Read Thado Chin Potdohbu 15 Bible Online

Potdohbu 15 - Thado Chin bible

Potdohbu 15

¹ Chujouvin Mosi le Israel chate chun Pakai henga hiche la hi asaovin, hitihin aseijuve: Loupitah-a gal ajotah jeh-in, keiman Pakai henga la sange; aman sakol le achunga toupa chu twipi sunga alehlut tai.

² Pakai chu kahatna le ka la ahin, chule eihuhinga jong ahung hitai. Ama ka Pathen ahin, keiman ama kavahchoi ding; Ama kapa Pathen ahin, keiman kachoi sang ding ahi.

³Pakai chu gal hatmi ahi. Pakai chu amin ahi.

⁴Pharaoh sakol kangtalai ho le asepai janel chu aman twipi sunga alehlutnin; asepai lamkai lhenchom ho jongchu twipi sana alhalut gam tan ahi.

⁵Twi thuh-in achupsoh taovin; twi thuhtah noija chun song bangin alhalut taove.

⁶Vo Pakai nakhut jetlam chu thanei na-in aloupin: vo Pakai nakhut jetlam chun melma chu asuchip tan ahi.

⁷Naletna chungnunga chun nangma douna-a kipanho chu najoutan; nalunghanna chu nahin soldoh-in, amaho chu changpol bangin akavam taovin ahi.

⁸Nanah hai chun twiho chu akhom khomin, twisoh chu alhuh-in adingden tan, chule twithuh chu twipi lailunga adingchah dentan ahi.

⁹Melma chun, Keiman kanungdel ding, kaphah pa-a thil kichomdohho chu kahop khending; kangaichat chu achunguva kasuh bulhit ding; kachemjam kasa doh-a, kakhutnin amaho asuhmang ding ahi, ati.

¹⁰Nangman nahui chun namutnin ahile, twipi chun amaho chu akhukhum tan: twi thuh sunga chun amaho chu ngen bangin alhalut taovin ahi.

¹¹Vo Pakai, pathen ho lah-a hi nangma tobang koi umam? nangma tobanga thenna-a loupi, pachat naho-a gin um, chule thil kidang ho bolla koi umam?

¹²Nangman nakhut jetlam najah doh-in, leisetnin amaho chu aval lhumtai.

¹³Nangman nami hepina-in nalhatdohsa namite chu napui doh-in, nangman nathahatna-in amaho chu nachenna munthenga chun napui lhungtan ahi.

¹⁴Mipi chun jaovintin, chule kichadiu: Philistine mite chenna munchu lungkham na-a dimding ahi.

¹⁵Chuteng Edom lenghon hichu kidang asahdiu; Moab mihat ho chu kihot hotdiu; Canaan gama cheng ho jouse chu junmang diu ahi.

¹⁶Nangman nachohdohsa namite chu agalkai kahseovin, Vo Pakai, namite chu agalkai kahseuva kichat le tijat na chu amaho chunga chuding; naban thahat nasatah-a chu amaho song banga umthimbeh dingu ahi.

¹⁷Vo Pakai nangman nachenna dinga nasemna mun, Vo Pakai nakhut tah-a naphudet muntheng, nagoulo molsanga chu amaho chu napuilutna nachensah ding ahi.

¹⁸Pakaiyin atonsot atonsotna lengvai apohding ahi.

¹⁹Ajehchu Pharaoh sakol ho, akangtalai ho leh, asakol chunga touho toh twipi sunga alutnuvin, chuin Pakaiyin twipi chu achunguva alonsah kittan ahi; ahivangin Israel chate chu twipi lailung tolgo chunga chun acheuvin ahi.

²⁰Chuin Aaron sopinu Miriam themgaonu chun akhutna thih khutbeh khat akilah-in; chule numei jouse chun thih khutbeh choipum le lampumin anung ajuijun ahi.

²¹Chuin Miriam'in amaho chu adonbutnin, Nanghon Pakai henga la saovin, ajehchu aman loupitah-a gal ajou tan ahi; aman sakol le achunga toupa chu twipi sunga aleh lutan ahi, ati.

²²Chuti chun Mosi'n Israel chu twipi sana konchun ahin puijin, Shur gamthipma alut taovin ahi; chuin amaho gamthipma chun nithum acheuvin ahile twi amu tapouvin ahi.

²³Chuin Marah ahung lhun phatnun, Marah mun'a twiho chu akhat jeh-in adonthei tapouvin ahi. Hiche jeh-a chu hiche mun chu Marah kisah-a ahi.

²⁴Chuin mipi ho chu Mosi chunga aphun taovin, Ipi kadondiu ham? atiuvin ahi.

²⁵Chuin ama Pakai henga akaptan ahileh, Pakaiyin thingphung khat amusah-in, hichu twiho lah-a chun akholutnin ahile, twiho chu atwi tan ahi. Chua chun aman amaho dingin chonadan le thupeh asemin, chule chuachun amaho chu apatepmin,

²⁶Ajah uva, Nanghon Pakai na Pathen'u aw hi chingthei tah-a nangai uva, amitmu-a adih chu nabol uva, chule achondan thu jouse nanit uva ahile, keiman Egypt mite chunga kachuhsah hiche natho hi khatcha jong nachung uva kachuhsah louding ahi; ajehchu keima nangma damsah-a Pakai chu kahi ati. [1]

²⁷Chuin amaho Elim ahung lhungun, chukoma chun twikhuh somleni le lusuphung somsagi aumin ahi. Chuin amahon twipanga chun gebuh asongun ahi.