Read Thado Chin Potdohbu 16 Bible Online

Potdohbu 16 - Thado Chin bible

Potdohbu 16

¹Chuin amaho Elim'a konin akholjin kitnun, Egypt gam adalhahnao lhanina ni somle ninga ni tah chun Israel chate mipi kikhomho jouse chu Sinai le Elim kikah-a um Sin gamthip ahunglhung taovin ahi.

²Chuin gamthipma chun Israel chate mipi kikhomho jouse chu Mosi le Aaron dounan aphun taovin;

³Israel chate chun aheng lhona, Pathen'in Egypt gama sabel ho koma katou uva, nengtah-a changlhah kaneh laijuva Pakai khutna eina thisah joh-u hitavele; ajehchu nangnin hichea mipi ho hi kella thisah dinga hiche gamthipma hi neihin puilutnu ahi, atiuvin ahi.

⁴ Hichun Pakaiyin Mosi henga, Ven, keiman nangho dinga van'a kona changlhah kahinjuhsah ding ahin; amaho kadan thua achonuleh achonlouvu kapatep theina dinga, mipi ho chu potdoh uva niseh-a anehkham cheh diu aga kilokhom dingu ahi.

⁵Chule hung hiti ding ahi, anigup nile ahin lokhom hou chu akigontup dingu; hichu niseh-a alokhomu jatni hiding ahi, ati.

⁶Chuin Mosi le Aaron'in Israel chate jouse henga, Nilhah tengleh Egypt gama kona nahinpui doh uva chu Pakai ahi nahet dingu:

⁷Chule jingkah tengleh Pakai loupi namu dingu ahi; ajehchu Pakai douna-a naphunchel nao chu aman ajatai: keini ipi kahi lhona keini chunga naphunu ham? atilhone.

⁸Chuin Mosi'n, Hiche hi nilhah teng Pakaiyin nanehdiu sa napeh uva, jingkah teng changlhah nengtah-a napeh tengule namu dingu ahi; ajehchu Pakaiyin naphun nao, ama douna-a naphun chelnao chu ajatan ahi. Keini koi kahilhon ham? keini douna-a phun nahipouvin, Pakai douna-a phun nahijo bouvui, ati.

⁹Chuin Mosi'n Aaron henga, Israel chate mipi kikhomho henga, Pakai angsunghi hinaijun; ajehchu aman naphun nahou chu ajatai, tin seipeh-in ati.

¹⁰Chuin ahitin ahi, Aaron'in Israel chate mipi kikhomho henga thu aseipat patnin, amahon gamthiplam chu aveovin ahile, veuvin, Pakai loupi nachu meilhang lah-a ahung kilah-in ahi.

¹¹Chuin Pakaiyin Mosi henga thu aseijin, hitin ati,

¹²Israel chate phunchel nachu keiman kajatan ahi. Amaho henga chun, Nilhah teng sa naneh dingu, chule jingkah tengle changlhah-a navaset dingu; chutengle keima Pakai na-Pathen'u kahi nahet dingu ahi, tin seijin, ati.

¹³Chuin ahitin ahi, nilhah-in vengkeho chu ahungdoh-un, agebuh uchu atomchah tan ahi. Chule jingkah-in janelho kimvela chun daitwi analhan ahi.

¹⁴Chuin daitwi lha chu ahul phatnin, veuvin, gamthip tol chunga chun thil lumpilpel neocha cha, buhbang neocha cha tobangin amuvin ahi.

¹⁵ Chuin Israel chate chun hichu amuphatnun khatle khat akihouvun, Hiche hi manna ahi atiuve: ajehchu ipi ahi ahetlouvu ahi. Chuin Mosi'n ahenguva, Hichehi Pakaiyin naneh dinguva napeh-u changlhah chu ahi.

