Read Thado Chin Potdohbu 23 Bible Online

Potdohbu 23 - Thado Chin bible

Potdohbu 23

¹ Nangman jouthu nalhut louding ahi: chonphalou hettohsah hidinga migilouho toh naki khutjop louding ahi.

²Thilse bolna dinga mipi chu najui louding; chuleh mipi chun thudih tah chu adihlou sosahna ding agot naova jongchu thu nasei louding ahi.

³ Ahiloule mivaicha jong achungthu kitan na-a langneina namusah ding ahipoi.

⁴ Nangman namelma bongchal ham, sangan ham ava mang namu-a ahileh, thonlouhela ama koma nahin puikit ding ahi.

⁵Nangma vetda mikhat sangan chu apohgih noija opden namu-a, kithopi ding nada-a ahijongle, thonlouva nakithopi ding ahi.

⁶ Nangman nami vaicha kiheh na-a adihna chu nahei mangpeh louding ahi.

⁷Jouthu-a konin nangma gamlatah in kikangsen; chule themona neilou le mi kitah chu that hih-in: ajehchu keiman migilou chu them kachansah louding ahi.

⁸Chule nangman nehguh nabol louding ahi: ajehchu nehguh chun michingho mit achot sah-in, michonpha ho thuseidoh chu aheimangjin ahi.

⁹ Chujongle nangman kholjin mi nasuh genthei louding ahi: ajehchu nangma Egypt gama kholjin nahi jeh-in, kholjin mi lungthim nahen ahi.

¹⁰ Kumgup sunga nangman nagamsunga muchi natu ding, chule muchi gaho chu nalo khomding ahi.

¹¹Ahin kum sagi chana leh, namite lah-a mivaicha hon aneh theina diule, amahon adalhah hou chu gamsa hon aneh theina diuva, nangman gam chu nakicholdo sah-a nakoithim ding ahi. Chutobang ma-a chu nalengpilei le Olive lei jong nabolding ahi.

¹² Nigup sunga nana nakitoh ding, ni sagi channi leh nabongchal leh na sangan acholdo theina dingleh, nasohnu chapa le kholjin jong akitha-ol theina diuva, nacholdo ding ahi.

¹³Nahenga kaseisa thil jouse-a hin nangma chingthei tah-in umin; chule pathen dangho min him him chu phapoh hih-in, nakama konin jong kijadoh hihhen.

¹⁴Nangman kum khat sunga keima dinga kut thumvei nanit ding ahi.

¹⁵ Nangman cholsolou changlhah kut nanit ding ahi: (Keiman nangman kathupeh banga phat kitepna Abib lha sunga chu cholsolou changlhah nisagi naneh ding ahi; ajehchu chuche lha sung chu Egypt gama kona nahungdoh ahi. Chule koimacha kamasanga khutgoh keova hungkilah louding ahi).

¹⁶ Chule louva natuho natoh gimna ga masapen lholhun kut nanit ding: chule kumlhun na louva kona natoh gimna ga jouse khopkhomna lhosoh khoptup kut nanit ding ahi.

¹⁷Kumkhat sunga napasal hou jouse Pakai Pathen angsunga thumvei kilahsoh keidiu ahi.

¹⁸Kahenga kilhaina nabolnao thisan chu chol kiso changlhah toh natotha louding; chule ganna eikilhaina sathao chu jingkah geija umden louding ahi.

¹⁹ Nagamga masaho lah-a aga masapen chu Pakai na-Pathen in'a nahinchoi ding ahi. Nangman kelnou chu api noitwija nahon louding ahi.

²⁰Ven, lampia naching dingle keiman kagotpehna munna napuilut dingin namasanga vantil khat kasole.

²¹Ama chunga chingthei jinlang athu ngaijin, chule lunghansah hih-in; ajehchu aman nasuhkhel naho angaidam louding ahi. Ajehchu ama-a chu kamin uma ahi.

²²Ahin nangman ama thu nangai tahbeh-a, kasei jousehi nabola ahile; namelmaho dinga melma kahiding, nadouho dinga akidoupiu kahiding ahi.

²³Ajehchu ka vantil na masanga che-a, Ammon miho, Amor miho, Hit miho, Perizz miho, Canaan miho, Hiv miho chule Jebus miho henga chun napuilut ding: chule keiman amaho chu kasatgam ding ahi.

²⁴A-pathen hou henga nakun louding, jen jong najen louding, chule athilbol banguva jong nabol louding ahi. Amavang hicheho chu nasuhmang hel ding, chule amilim hou chu nasuhchip sohkei ding ahi.

²⁵Chule nanghon Pakai na Pathen'u chu najendiu; aman nachanglhah le natwi phatthei abohding; chule nalah-a kona natna kalahmang ding ahi.

²⁶Nagam sunga koimacha ajula leh achinga umloulou ding; keiman nahin nikho hou chu kasuh bulhing peh ding ahi.

²⁷Kichat ka umna chu namasanga kasol ding, akomuva nahung nading mi jouse chu kasuh mang ding, chule namelma te ho jouse kanung ngat sah ding nahi.

²⁸Chule keiman namasanga khoingal ho kasol ding, hiho chun Hiv mite, Canaan mite, chule Hit mite na-angsunga kona adelmang diu ahi.

²⁹Namasanga kona kumkhat sunga kadel mangsoh louding ahi; achuti louleh gamsung chu kamhelin tin, nangma doudinga gamsaho hungpung dingu ahi.

³⁰Nangma nahung punna, gam chu nalosoh kahse-a, amaho chu lhomcha cha-a namasanga kona kadelmang ding ahi.

³¹Chule nagamgi chu twipi sana kona Philistine twipi chan, nelphaija kona vadung chana kasem ding ahi: ajehchu keiman chugama chengho chu nakhutna kapehdoh ding; chule nangman amaho chu namasanga kona nadel mang ding ahi.

³²Nangman amaho le a-pathenhou toh kitepna imacha nasem louding ahi.

³³Amaho nagam sunga chenglouhel diu ahi; achuti loule amahon keima dounan nachonset sah dingu ahi. Ajehchu nangman a-pathen hou najenna ahile, hichu nangma dinga thang hitei ding ahi.