Read Thado Chin Potdohbu 14 Bible Online

Potdohbu 14 - Thado Chin bible

Potdohbu 14

¹Chuin Pakaiyin Mosi henga thu aseijin, hitin ati,

²Israel chate henga, amaho kiheijuva Baal-zephon maijona um Migdol le twikhanglen kah-a Pi-hahiroth mun'a gebuh akison nadiuvin seipeh-in: hiche masanga chu twikhanglen panga gebuh nason dingu ahi.

³Ajehchu Pharaoh'in Israel chate thudola, Amaho gamsunga chun a-ohden taovin, gamthip chun amaho akhakhum den ahitaove, atiding ahi.

⁴Chule keiman Pharaoh lungsung chu kasuh tah ding, aman amaho ahin nungdel ding ahin; chule Egypt miten keima Pakai kahi ahetna dinguva, keima Pharaoh le asepaiho jouse chunga jabola kaum ding ahi. Chuin amahon hiti chun abol taovin ahi.

⁵Chuin Egypt lengpa henga mipi chu ajam taove ti aseipeh taovin ahi. Chuin Pharaoh le asohte lungsung chu mipi ho douna chun akiheitan, chule amahon, Ipi dinga hiche hi inaboluva, eiho eijen naova kona Israel chu isoldoh-u hitam? atiuve.

⁶Chuin aman asakol kangtalai chu akigotnin, amite chu akipuijin ahi.

⁷Chuin aman lhentum sakol kangtalai jagup le Egypt sakol kangtalai jouse, chule khatcheh chunga sepai lamkaiho chu akipuijin ahi.

⁸Chuin Pakaiyin Egypt lengpa Pharaoh lungsung chu atahsahtan, aman Israel chate chu anungdel tai; chule Israel chate chu hangtah-a chedoh-a ahitaove.

⁹Ahivangin Egypt mite chun Pharaoh sakol kangtalai ho le sakol jouse, asakol chung tou miho, chule asepaihon chutoh amaho chu anungdel taovin, chuin amaho chu Baal-zephon phah masang Pi-hahiroth kom, twikhanglen panga agebuh ason naova chun apha taovin ahi.

¹⁰Chuin Pharaoh ahung nai phatnin, Israel chate akhodah uvin ahile, veuvin, Egypt mite chu anunguva ahung kijot jot jenguvin; chuin amaho akicha talheh jengun ahi. Chuin Israel chate chu Pakai henga atao taovin ahi.

¹¹Chuin amahon Mosi henga, Egypt gama lhankhuh umlou hija gamthipma thidinga neipuidoh-u ham? Nangman ibola Egypt gama kona neipuidoh uva, hitia hi neibolu ham?

¹²Egypt mite kajen theina diuvin neilimsah hih-un tia Egypt gama kanaseiju chu hiche thuhi hilou ham? ajehchu gamthipma kathigam sang uva Egypt mite kajenu chu keiho dinga phajo ahi, atiuve.

¹³Chuin Mosi'n mipi henga, Nangho kicha hih-un, ding thimbeh-un lang, Aman nangho tunia namusah dingu Pakai mi huhhingna chu veuvin: ajehchu tunia namu-u Egypt mite hi a-imatih chana avela namu kitlou dingu ahitai.

¹⁴Pakaiyin nangho dinga gal asatding, chule nangho na-umthim beh dingu ahi, ati.

¹⁵Chuin Pakaiyin Mosi henga, Ipi dinga kahenga naka uham? Israel chate chu amalamuva ache nadiuvin ahenguva seipeh-in.

¹⁶Ahin nangman natenggol chu domsangin lang, twikhanglen chunga chun nakhut jahdoh-in, hichu hom khenin: chule Israel chaten tolgoa twikhanglen lailung chu ajotdingu ahi.

¹⁷Chule keima, ven, keimatah-in Egypt mite lungsung kasuhtah ding, chule amahon amaho nung chu ajui dingu ahi. Chule Pharaoh le ajanelho jouse, asakol kangtalai ho, chule asakol chunga tou miho chunga keiman jabolna kamuding ahi.

¹⁸Chule Pharaoh chung le asakol kangtalai chung, chule asakol chungtou miho chunga jabola kaum tengle, Egypt miten keima Pakai kahi chu ahet dingu ahi, ati.

¹⁹Chuin Israel gebuh masanga che Pathen vantil chu akichonin, anunguva achen; chule meilhang khompi chu amasanguva kon chun akichonin, anunguva adingtan ahi.

²⁰Chuin hichu Israel miho gebuh le Egypt miho gebuh kikah-a chun ahungin; hichu amaho ding chun meilhang le muthim ahin, khat ho ding vang chun janle vah apen ahi. Chutichun jankhovah keijin khatnin khat chu anailutpon ahi.

²¹Chuin Mosi'n twipi chunga chun akhut ajahdoh tan ahi; chuin Pakaiyin hiche jan chun solam hui hattah mangchan twipi chu alelon sah-in, twipi chu tolgo asosahtan, twiho chu akikhentan ahi.

²² Chuin Israel chate chu twipi lailung tolgoa chun alut taovin; chule twiho chu jetle veija bang bangin akisungin ahi.

²³Chuin Egypt miho chun anung delun, Pharaoh sakol ho, akangtalai ho, asakol chunga tou miho jouse chu amaho nunga chun twipi lailunga chun alut taovin ahi.

²⁴Chuin ahitin ahi, jingkah ahiphatnin Pakaiyin Egypt mite chu meilhang le meikong khompia konin ahinven, Egypt mite janel chu asunohphah tan,

²⁵Asakol kangtalaiju kangho chu alahdoh peh-in ahile amahon gihsatah in atolun ahi. Hijeh chun Egypt miten, Eiho Israel maikoh-a konhin jamtao hite; ajehchu Pakaiyin amaho dinga Egypt mitehi asat ahitai, atiuvin ahi.

²⁶Chuin Pakaiyin Mosi henga, Egypt mite sakol ho, akangtalaihou, chule asakol chunga touhou chunga twiho chu ahung lonkhom kitna dingin, twipi chunga chun nakhut jahdoh-in, ati.

²⁷Chuin Mosi'n twipi chunga chun akhut ajahdoh-in ahile, jingkah ahunghi phatnin twipi chu angaija alonhat bangin ahunglong kit tai; chuin Egypt hiche lama chun ajamun; Pakaiyin Egypt mite chu twipi lailunga chun alehlut gamtan ahi.

²⁸Chuin twiho chu ahung long gom kitnin, sakol ho, kangtalai ho, sakol chunga touho, chule amaho hin nungdel twipi sunga lut ho Pharaoh janelho jouse chu achuptan; khatcha jong asohcha aum pouvin ahi.

²⁹Ahivangin Israel chaten twipi lailunga chun tolgo laija lam ajotnun; chule twiho chu amaho dingin ajetlam le aveilam uva bang bangin akisungin ahi.

³⁰Chutichun Pakaiyin chuche nikho chun Israel chate chu Egypt mite khutna konin ahuhhingtan; chule twipanga konin Israelte chun Egypt mite athiu chu amuvin ahi.

³¹Chuin Israel ten Egypt mite chunga Pakai natoh loupi chu amutaovin ahi: chule mipichun Pakai chu aging taovin, Pakai le asoh Mosi chu atahsan taove.