Read Thado Chin Potdohbu 21 Bible Online

Potdohbu 21 - Thado Chin bible

Potdohbu 21

¹Tun nangman amaho masanga nakoi ding thutanna ho chu hiche hohi ahi.

² Nangman Hebrew mi soh-a nachoh-a ahileh, kumgup sung aman najending: akum sagi channa leh imacha ngailouva chamlhat dinga chedoh jeng ding ahi.

³Ama achanga hung lut ahile, achanga potdoh ding: ama jinei ahileh, a-inneipi toh pottha ding ahi.

⁴A-pakai pan ama chu ji apuipeh ahia, amanun chanu chapa ahinpeh-a ahileh; a-inneipi leh achate chu a-pakai pa-a hiding, chule amachu achanga potdoh ding ahi.

⁵Amavang sohpa chun kichentah-a, Keiman ka pakaipa, ka-inneipi, chule kachate chu kangailui; chamlhatdin potdoh ponge atia ahile:

⁶Chuteng a-pakaipa chun amachu thutan ho henga ahin puiding; chujongle amachu kotkhah ham, kotbeng hama apui ding; a-pakaipa chun thil kijumhem khatna abil avupeh ding; chule amachu tonsotna ajending ahitai.

⁷Chule pasal khatnin achanu chu sohnu dinga ajoh-a ahile, soh pasal ho bangin amanu chu potdoh louding ahi.

⁸Amanu chun a-pakaipa, ama kichenpi dinga jihol pa chu alunglhaisah joulouva ahile, akilhatdoh sah kitding ahi. Amapan amanu chu doha-a aboljeh-a, gamdangmi koma johna ding tha anei louding ahi.

⁹Chule amapan achapa dinga anahol ahileh, amapa chun chanuho bangtah-a abolding ahi.

¹⁰Chule amapan jichom dang akipuija ahileh; amanu neh le chah, ponsil, chule nupa hina-a athaneina chu asuhlhompeh louding ahi.

¹¹Chule aman hicheng thilthumhi amanu chunga abol louva ahileh; amanu dangka ngailouva potdoh jeng ding ahi.

¹² Min mikhat avoh-a, amachu athitah-a ahile, amajong thonlouva thatei ding ahi.

¹³ Ahin mikhatnin achanlhih hilouva, Pathen'in amachu akhutna apehdohjoh ahileh; keiman ajamlut nading munkhat kagonpeh ding ahi.

¹⁴Ahinla mikhat chu ahenasa-a a-inheng chunga achuh-a, doha bola tha agotna ahile; amachu athi teina dinga, ka-maicham'a kona nakaidoh dingu ahi.

¹⁵Koihileh anuham, apaham vo-a chu tha teiding ahi.

¹⁶ Koihile mihem khat gua, kijoh, ahilouleh akhutna aum petna kimudoh aumle; amachu thonlouva thatei ding ahi.

¹⁷ Koihile anuham, apaham gaosapma chu thonlouva thatei ding ahi.

¹⁸Chule mi akinah-a, khat chun khatjoh chu songtum ahiloule akhut tuma asuh-a, amachu athilouva, ajalkhuna alupma:

¹⁹Ama chu ahung thodoh kitna, atenggol akiphu-a avahle theileh, mivopa chun aphat suhmang man apeh ding, ajendam selding ahi.

²⁰Khattouvin asohpa ahilouleh asohnu mola avoh-a, akhut luma alouva ahile; amachun thonlouva talen amat ding ahi.

²¹Amavang nikhat ham, nini ham ahinna ahile, amachun talen amatlou ding ahi; ajehchu amachu adangka man ahi.

²²Chule pasal le pasal akinah-a, numei naovop asuhkhah lhona, agai ajula, ahia la amanu chu ima atilouva ahile; numeinu inneipun achunga chu adeljat dungjuija talen amatding; chule thutan hon aphatsah dungjuija aditding ahi.

²³Amavang setna-in ajuikhah tah-a ahileh, nangman hikho khela hikho napehding ahi.

²⁴ Mit khela mit, ha khela ha, khut khela khut keng khela keng,

²⁵Meija kihal meija, maha khela maha, kijep khela kijep napeh ding ahi.

²⁶Mikhatnin asohpa mit ahim, asohnu mit ahim abehpeh-a, hichu achot tah-a ahile; amitjeh-a chu ama chamlhat dinga alhadoh ding ahi.

²⁷Chule asohpa ha ahim, asohnu ha ahim avohlhoh-a ahile; aha jeh-a ama chu chamlhat dinga alhadoh ding ahi.

²⁸Bongchal khatnin pasal ham, numei khat apih-a, amachu athia ahile; bongchal chu thonlouva songa selih teiding ahin, chule asa chu nehlou ding; ahinla bongchal neipa vang chu lha-ong ding ahi.

²⁹Ahin chuche bongchal chu masanga jong mipih ngai ahia, aneipa chu kihetsah sa ahitah-a, aman in'a achintup loujeh-a pasal ham numei ham khat atha-a ahileh; bongchal chu songa selih ding, chule aneipa jong tha ding ahi.

³⁰Sum joh-a leosah ding chu achunga achuh tah-a ahile; ahinna akichoh dohna dinga chu akitep jat chu apeh ding ahi.

³¹Apih chu chapa hihen chanu hijongleh, hiche thutanna banga hi achunga kibol ding ahi.

³²Bongchal chun soh pasal ham, soh numei hamkhat apih-a ahileh; bong neipa chun apihpa pakaipa chu dangka shekel somthum apehding, chule bongchal chu selih ding ahi.

³³Mi khattouvin kotong ahon ham, ahiloule kotong alaija, kotong sinlouva akoija, bongchal ham, Sangan ham khat alhahlut na ahile;

³⁴Kotong neipa chun aman chu aditding, gancha neipa chu sum apeh-a, gancha thi chu ama changding ahi.

³⁵Chule mikhat bongchal'in midang khat bongchal asuh khah-a, athia ahile; bongchal ahing nalai chu ajoh lhonding, aman kihom lhonding ahi; chule bongchal thisa jong chu asa kihom lhonding ahi.

³⁶Ahilouva chuche bongchal chun masangin jong gancha apihji ti kihesa ahia, aneipan achintup lou ahile; aman thonlouva bongchal khela bongchal apehding; chule athipa vangchu ama chang ding ahi.