Read Thado Chin Potdohbu 18 Bible Online

Potdohbu 18 - Thado Chin bible

Potdohbu 18

¹Chuin Mosi nupapa Midian gam thempu Jethro'n Pathen'in Mosi le ami Israelte athil bolpeh jouse le Egypt gama kona Pakaiyin Israel ahin puidoh chu ajah phatnin;

² Mosi nupapa Jethro chun Mosi'n anungsol kit inneipi Zipporah chu apuijin;

³ Chule achapa teni, khatpa min chu Gershom ahi; ajehchu aman, Hetlouna gama maljin kahi, ati:

⁴Chule khatjopa min chu Eliazar ahi; ajehchu aman, Kapa Pathen chu eikithopia ahin, Pharaoh chemjam'a konin eihuhdoh-e, ati:

⁵Chuin Mosi nupapa Jethro'n Mosi achapa teni le a-inneipi ahinpuijin, gamthip Pathen molsang mun'a agebuh sahna mun'a chun ahenga ahungun ahi.

⁶Chuin aman Mosi jah-a, Keima nanupapa Jethro, na-inneipi toh achapa teni toh kahunguve, ati.

⁷Chuin Mosi anupapa lamto dingin apotdoh-in, jana apen, achopmin; chule amani khatle khat aumchan akidongto lhonin; pon insunga ahunglut lhontan ahi.

⁸Chuin Mosi'n anupapa Jethro henga Pakaiyin Israelte akhohsahna jala Pharaoh le Egypt miho chunga athilbol jouse, lamdunga achunguva gentheina hungchu ho jouse, chuleh Pakaiyin amaho alhatdoh jeo chu aseipehtan ahi.

⁹Chuin Pakaiyin Israel chu Egypt mite khutna kona ahin huhdoh-a, achunga athilpha abol hojouse jehchun Jethro akipah lheh jengin ahi.

¹⁰Chuin Jethro'n, Egypt mite khutna kon le Pharaoh khutna kona nahuhdohpa, Egypt mite khutnoija kona mipi ho chu huhdohpa Pakai chu nunnom hen.

¹¹Tun Pakai chu pathen jouse sangin aloupi joi ti kahetai; ajehchu amahon kiletsah tah-a thil abolnao jenga jong chun, amachu amaho sangin achung nungjon ahi, ati.

¹²Chuin Mosi nupapa Jethro'n govam thilto alan Pathen'a dingin ganlhaina abolin ahi. Chuin Aaron le Israel upa ho jouse chu Pathen angsunga Mosi nupapa Jethro toh an nedingin ahunguvin ahi.

¹³Chuin ajingin ahitin ahi, Mosi chu mipi ho thutan dingin atoutan: chule mipi ho chu jingkah-a patnin nilhah geijin Mosi koma chun adingun ahi.

¹⁴Chuin Mosi nupapa chun mipi ho chunga athilbol jouse chu amuphatnin, ajah-a, Mipi ho chunga nathilbol hi ipiham? Ipidinga nangma nachang seh-a natouva, mipi ho chu jingkah-a pat nilhah geija nakimvela dinguva ham? ati.

¹⁵Chuin Mosi'n anupapa henga, Mipi hi Pathen lunglam dong dinga kahenga ahung jeh-u ahi.

¹⁶Amahon thu aneitengule kahenga hung jiuva; chule keiman khatle khat kah-a thu katanji-a, chule Pathen chondan thuhou le adanthu ho kahetsah ji ahi, ati.

¹⁷Chuin Mosi nupapan ahenga, Hiche nathilbol hi aphapoi.

¹⁸Nangma nahin nakoma um mipi ho ahiuvin nachol val dingu ahi. Ajehchu hiche thil hi nangma dingin agihsa behseh-in ahi; nangma changin nabol jouhoi ahipoi.

¹⁹Tun kaseihi ngaijin, keiman nangma thumopming kating, Pathen'in nangma naumpi ding ahi: thunoh ho chu Pathen henga napohlut theina dingin, nangma Pathen masanga mipi ho-a dingin thalheng hi-in.

²⁰Chule nangman amaho chu chondan thuho le danthu ho nahilding, chule amahon ajot teidiu lampi le abol teidiu natoh chu nahil ding ahi.

²¹Chuche chungchona chun mipi ho jouse lah-a kona thil bolthei, Pathen ging mi, mi thudih, kiloset thetbol mi lhengdoh-in lang; amaho chu sangkhat chunga vaihom, jakhat chunga vaihom, somnga chunga vaihom, chule som chunga vaihom dingin pansah-in.

²²Chule amaho chun mipi ho chunga phatseh-in vaihomu hen; chule hichehi hiding ahi, thulen ho chu nahenga ahinlhut diu, amavang thu neo neo ho chu amahon atandingu ahi. Chuti henlang hile nangma dinga olna hiding, chule amahon pohgih chu napoh hu dingu ahi.

²³Nangman hiche thilhi nabola, chule Pathen'in jong chutia chu nathupeh-a ahile nangman nadoujou ding, chule hiche mipi ho jouse jonghi mongtah-a aumna mun uva kile dingu ahi, ati.

²⁴Chuti chun Mosi'n anupapa seichu angaijin, asei jouse chu aboltan ahi.

²⁵Chuin Mosi'n Israel pumpi lah-a konin thilbolthei mi alheng doh-in, amaho chu mipi luchang hidingin sangkhat chunga vaihom, jakhat chunga vaihom, somnga chunga vaihom, chule somkhat chunga vaihom dingin akoitan ahi.

²⁶Hitichun amaho chun phat tinin mipi ho thu atan taovin: thu hahsa ho chu Mosi henga ahinlhut nun, ahin thuneo jouse chu amaho tah-in atanjiuvin ahi.

²⁷Chuin Mosi'n anupapa chu asoldohtan; hitichun ama aumna gam lama achetai.