Read Thado Chin Potdohbu 2 Bible Online

Potdohbu 2 - Thado Chin bible

Potdohbu 2

¹Chuin Levi phunga peng pasal khat achen Levi chanu khat ji dingin akipuitan ahi.

² Chuin amanu chun nao avopmin, chapa khat ahingtai. Amanun ama chu naosen hoitah ahichu amu phatnin, lhathum aselin ahi.

³Amanun ama chu aselbe joulou phatnin, pumpenga kisa sinkhup khat alan, thingnai man le vahaibonin aloibitnin, asunga chun naosen chu akhumin; vadung kama peng lah-a chun agakoitai.

⁴Chule achunga ipi ahung sohdem ti ve dingin asopinu chu gamlatah-a adingin ahi.

⁵Chuin Pharaoh chanu chu kisil dingin vadunga chun ahung suh-in; chule asoh numei ho chu lui panga chun avah leovin ahi: chuin amanun peng lah-a sinkhup chu amuphatnin, hichu galadin asohnu chu asolin ahi.

⁶Chuin amanun hichu ahon phatnin naosen chu amutai: chule, veuvin, naosen chu ahung kapmin ahi. Chuin amanun amapa chu alung asen, Hichehi Hebrew chate lah-a khat ahi, ati.

⁷Chujouvin a-unu chun Pharaoh chanu jah-a chun, Keima kache-a hiche naosen hi nadonpeh dinga Hebrew naodon numei kaga koupeh ding ham? ati.

⁸Chuin Pharaoh chanun amanu jah-a, Chen, ati. Chuin nungahnu chu achen, naosen nuchu agakoupeh tan ahi.

⁹Chuin Pharaoh chanu chun amanu henga, Hiche naocha hi kipuijin lang keima dingin neihin vah peh-in, chule keiman natohman kapeh ding nahi ati. Chuin numei chun chapang chu akipuijin, avahtan ahi.

¹⁰ Chuin chapang chu ahung khandoh phatnin, naodonnu chun Pharaoh chanu henga ahinpuijin, ama amanu chapa ahitan; chule amanun amin Mosi asah tai: Ajehchu keiman twilah-a kona kalahdoh ahi, ati.

¹¹ Chuin hiche laichun ahitin ahi, Mosi akikhanlhit phatnin, asopite henga agachen, apohgih-u chu agaven ahile, Egypt mikhatnin asopi Hebrew mi khat aden chu amulhi tan ahi.

¹²Chuin aman akimvel dung avelen, koimacha amulou phatnin Egypt mipa chu athatnin, neldi lah-a aselin ahi.

¹³Chule ani ni channia apotdohkit phatnin, veuvin, Hebrew mi ni akidel lhonin: aman athemo jopa henga, Ipidinga nasopi naden ham? ati.

¹⁴Chuin amapan, Keiho chunga pipui le thutan dinga kon natunham? Egypt mipa natha banga chu keijong thading neigot ham? ati. Chuin Mosi akichatan, Tahbeh-a hiche thilhi kihedoh-a ahitai, ati.

¹⁵ Tun Pharaoh'in hichehi ajah phatnin, Mosi chu thadingin aholtan ahi. Ahin Mosi Pharaoh maikoh-a konin ajam mangin, Midian gama achengin: chule ama twikul panga atouvin ahi.

¹⁶Tun Midian thempupa chun chanu sagi aneijin ahi. Chuin maho chu twi thalin ahungun, apa kelngoihon chip dingin kongho chu athal dimun ahi.

¹⁷Chuin kelngoi chingho chu ahungun amaho chu anodoh-un ahi: ahivangin Mosi adingdoh-in amaho chu akithopin, akelngoi honu chu twi achipsah-in ahi.

¹⁸Chuin amaho apau Reuel henga ahung phatnun, aman ahenguva, Iti dana tunia nahiti hungvah uham? ati.

¹⁹Chuin amahon, Egypt mikhatnin kelngoi chingho khutna konin eihuhdoh-un, chule keiho dingin lhingsetnin twi jong eithal peh-un, kelngoihon jong twi achipsah-in ahi, atiuve.

²⁰Chuin aman achanute jah-a, Ama chu hoija umtam? ipidinga mipa chu nahin dalhah-u ham? an nedingin gakouvun, ati.

²¹Chuin Mosi chuche pa toh chending chu anomtan: chule aman achanu Zipporah chu Mosi apetan ahi.

²²Chuin amanun chapa khat ahinpeh-in, amin Gershom asahtai: ajehchu aman, Keima mi gama khopema kahi, ati.

²³Chuin phat chomkhat jouvin ahitin ahi, Egypt lengpa chu athitan ahi. Chuin Israel chate chu asohchan jeh-un akhoisauvin, akapmun, chule asohchan jeh uva akanao chu Pathen kom alhungtan ahi.

²⁴ Chuin Pathen'in akhoisat nao chu ajahpeh tan, Abraham, Isaac, chule Jacob toh akitepna chu ageldoh tan ahi.

²⁵Chuin Pathen'in Israel chate chu ahinven, amaho chu akhohsah tan ahi.