Read Thado Chin Potdohbu 13 Bible Online

Potdohbu 13 - Thado Chin bible

Potdohbu 13

¹Chuin Pakaiyin Mosi henga thu aseijin, hitin ati,

² Israel chate lah-a naobu hinphukeh-a apeng masa jouse chu mihem hihen gancha hijongle kahenga thenso soh keijun: hichu keija ahi, ati.

³Chuin Mosi'n mipi ho henga aseijin, Nanghon Egypt gamsung sohchana in'a kona nahungdoh nao hiche nikhohi hejingun; ajeh chu Pakaiyin khut thahatna hiche mun'a kona chu nahin puidoh-u ahi. Chol kiso changlhah naneh loudingu ahi.

⁴Abib lha hiche nikho-a hi nahung potdoh-u ahi.

⁵Chule Pakaiyin Canaan miho, Hit miho, Amon miho, Hiv miho, chule Jebus miho gam, napu napateu pehdinga akihahselna khoiju le bangnoi lona gama chu napuilut phat tengule, hiche lha ngeija hi hiche kin kibol hi nanit jing dingu ahi.

⁶Nisagi cholsolou changlhah naneh dingu, chule ani sagi ni chu Pakaiya dinga kut hiding ahi.

⁷Nisagi chol solou changlhah nehding ahin; nakom him himuva chol kiso changlhah kimulou ding, nachennao mun jouse vellah-a jong chol him him kimulou ding ahi.

⁸Chule chuche nikho chule nachapa nahetsah-a, ajah-a, Egypt gama kona kahung potdoh-a Pakaiyin kachunga anatohho jeh-a hichehi kibola ahi, tia naseipeh ding ahi.

⁹Chule Pakai danthu chu nakama aumtheina dinga, hiche hi nakhut chunga melchihna hiding, chule namit teni kikah-a hetjingna hiding ahi. Ajehchu Pakaiyin khut thahat tah-a Egypt gama kona napuidoh ahi.

¹⁰Hijeh chun kumseh le hiche dan kisem hi aphatseh-a nanit jingding ahi.

¹¹Chule napu napate le nangma henga ana kihahselna banga, Pakaiyin Canaan miho gama napuilutna, hiche gam chu napeh tengle hitiding ahi,

¹² Nangman naobu hinphukeh masa jouse le nagancha apeng masa chengse chu Pakai dinga nachom khen ding ahi; pasal ho chu Pakaiya ding ahi.

¹³Chule sangan asoh masa chengse chu kelngoinouva nalhatdoh ding; nalhatdoh louding ahile angong chu naheboh ding ahi. Nachate lah-a apeng masapen pasal jouse chu nalhatdoh ding ahi.

¹⁴Chule hitiding ahi, phat ahung lhung ding ho-a chu nachapan, Hichehi ipi tina ham? tia nahindoh tengle, nangman ahenga, Pakaiyin akhut thahat chun Egypt gam sohchana in'a kona eina lhatdoh ahi:

¹⁵Chule ahitin ahi, Pharaoh chun eisoldoh nomlou phatnun, Pakaiyin Egypt gama mihem le gancha apeng masa jouse chu atha gam jeh-a keiman naobu hinphukeh-a apeng masa pasal jouse chu Pakai koma kalhandoh ahi; ahivangin kachate lah-a apeng masa jouse chu kalhatdoh-in ahi.

¹⁶Chule hiche hi nakhut chunga melchihna le namit teni kikah-a hetjingna hiding ahi: ajehchu khut thahatna Pakaiyin Egypt gama kona eipuidoh-u ahi, nati ding ahi, ati.

¹⁷Chuin ahitin ahi, Pharaoh'in mipi ho chu asoldoh phatnin, alampi chu anai vangin Pathen'in Philistine mite gam jotna lampia chun amaho apuipon ahi: ajehchu Pathen'in, Achuti loule mipi ho chun galkisat amutengule kisih untin, Egypt lama kilekit getnunte, ati ahi.

¹⁸Ahin Pathen'in mipi chu twipi san jotna gamthip lampia chun apuijin;chule Israel chate chu Egypt gama kon chun galsat dinga kigosan akitol tou taovin ahi.

¹⁹ Chuin Mosi'n Joseph guho chu apon ahi: ajehchu aman Israel chate chu ana kihahsel sah-a, ajah uva, Pathen'in nangho thonlouva nahungvil dingu ahin; chule nanghon kagu hi hikoma kona napohtou dingu ahi, anati ahi.

²⁰Chuin amaho Succoth'a konin akipat doh-un, gamthip chin Etham'a agebuh-u asongun ahi.

²¹Chuin sun le jana achetheina diuvin Pakai chu sun le meibang khompin amasanguva achen, chule jan le meikong khompin amaho chu vah pedingin amasanguva achepeh-in ahi.

²²Hitichun sun na meibang khompi le jana meikong khompi chu mipi ho masanga konchun alamangpon ahi.