Read Thado Chin Potdohbu 19 Bible Online

Potdohbu 19 - Thado Chin bible

Potdohbu 19

¹Israelte Egypt gama kona apotdoh uva pat lha thumna, chuche nitah chun amaho Sinai gamthip ahunglhung taove.

²Ajehchu amaho Rephidim'a kona hung kipatdoh uva, Sinai neldi gam hung lhunguva, hiche gamthipma chu ponbuh akison ahi; hitichun Israel ten molsang bula chun gebuh akison taovin ahi.

³Chuin Mosi chu Pathen henga achetouvin, chule molsanga konchun Pakaiyin ahin kouvin, Jacob insung henga hitia hi naseija, chule Israel chate henga nasei ding ahi;

⁴Nanghon Egypt mite chunga ipi kana bola, chule iti nangho muvanlai lhaving chunga kapoh-a, keimatah henga kapuilut ham namutaove.

⁵ Hijeh chun tun, nanghon kathu nangai tahbeh uva, kakitepna hi nanit tahbeh uva ahile, namdang jouse chungvuma nangho hi kagou tumbeh nahi dingu ahi; ajehchu leiset pumpi hi keija ahi.

⁶ Chule nangho keima dingin lenggam thempuho le namtheng nahi dingu ahi. Hiche thuho hi ahi nangman Israel chate henga nasei ding chu, ati.

⁷Chuin Mosi ahungin, mipi lah-a upaho chu akou khomin, Pakaiyin athupeh hiche thuho jouse chu a-angsung uva atahlangtan ahi.

⁸Chuin mipi jouse chun thakhat tah-in adonbutnun, ahenga, Pakaiyin asei jouse chu kabol dingu ahi, atiuve. Chuin Mosi'n mipi thusei ho chu Pakai henga alhuttan ahi.

⁹Chuin Pakaiyin Mosi henga, Ven, nangma toh ikihou teng mipin ajahtheina dingu leh tonsotna nangma natahsan theina diuva, nahenga meilhang satah-a kahung ding ahi, ati. Chuin Mosi'n mipi ho thusei ho chu Pakai ahetsah tan ahi.

¹⁰Chuin Pakaiyin Mosi henga, Mipi henga chenlang amaho chu tuni le jingle suthengin, chule amahon avonhou kisop thengu henlang,

¹¹Anithum ni-a dingin kigosa demin umuhen: ajehchu anithum nileh mijouse mitmu-a Sinai molsang chunga chu Pakai hungkumlha ding ahi, ati.

¹² Chule nangman mipi dinga akimveluva gamgi nasempeh ding, chule ajah uva, Nangho molsang chunga nakaltou louna dingu le agamgi natohkhah louna dingun chingtheijun; koihileh molsang tongkha chan chu kithat tei ding ahi.

¹³Khut khatchan jong atohkhah louding, amavang ama chu songa selih ding ham, ahiloule thalpi-a kaplih ding ham hitei ding ahi; gancha hihen mihem hijongleh hichu hinglou ding ahi. Sumkon chu sottah agin tengleh amaho molsang lama hungtou dingu ahi, ati.

¹⁴Chuin Mosi molsanga konchun mipi ho henga akumsuh-in, mipi ho chu asuthengin; chule amahon avonhou asopmun ahi.

¹⁵Chule aman mipi ho henga chun, Anithum channia dingin kigosa demin umun: na-inneipiteu koma jong luthih-un, ati.

¹⁶ Chuin anithum ni jingkah-in ahitin ahi, van ahung gingin kol aphen, molchunga chun meilhang satah aumin, chule sumkon thongje jun ahung gingin; chutichun gebuh-a mipi umho chu akihot lhul gam taovin ahi.

¹⁷Chuin Mosi'n mipi ho chu Pathen toh kimuto dingin gebuh-a kon ahinpui doh-in; chule amaho molsang bula chun adingun ahi.

¹⁸ Chuin Pakai chu meikonga ahung kumlhah jehchun, Sinai molsang pumpi chu mei akhu jengin: chule akhu chu lhum meikhu bangin akitung doh-in, molsang pumpi chu nasatah-in akihotnin ahi.

¹⁹Chuin sumkon chu sottah agina, ahagin cheh cheh phatnin, Mosi'n thu aseijin ahile Pathen'in aw gingin ahindonbut nin ahi.

²⁰Chuin Pakai chu Sinai molchunga, amolsang chungvuma chun ahungkum suhtan ahi. Chuin Pakaiyin Mosi chu molchung vuma chun akoutouvin; chule Mosi akaltoutan ahi.

²¹Chuin Pakaiyin Mosi henga, Kumsuh inlang mipi chu gagih-in, ajole mipi khu avedingin Pakai henglam hinphukeh untin, mi tamtah manthah lo getnunte.

²²Chule Pakai kom hinaija thempuho jong chu kisuthengu hen, ajole Pakai chu achunguva hetman louvin chuget ninte, ati.

²³Chuin Mosi'n Pakai henga, Mipi chu Sinai molsanga hungkaltou thei pouvinte; ajehchu nangman, Molsang kimvela chun gamgi semun lang, hichu suthengun, tia neithu peh-u ahi, ati.

²⁴Chuin Pakaiyin ajah-a, Chen, kumsuh tan, chule Aaron toh nahung kaltou lhonding ahi: ahivangin thempuho le mipi chu Pakai henga hung dingin hinphukeh hih-uhen, ajole ama achunguva chuget ninte, ati.

²⁵Chuti chun Mosi chu mipi ho henga achesuh-in, ahenguva thu jouse chu aseitan ahi.