Read Thado Chin Potdohbu 22 Bible Online

Potdohbu 22 - Thado Chin bible

Potdohbu 22

¹Khattouvin bongchal ham, kelngoi ham khat aguh-a, hichu atha ham, ahiloule akijohdoh ham ahile; aman bongchal khat chu bongchal nga-a asahding, chule kelngoi khat chu kelngoi li-a asah ding ahi.

²Gucha khatnin in aphet vangpet akimudoh-a, akivohna-a athitah-a ahile, amajeh-a thisan kiso louding ahi.

³Chule nisan asokhum tah-a ahile, ama-a dinga thisan kiso ding; aman alhingsetna aditding ahi; itihama imacha aneilouva ahileh, athilguh mana chu ama kijoh ding ahi.

⁴Chule athilguh chu bongchal hihen, sangan hihen, ahiloule kelngoi hihjongle, hichu ahinga akhutna akimudoh-a ahivangle; ajat ni-a aledit ding ahi.

⁵Mi khattouvin louham, lengpilei ham khat anehsah-a, agancha chu alhatlutna, midang lou chu aneh sah-a ahile; alou aphapen tah leh alengpilei phapena chu aditding ahi.

⁶Mei ahung kah-a, linglah akahmatna, changphal setlomsa ham, chang atlhuh loulai ham, ahiloule louham akah mangsoh jeng tah-a ahile; meihal pa chun thonlouva adit teiding ahi.

⁷Mikhatnin a-inhengpa koma dangka ham, nehding ham chin dinga apeh-a, chuche mipa in'a kona chu akiguhmang tah-a; gucha chu akimat doh-a ahile ajatnia asah ding ahi.

⁸Chule gucha chu akimatdoh louva ahile, a-inneipa chu a-inhengpa thilho chunga chu akhut anat anatlou hetna dinga thutan ho henga puiding ahi.

⁹Suhkhelna jouse, bongchal thu hihen, sangan hihen, kelngoi hihen, ponsil hihen, itobang thil mang hijongle, hichu midang khatnin keija ahi tia aseija ahile, alang teni chu thutan ho anga hunglhon ding; chule thutan hon themo achan penpen chun a-inhengpa chu jatni-a asahding ahi.

¹⁰Mikhatnin a-inhengpa koma asangan ahim, bongchal ahim, kelngoi ahim, gancha poupou achin dinga apehdoh-a; hichu koima mulouva athi ham, akitongkha-a ham, akinomanga ham ahile;

¹¹A-inheng thilkeo chunga kakhut anatpoi ti hetna-a, Pakaiya kihahselna chu akahlah lhona umding; hichu agan neipa jong noma, aman jong hichu aditlou ding ahi.

¹²Ahin hichu akoipa koma kona kigumanga ahivangle, aman aneipa chu aditding ahi.

¹³Hichu akimal tel soh ahi tah-a ahile, aman hichu hettohsahna dingin hinchoi hen, aman akimaltelsa chu aditlou ding ahi.

¹⁴Mikhatnin a-inhengpa gancha khat chu man dinga alah-a, hichu athi ham, akisukha ham ahile; aman adit teiding ahi.

¹⁵Ahin aneipa chu akoma um ahivangle, aman adit louding ahi: hichu apa kila ahile, aman peh dinga kithalah ahi-a ahile, akithalah man chutoh kitoh ding ahi.

¹⁶ Mikhatnin nungah mi jihol hiloulai khat alheplhah-a, aluppi-a ahile; amapan amanu chu ajiman ding apeh-a akichenpi teiding ahi.

¹⁷Amavang nungahnu pa chun ama chutoh akichensah nomlouva ahile, aman nungah theng man dungjuija hichu apeh ding ahi.

¹⁸ Nangman mitphel doi choi chu nahinghoi louding ahi.

¹⁹ Koi hileh ganchatoh lumkhoma chu thatei ding ahi.

²⁰ Koihile Pakai khatseh heng tilouva, pathen dang pou pou henga ganlhaina bol tapou chu suhmang hel ding ahi.

²¹ Nangman kholjin mi na-engbol louding, boljong nabol genthei lou helding ahi: ajehchu nangho jong Egypt gama kholjin nanahiu ahi.

²²Nanghon meithai tapou le paneilou chapang chu nasuh genthei loudiu ahi.

²³Nanghon iti ham khatna amaho chu nasuh genthei juva, kahenga ahung ka poupou uva ahileh, keiman akanao chu kangaipeh tei teiding;

²⁴Chule kalung hanna hung soudoh-a, chemjam'a kathagam dingu; chuteng na-inneipi teo chu meithai soh uva, nachateo chu pabei sohgam ding ahiuve.

²⁵ Nakoma um kamite mivaicha khattou chu sumpa napeh-a ahile, ama-a dinga chu sumthoi lami nabahlou ding, chuleh achunga athoi jong nakoi louding ahi.

²⁶ Nangman na-inheng ponsil chu abat mana nalah tah-a ahile, nangman nisalhum masanga nalepeh teiding ahi.

²⁷Ajehchu hiche bou chu akitomna aneisun ahin, avun dinga ponsil ahi. Ama hoilaija lumding hitam? chule hung hiti ding ahi, kahenga ahung ka teng, keiman kajahpeh ding ahi; ajehchu keima lungset themtah kahi.

²⁸ Nangman Pathen nahouset louding, namite lah-a vaihomho jong nagaosap louding ahi.

²⁹Nangma natheiga min masa holeh nalengpi twiho tohdinga nageisang louding ahi. Nachapa te lah-a apeng masapen chu keima neipeh ding ahi.

³⁰Chutobang ma-a chu bongchal ho le nakelngoi ho nabolding: ni sagi apitoh uma; niget nileh keima neipeh ding ahi.

³¹ Chule nangho keima dinga mitheng nahidiu ahi: nanghon gamsa hon gama amaltel sao sapou pou naneh louhel dingu; uicha ho naselhah peh dingu ahi.