¹⁶Hiche thil hi Pakaiyin ana thupeh chu ahi: Mitinin ama nehkhop cheh, na-insung mijat dungjuijun mikhat cheh-a dingin omer khatcheh; amitakipmin aponbuh sunga umho jouse-a dingin kilokhom cheh hen, ati.

¹⁷Chuin Israel chaten hitichun abolun, abangin atamjep chule abangin alhomjep akilo khomun ahi.

¹⁸ Chuin amahon omer-a ate phatnun, atam lodoh panjong imacha amoh aneipon, chule alhom lodoh pajong chu alhinglel dehpon; amitinin anehkhop cheh ding akilo khomun ahi.

¹⁹Chuin Mosi'n, Koimachan jingkah changeijin khenhih hen, ati.

²⁰Ahivangin amahon Mosi thusei chu angaipouvin; alah uva mi phabepmin jingkah geija dingin akhenun, ahin hichu ana thanin, a-uitan ahi. Chuin Mosi achunguva alunghang tan ahi.

²¹Chuti chun jingkah seh le amitakipmin anehkhop cheh ding akilokhom jiuvin; nisa ahung sat tengleh hichu ajunmang jitan ahi.

²²Chuin ahitin ahi, anigup ni chule changlhah chu ajatni, mikhat dingin omer nicheh alohkhom jiuvin ahi. Chuin mipi kikhom vaipoho jouse chu ahungun, Mosi ahung hetsah taovin ahi.

²³ Chuin aman amaho henga chun, Hiche hi Pakaiyin asei chu ahi, Jingkhu Pakaiya dinga kicholdo ni cholngah nitheng ahi. Nahon dingu chu tunin honunlang, nakan dingu chu kanguvin, chua amoh umchu jingkah lama dingin kikoijun, ati.

²⁴Chuin Mosi'n aseibang chun jingkah changei chun akoijuvin ahile, hichu anengpon, thanjong athan pon ahi.

²⁵Chuin Mosi'n, Hichu tunin neovin; ajehchu tuni hi Pakaiya dinga cholngah ni ahi: tunia hichu loujaova namu lou dingu ahi.

²⁶Hichu nigup sunga nalokhom dingu; ajing nisagi ni chu cholngah ni ahin, chuche nikho chule khatcha jong umlou ding ahi, ati.

²⁷Chuin ahitin ahi, mi phabep nisagi ni chun aloh khomdin apotdoh un, ahin khatcha amupouve.

²⁸Chuin Pakaiyin Mosi henga, Kathupeh ho le kadan thuho hi itihchan nitnom louva naum dingu ham?

²⁹Veovin, Pakaiyin cholngah ni napeh jeh uvin, nigup chan nileh nini-a ding changlhah napeh-u ahi; amitakip namun cheh-a umun lang, nisagi nileh aumna mun'a konin koimacha potdoh hihhen, ati.

³⁰Chutichun mipi chu nisagi nin acholdo taovin ahi.

³¹ Chuin Israel insung chun hichu amin manna asah-un ahi. Hichu pathikhom mu tobanga bangleh ahin, atuidan chu khoijutoh kihala kisem changlhah tobang ahi.

³²Chuin Mosi'n, Hiche thilhi Pakai thupeh chu ahi, Egypt gama kona kapuidoh laijuva gamthipma kavahnao changlhah chu amutheina diuvin; nakhang khanguva umjing dingin omer dimkhat koijun, ati.

³³ Chuin Mosi'n Aaron henga, Bel khat lan lang asunga chun manna omer dimkhat koijin; hichu nakhang khanguva umjing dingin Pakai angsunga koijin, ati.

³⁴Chuin Pakaiyin Mosi thu apehbang chun chin jing dingin hettohsahna angsunga chun akoitan ahi.

³⁵ Hitichun Israel chaten alo dingu gamsung ahung lhun kahseovin, kum somli sung chun manna chu aneovin; Canaan gam gamgiho ahunglhun kahseovin manna chu aneuvin ahi.

³⁶Tun omer khat chu ephah hop soma hopkhat ahi.