Read Thado Chin Potdohbu 17 Bible Online

Potdohbu 17 - Thado Chin bible

Potdohbu 17

¹Chuin Israel chate kikhom khom pumpi chu Sin gamthipma konchun akipatdoh kitnun, Pakai thupeh dungjuijin Rephidim'a chun gebuh asongun ahi. Chuin chukoma chun mipi ho donding twi aumtapon ahi.

²Hijeh chun mipi chun Mosi akinah piuvin ajah-a, Kadon dinguvin twi neipeovin atiuvin ahi. Chuin Mosi'n ahenguva, Ipi dinga kei neiki nahpiu ham? Ipi dinga Pakai chu napatep uham? ati.

³Chumuna chun mipi chu twi ngaichan adangchah taovin; chule mipichu Mosi chunga chun aphun uvin, ajah-a, Ipi dinga keiho le kachateu chule kagancha hou hi dangchah-a thigamsah dinga Egypt gama kona neipuidoh-u ham? atiuvin ahi.

⁴Chuin Mosi Pakai henga akapmin, Hiche mipi hohi i-kaloding hitam? amahon keima songa selih ding eigo taove, ati.

⁵Chuin Pakaiyin Mosi henga, Mipi masanga chun chen, chule Israel upaho chu kipuijin; chule vadung navohna tenggol chu nakhutna kichoijin lang, chen.

⁶Ven, keima namasanga um Horeb songpi chunga khu kadin ding; chule nangman songpi chu navoh ding, hichea kona chu twi hungput doh-a, hichu mipin adonthei dingu ahi, ati. Hitichun Mosi'n Israel upaho mitmu tahchun hitichun aboltan ahi.

⁷Israel chaten Mosi akinahpi jeh-u le Pakai chu ilah uva umam umhih-em, tia Pakai chu apatep jeh uvin, aman chuche mun chu Massah le Meribah asah tan ahi.

⁸Chujouvin Amalek mite chu ahungun, Rephidim mun'a chun Israelte chu ahungsat taovin ahi.

⁹Chuin Mosi'n Joshua jah-a, Ilah uva mi lhengdoh-in, chule cheovinlang Amalek mite khu gakisat piuvin: jingtengle kakhutna Pathen tenggol choipuma lhang chungvuma kadin ding ahi, ati.

¹⁰Chutichun Mosi'n ahenga aseibang chun Joshua'n abolin, Amalek mite akisatpi taovin: chuin Mosi, Aaron le Hur chu lhangvuma chun akaltou taovin ahi.

¹¹Chuin ahitin ahi, Mosi'n akhut adopsang phatle Israelte chun ajou jiuvin; aman akhut adoplhah phat phatle Amalek mite chun ajou jiuvin ahi.

¹²Ahin Mosi khut chu ahung khamtan; chuin amanin song alalhonin, anoija akoilhonin, ama achunga atouvin; chule Aaron le Hur chu asih langkhat gela apang lhonin, akhut teni chu adomsang jing lhonin; chutichun akhut chu nisalhum kahsen det tah-in apang tan ahi.

¹³Chutah chun Joshua'n Amalek le amite chu chemjamin ajoutan ahi.

¹⁴ Chuin Pakaiyin Mosi henga, Hichehi hetjinga aumna dingin lekhabua suninlang, Joshua nabenga jong jahsah kitnin; ajehchu keiman vannoi'a hi Amalek het jingna chu kasuh manghel ding ahi, ati.

¹⁵Chuin Mosi'n maicham khat asemin, hichu Jehovah-nissi [2] asah-in ahi.

¹⁶Ijeh inem itile aman, Ajehchu Pakaiyin akhang khanga Amalek douna-a gal asatding ahi tin Pakai akihahselin ahi, ati.