Read Thado Chin Potdohbu 24 Bible Online

Potdohbu 24 - Thado Chin bible

Potdohbu 24

¹Chuin aman Mosi henga, Nangma Aaron toh, Nadab toh, Abihu toh, chule upa somsagi toh Pakai hengah hung kaltouvun; chule gamlatah-a konin neihin houvun.

²Chule Mosi changseh bouvin Pakai kom ahin nai ding ahi: ahin amahon vang ahin nailou dingu; chule mipi chu amatoh chetou loudiu ahi, ati.

³Chuin Mosi ahungin, Pakai thu jouse le thutanna jouse chu mipi aseipeh tan ahi. Chuin mipi chun aw khat tah-in adonbutnun, ajah-a, Pakaiyin thusei ho jouse chu kabol dingu ahi, atiuve.

⁴Chuin Mosi'n Pakai thusei ho jouse chu asunin, jingpi matah in athouvin, lhang noija chun maicham khat le Israel phung somle phung ni dungjuijin khompi somleni aphutnin ahi.

⁵Chuin aman Israel chate lah-a gollhang ho asolin, amahon Pakai henga pumgo thilto atoh-un, chule bongchal khatna chamna thilto ganlhaina abolun ahi.

⁶Chuin Mosi'n thisan akehkhat chu alan, twikong ho-a chun akoijin; chule thisan akehkhat chu maicham chung chu athe khumin ahi.

⁷Chuin aman kitepna lekhabu chu alan, mipi ho jahdin asimdoh-in ahi. Chuin amahon, Pakaiyin asei jouse chu kabol dingu, chule asei kangai dingu ahi, atiuve.

⁸ Chuin Mosi'n thisan chu alan mipi ho chu athe khumin, ajah uva, Veuvin, hicheng thuho jouse thudola Pakaiyin thisan kitepna asem hi, ati.

⁹Chujouvin Mosi toh, Aron toh, Nadab toh, Abihu toh, chule Israel upa somsagi toh achetou taovin ahi.

¹⁰Chuin amahon Israel Pathen chu amuvin: Akengto chotpha chu khi-eng song lhong kisem bangleh, athendan chu van then bangin athengin ahi.

¹¹Chuin aman Israel milen milal ho chunga akhut angampon ahi: chujongle amahon Pathen chu amuvin, chule aneovin, adonun ahi.

¹²Chuin Pakaiyin Mosi henga, Molsang chunga hin kahenga hungkaltou vinlang, chua chun umin: chule keiman nangma danthu le songpheng hochunga kasut kathupeh chu amaho nahil dinga kapeh ding nahi, ati.

¹³Chuin Mosi le alhacha Joshua chu akipatdoh lhonin; chule Mosi chu Pathen molsanga chun akaltou tan ahi.

¹⁴Chuin aman upa ho henga, Naheng uva kahung kile kahseovin hikoma hin keini eina ngah jingun: chule veuvin, Aaron le Hur nakom uva aumlhone: koihile thunoh nei na-umuleh, amani henga chehen, ati.

¹⁵Chuin Mosi molsang chunga akaltouvin, chuin molsang chu meilom'in atomchah tan ahi.

¹⁶Chuin Pakai loupina chu Sinai molsanga chun aumjingin, nigup sung chu meilom'in atomchah-in ahi. Chuin nisagi chanin aman Mosi chu meilom lah-a konchun ahinkouvin ahi.

¹⁷Chuin molsang chung vuma Pakai loupina chu Israel chate mitmun kavamthei meikong abangin ahi.

¹⁸ Chuin Mosi chu meilom lah-a chun alutnin, molsanga chun akaltou tai. Chuin Mosi chu nisomli le jan somli molsanga chun aumtan ahi.