Read Thado Chin Potdohbu 12 Bible Online

Potdohbu 12 - Thado Chin bible

Potdohbu 12

¹ Chuin Pakaiyin Egypt gama Mosi le Aaron henga chun aseijin, hitin ati,

²Hiche lhahi nangho dinga lha kipatna hiding: nangho dinga kumsunga lha masapen chu hiding ahi.

³Israel mipi kikhom ho jouse henga chun thu seilhonin lang, hitin seilhonin, Hiche lha nisom chan ni hile mitinin ama-a dingin kelngoinou khatcheh kilah-u hen, apu apateu insung dungjuija in khatna dinga kelngoinou khatcheh hiding ahi:

⁴Chule ijemtia insung khat chu kelngoinou khat dinga alhom behseh-a ahile, amale a-inhengpa chun kelngoinou khat chu amijatnu dungjuijin kilah-u hen; mitinin ava khamcheh-a aneh dingjat dungjuija kelngoinouva dinga chu mi nasimtoh dingu ahi.

⁵Na kelngoinouvu chu nolna beihel, achal kum khat lhingbep hiding: nanghon hichu kelngoi ham, ahiloule kelcha hama kona nalah dingu ahi.

⁶Chule nanghon chuche lha ni somle nili chan ni geija nakoi dingu: chule Israel mipi kikhom khomho jouse chun nilhah teng atha dingu ahi.

⁷Chule amahon athisan chu alah uva, aneh nadiu inho kotchung teni le achung jolla chu anu dingu ahi.

⁸Chule amaho chuche jan chule aphe chu meija agouva, cholsolou changlhah toh an-che kha toh ame dingu ahi.

⁹Asela naneh loudiu, chule twija kihon jong naneh lou dingu, amavang alu jong akeng jong chule asung jouse puma meija nasahmin tho dingu ahi.

¹⁰Chule nanghon jingkah geija khatcha nakoilou dingu ahi; jingkah geija anaumden tapouchu meija nagovam dingu ahi.

¹¹Chule hitia hi naneh dingu ahi; tai kigah pum le kengchot kise pum, chule nakhut uva natenggolu kichoi puma kinotah-a naneh dingu ahi: hichehi Pakai kalchuh ahi.

¹²Ajehchu tujan tengle keiman Egypt gamsung kahin jotpa ding, Egypt gamsunga mihem le gancha apeng masa jouse kathagam ding; chule Egypt pathen jouse chunga jong thutanna kalhunsah ding ahi: keima Pakai chu kahi.

¹³Chule thisan chu nangho dinga na-umnao inho chunga melchih na-a pangding; chule thisan chu kamu teng, nangho chu kakalchuh ding; Egypt gam kahin got teng, hise chu nangho sumang dinga nachung uva chulou ding ahi.

¹⁴ Chule hiche nikho hi nangho dinga hetjingna hiding; chule nanghon hichehi nakhang lhumkei uva Pakaiya dinga kutna nanit dingu; nanghon hiche kut hi a-itih-a chonna dan kisuna nanit dingu ahi.

¹⁵Nanghon ni sagi cholsolou changlhah naneh diu; ni masa ni-a patna na-in houva kona chol nakoidoh diu ahi. Ajehchu koihile nimasa ni-a patna ni sagi changeija chola kisem changlhah netapou chu, hiche mipa chu Israel lah-a kona paidoh-a umding ahi.

¹⁶Chule nimasani chule nangho dinga kikhoppi theng umding; chule ani sagi ni jongleh kikhoppi theng umkit ding ahi; chule hiche nikho ho-a chu natoh imacha natohlou dingu; amitinin anehsohkei dingu ahin, nehding bou chu nakibol thei dingu ahi.

¹⁷Chule nanghon cholsolou changlhah kut chu nanit dingu ahi; ajehchu chuche nilele-a chu nagalsat hou Egypt gama kona kapuidoh ahiuve. Hijeh-a chu hiche nikho hi a-itih-a akhang akhanga chonna dan kisuna nanit dingu ahi.

¹⁸Nanghon lha masapen chuche lha nisomle nili nilhah-a pat, chuche lha mama nisomni le nikhat nilhah changeija cholsolou changlhah naneh dingu ahi.

¹⁹Ni sagi sunga chu chol him him na-inhouva kimulouhel ding ahi: ajehchu koi hijongle chol kiso netapou chu, maljin hihen, gamsunga peng hijongle, chutobang michu Israel mipi kikhomho lah-a kona paidoh-a umding ahi.

²⁰Chol kiso tapou imacha nanehlou dingu ahi; nachenna mun jouseuva cholsolou changlhah bou naneh dingu ahi, ati.

²¹Chujouvin Mosi'n Israel upaho jouse akouvin, ajah uva, Kelngoinou chu kikaijun lang, na insungmi cheh-u dungjuijin kalchuh sa chu that taovin.

²²Chule nanghon hyssop bohkhat nalah uva, lheng sunga um thisan lah-a chu nadelut dingu, chuche lheng sunga um thisana chu kotbeng teni le kotchungjol chu nanu dingu: chule jingkah ahunghi kahse-a koimacha a-inkot khah-a kona potdoh louding ahi.

²³ Ajehchu Egypt mite sugam dinga Pakaiyin ahin jotpa ding ahin; chule aman kotchin teni le kotchungvuma thisan chu amutengle, Pakaiyin hiche kot chu akalchuh ding, nangho sugam dinga suhmangna chu na-insungu ahin lutsah louding ahi.

