Read Thado Chin Potdohbu 25 Bible Online

Potdohbu 25 - Thado Chin bible

Potdohbu 25

¹Chuin Pakaiyin Mosi henga thu aseijin, hitin ati,

²Israel chate henga chun keima dingin thilto ahin choina dingun seijin: mitin alungcham tah-a peho-a kona keima dinga thilto chu nalahding ahi.

³Chule nangman amaho-a kona thilto nalahding chu hichehi ahi; sana, dangka, sum-eng,

⁴Pat adumloi, asandup loi, asanthip loi, patngat, kelmul,

⁵Kelngoichal vun kidesan, satuilut vun, thinggi thing,

⁶Vahding thao le gimnamtui thaova nuding thil namtui,

⁷Boitong sangkhol le a-ompho chunga behding khisonggel le songho ahi.

⁸Chule amaho lah-a kachenthei nadingin, amahon keima dingin muntheng eisempeh uhen.

⁹Houbuh kigon limleh amanchah ho jouse chu kigon lim kavetsah sa jouse bangtah-a nasah dingu ahi.

¹⁰Chule amahon thinggi thinga kitepna thingkhong asemdiu: adung tong ni le akeh, avai tong khat le akeh, chule atun chu tong khat le akeh hiding ahi.

¹¹Chule nangman hichu sana thengtah-a asungleh apo nalonkhum ding, chule achung kimvela chu sana lallukhuh lim nasem ding ahi.

¹²Chule nangman hiche dinga chu sana chaokol li nalhah ding, chule chuche ningli-a chu hicheho chu nabuding ahin; chaokol ni chu asih lang khat na, chule chaokol ni ma chu asih langkhat na nabuding ahi.

¹³Chule nangman thinggi thing mol lhon ni nalah-a, hichu sana-a nalonkhum ding ahi.

¹⁴Chule thingkhong chu amahon ajontheina diuva, kitepna thingkhong sih-a chaokol ho sunga chu mol lhon teni chu nagol lutding ahi.

¹⁵Mol lhon ho chu kitepna thingkhong chaokol ho sunga chu chuti umden ding; hiche teni chu kiladoh louhel ding ahi.

¹⁶Chule kitepna thingkhong sunga chu kapeh ding hettohsahna chu nakoilut ding ahi.

¹⁷ Chule nangman sana thenga hepi touna nasemding, asao tong ni le akeh, chule avai tongkhat le akeh hiding ahi.

¹⁸Chule nangman hepi touna mong teni-a chu thih kikhetna-a kikheng sana-a kisem Cherub ni nasem ding ahi.

¹⁹Chule Cherub khat chu alangkhat monga nasemding, khat chu achom langkhat monga nasemding; hepi touna chunga chu among langto-a Cherub ni nasem ding ahi.

²⁰Chule Cherub teni chun sangtah-in alha ajal lhonding, alhaho chun hepi touna chu akhuding, chuleh amailhon chu kingatto gelding; Cherub teni mai chun hepi touna lam chu angat lhon ding ahi.

²¹Chule nangman thingkhong chunga chu hepi touna chu nakoiding; chule thingkhong sunga chu keiman kapeh ding hettohsahna chu nakoiding ahi.

²²Chule chukoma chu nangma kimutopi ding, Israel chate henga kathupeh ding jouse chu hettohsahna thingkhong chunga um hepi touna chunga Cherub teni kikah-a kona chu kaki houpi ding nahi.

²³Nangman thinggi thinga dokhang khat nasemding: adung tongni, avai tong khat, atun tong khat le akeh hiding ahi.

²⁴Chule hichu sana thenga nalonkhum ding, chule agei kimvela sana lallukhuh lim nasemding ahi.

²⁵Chule nangman akimvela chu khutpeh te agei nasemin ding, agei kimvela sana lallukhuh lim nasem ding ahi.

²⁶Chule sana chaokol li nasema, akeng li kimvel aning li ho-a chu chaokol hochu nabu ding ahi.

²⁷Dokhang jon nading mol lhon khumlutna dinga chaokol ho chu ageichin na nabuding ahi.

²⁸Chule thinggi thinga mol lhon nasem ding, hiche teni-a chu dokhang chu akijon theina dinga, sana-a nalonkhum ding ahi.

²⁹Chule hiche-a dinga chu akongho, akheho, asinho, chule twikongho nasem ding; chuleh hicheho chu sana thengsela nalonkhum ding ahi.

³⁰ Chule vetsahna changlhah chu kamasanga dokhang chunga nakoijing ding ahi.

³¹Chule sana thengtah-a thaomei khom khat nasem ding: thaomei khom chu akhetna-a kikhenga nasem ding ahi. Atunna atopal, abahho, alhengho, amumho, chule apahcha ho chengse chu pumkhatna nasemding ahi.

³²Chule chuche asih langto-a kona chu abah gup hungdoh ding; asih khatna kona thaomei khom abah thumna umding, asih khatna kona chu thaomei khom bah thum ma umding ahi.

³³Chule abah khatna chun jonmot ga banga kisem lheng thum, apah mun le apah pahlhah umding, chule abah dang khatna jong chu jonmot ga banga kisem lheng thum, apah mun le apah pahlhah umding; chutia chu thaomei khoma kona hungdoh abah gup ho-a chu umcheh ding ahi.

³⁴Chule thaomei khoma chu jonmot ga banga kisem lheng li, amum hole apah ho puma umding ahi.

³⁵Chule abah chungnung pen teni noija chu aboh khat umding, anina abah teni noija jong chu aboh khat, chule athumna abah ni noija chu aboh khat umding, hitia chu thaomeija kona hungdoh abah gup dungjuija chu umcheh ding ahi.

³⁶Akhom ho le abahho chu sana pumkhatna kona kisem, sana thengtah-a kikheng hiding ahi.

³⁷Chule hiche-a dinga chu thaomei sagi nasem ding; chule meivah chun amasang chu asalvah theina dinga amahon thaomei chu ahal dingu ahi.

³⁸Chule chuche-a achaiche ho le ameivam dolna kongho chu sana thengsela kikheng hiding ahi.

³⁹Hicheng um le bel ho jouse hi sana thengsel talent khat toh kikotna agih-a kona semding ahi.

⁴⁰ Chule molsang chunga alim kigondan kavetsah bang banga chu nasem nadin chingtheijin.