Read Thado Chin Potdohbu 11 Bible Online

Potdohbu 11 - Thado Chin bible

Potdohbu 11

¹Chuin Pakaiyin Mosi henga, Pharaoh chung le Egypt gam chunga hise khat kalhunsah be nahlai ding ahin; chujouteng leh hikoma kona hi nasoldoh diu ahitai: aman nasoldoh tengule, thonlouva nanodoh tho sohkei jeng dingu ahi.

²Tun mipi ho henga seipeh-in, chule pasal jouse le numei jousen aheng akoma konin dangka le sana-a kisem kijepnaho kithum cheh uhen, ati.

³Chuin Pakaiyin Egypt mitmu-a chun Israel miho chu khohsahna apetan ahi. Chukal valin mipa Mosi chu mipi mitmu le Pharaoh sohte mitmun Egypt gam sunga mi minthang tah ahitan ahi.

⁴Chuin Mosi'n, Pakaiyin hitin aseije, Jan khangkim donle Egypt gamsung lailung tah-a kalut ding:

⁵Chule Egypt gamsunga chapa peng masapen jouse, laltouna-a tou Pharaoh chapa lenpena pat, sumheija sohnu chapa lenpen changeija thisoh hel dingu; chule gancha asoh masapen ho jong thisoh hel dingu ahi.

⁶Chule Egypt gamsung jouse-a chu kana nasatah umding, hitobang hi anaum khalou ahin, umjong umkit louhel ding ahi.

⁷Ahin Israel chate douna-a vang, mihem douna hihen le gancha douna hijongle, uichan jong alei achalohsah louding ahi; chutia chu nanghon Egypt mite le Israel kah-a Pakaiyin ichana kikhena akoiham ti nahet ding ahi.

⁸Chuteng hiche nasohte jouse hi kahenga hung suh uva, ka-angsunga bohkhup diu, Chedohtan, nanungjui mipi jouse toh: ahung tidingu; chujou teng keima kachedoh ding ahi, ati. Chuin ama Pharaoh koma konchun lunghang tah-in apotdohtan ahi.

⁹Chuin Pakaiyin Mosi henga, Egypt gamsunga hi kathilbol kidang apun chehcheh theina dinga Pharaoh'in nathu angailou ding ahi, ati.

¹⁰Chuin Mosi le Aaron'in Pharaoh angsunga hiche thilkidang hojouse hi abol lhonin: chule Israel chate chu agama kona asoldohlou nadingin, Pakaiyin Pharaoh lung chu atahsah-in ahi.