Chuin Pharaoh angsunga konin amani chu anodoh taovin ahi.

¹²Chuin Pakaiyin Mosi henga, Khaokhote Egypt gamsung chunga ahungchuh uva, hiche gama gel seset moh hampa louhing jouse anehthei nadiuvin, khaokhote-a dingin Egypt gamsung chunga hin nakhut jahdoh-in ati.

¹³Chuin Mosi'n Egypt gam chunga atenggol chu ajahdoh-in ahile, Pakaiyin sun nilhum jankhovah-in gamchunga chun solam hui anunsah tan, chuin jingkah ahung hi phatnin solam hui chun khaokho hochu ahin polut tan ahi.

¹⁴ Chuin khaokho ho chu Egypt gam jouse chunga ahung taovin, Egypt gam pumpi jouse-a chun acholnga taovin ahi. Hiho chu akhohse lheh jengun; amaho masanga hin amaho tobang khaokho ana umkhapon, amaho nunga jong chutobang umkit louding ahi.

¹⁵Ajehchu hicheho chun leiset pumpi chu atomchah jeng taovin, chutichun gamsung chu athim jengtan; chule gelin asuhset moh gama hamhing tincheng le thingna jouse chu anegam hel taovin ahi. Chutichun Egypt gamsung jouse-a chun thingphung ho-a thing hing le loujaoa hampa louhing a-eng him him khatcha jong aumtapon ahi.

¹⁶Chuin Pharaoh'in Mosi le Aaron chu gangtah-in akouvin, ajahlhona, Keima Pakai na Pathen lhonle nangni douna-in kachonse tai.

¹⁷Hijeh chun tun, katao ahi, Kachonset hi khatveiseh neingaidam kit lhonin, hiche thina hi keija kona alahmang theina din Pakai na Pathen henga neitaopeh lhonin, ati.

¹⁸Chuin ama Pharaoh koma konin apotdoh in, Pakai henga atao tai.

¹⁹Chuin Pakaiyin lhumlam hui hattah anunsah-in ahile, hichun khaokho ho chu alhoh mangin, twipi sana alhoh lutsoh keijin; Egypt gam pumpi-a chun khaokho khatcha jong aumtapon ahi.

²⁰Ahivangin Pakaiyin Pharaoh lung chu atahsah-in, chuti chun aman Israel chate chu asoldoh dehpon ahi.

²¹Chuin Pakaiyin Mosi henga, Egypt gam chunga tohkhah thei hel khopma muthim ahung umtheina dingin van lama nakhut jahdoh-in, ati.

²² Chuin Mosi'n van lama akhut ajahdoh tan ahile, nithum Egypt gam pumpi chunga chun nasatah-in mu athimtan ahi.

²³Amaho khatle khat akimuto thei tapouvin, nithum sung chun koimacha aumna munna kona kipatdoh aumpon ahi. Ahivangin Israel chate jouse chennaho-a chun vah aneicheh-un ahi.

²⁴Chuin Pharaoh'in Mosi chu akouvin, ajah-a, Nangho cheovin lang, Pakai chu gajen taovin; nabonghon houle na kelngoihon hou bouchu umhen: nachasen hou jong chu nangho toh lhonuhen, ati.

²⁵Chuin Mosi'n, Nangman Pakai ka-Pathen'u henga ganlhaina-a kato dinguva ganlhaina thilto dingle govam thilto ding jong neipeh dingu ahi.

²⁶Kagancha hou jong keiho toh lhonding ahi: gancha kengtin khatjong dalhah-a umlou ding ahi: ajehchu Pakai ka-Pathen'u kajen nadinguva phabep kalhendoh dingu ahin; amun kalhun masang seova hoichepena hi Pakai kajen dingu kihet louvu ahi, ati.

²⁷Ahivangin Pakaiyin Pharaoh lung chu atahsah tan, amaho chu asoldoh nompon ahi.

²⁸Chuin Pharaoh'in ahenga, Kakoma konin chemangtan, kichih theijin, kamai mukit tahih-in; ajehchu kamai namukit ninileh nathi ding ahi, ati.

²⁹Chuin Mosi'n, Nangman nasei dih-e, keiman namai kamukit louding ahitai ati.