²⁴Chule hiche thil hi nangho le nachapa teovin a-itih-a chonna danna nanit jing dingu ahi.

²⁵Chule hung hitiding ahi, athutep banga Pakaiyin napeh dingu gamsung chu nalhun phat tengu jongle, hiche natoh hi nanit jomjing dingu ahi.

²⁶Chule hung hitiding ahi, nachateovin naheng uva, Hiche natoh hi ipi vetsahna ham? ati phat tengule;

²⁷Nanghon, Aman Egypt mite asuhgama eiho eihuhdoh laijuva, Egypt gama Israel chate inho kalchuhpa Pakai kalchuh ganlhaina chu ahi nati dingu ahi, ati. Chuin mipi chu akunun Pathen ahou taovin ahi.

²⁸Chuin Israel chate chu achemangun, Pakaiyin Mosi le Aaron athupeh bangchun aboltaove.

²⁹ Chuin ahitin ahi, Pakaiyin khangkimin alaltouna-a tou Pharaoh cha masapena pat gal hing kikaija songkul'a kihen cha masapen geijin, Egypt gamsunga apeng masapen jouse athat gamin; chule gancha masapen ho jouse jong athat gam tan ahi.

³⁰Chuin Pharaoh chu jan-in athouvin, asohho jouse le Egypt mite jouse chu athoudoh uvin; chule Egypt gama chun kana nasatah aumtan ahi; ajehchu mithi louna in khatcha jong umlou ahi.

³¹Chuin aman jan-in Mosi le Aaron chu akouvin, aheng lhona, Kipatdoh-un, nangni le Israel chate chu kamite-a konin chedoh taovin; chule cheovin lang nasei bangin Pakai chu gajen taovin.

³²Chule naseilhon bangin nabonghou le nagancha hou jouse jong kipuijun lang chetaovin; chule keijong phatthei neiboh-un, ati.

³³Chuin Egypt mite chun chuche miho chu gamsunga kona gangtah-a soldoh loina ding chun akinotaove; ajehchu amahon, Eiho mithi ihisoh diu ahitai, atiuve.

³⁴Chuin miho chun achangbong amehsao chu chol kiso masangin akichoijun, achanglhah mehnao kongho pona kijel chu alengkou uva akiput taovin ahi.

³⁵ Chule Israel chate chun Mosi seibang chun abolun; amahon Egypt mite-a konin sana le dangka-a kisem kijepnaho le vonho chu akithumun ahi.

³⁶Chuin Pakaiyin Israel mite chu Egypt mite mitmun khotona amusah-in, hiti chun amahon athum chanu chu apeuvin ahi. Chutichun amahon Egypt mite chu achom gamun ahi.

³⁷Chuin Israel chate chu Rameses'a konin Succoth lama ajin taovin, amaho chu nunao chapang simlouvin, kenga lamjot cheh pasal sangjagup ahiuve.

³⁸Chule choplop mihonpi chu amaho toh achetou khomun; chule kelngoihon, bonghon, chule gancha tamtah toh alhon khomun ahi.

³⁹Chule amahon Egypt gama kona ahinkipoh-u changbong mehsa-a chun cholsolou changlhah akangun ahi, ajehchu chol kiso louva ahi; ijeh inem itile Egypt gama kona asotdoh tho jengu ahijeh-a, amaho akhongai sot thei louvu, nehding imacha akigotman louvu ahi.

⁴⁰ Tun Egypt gama cheng Israel chate akhopemnao phatsung chu kum jali le kum somthum ahi.

⁴¹Chuin kum jali le kum somthum kichaijin ahitin ahi, chuche nile le chun ahitin ahi, Pakai janel jouse chu Egypt gama konin apotdoh taovin ahi.

⁴²Hiche hi Egypt gama kona ahinpuidoh jeh uva Pakai geldohna dinga anitdiu jan chu ahi. Hiche hi Israel chate jousen akhanguva anitdiu Pakai jan chu ahi.

⁴³Chuin Pakaiyin Mosi le Aaron henga, Kalchuh kut kiman dingdan chu hichehi ahi; maljin koimachan hichu aneh louding ahi:

⁴⁴Ahin suma kicho soh vangchu, nangman achep natanjou tengle, hichu aneh theiding ahi.

⁴⁵Gamchom mi le soh sum thalo vang chun hichu aneh theilou ding ahi.

⁴⁶ Hichu inkhat sunga nehding ahin; nanghon aphe khatjeng jong inpolama nachoidoh lou dingu; chule agujong nasuhboh lou dingu ahi.

⁴⁷Israel mipi ho chun hiche hi anit dingu ahi.

⁴⁸Maljin khat nakoma pema auma, Pakai dinga kalchuh kut anit dinga ahile, apasal jousen chep tanu henlang, chujou tengle hinnai hen, chule hichu nit hen; chutengle ama chuche gama penga mikhat tobang hiding ahi. Ajehchu chep tanlou tapou chun hichu anehlou dingu ahi.

⁴⁹Agam sunga peng hihen, nalah uva hung khopem gamdangmi hijongle, dan khat bou hiding ahi, ati.

⁵⁰Chutichun Israel chate jousen abol taovin; Pakaiyin Mosi le Aaron athupeh bangchun abol taovin ahi.

⁵¹Chuin chuche nilele chun ahitin ahi, Pakaiyin Israel chate chu aloi loijin Egypt gama konin apuidohtan ahi.