Read Thado Chin Potdohbu 26 Bible Online

Potdohbu 26 - Thado Chin bible

Potdohbu 26

¹Chuche kalvala jong nangman houbuh chu tupat ngatsel kilhuh cheh adum, asandup chule asanthip pondal soma nasemding: hicheng chunga chu khut them tah-a Cherub ho lim nasemding ahi.

²Pondal khat chu atun tong somni le tong get, chule pondal khatchu avai tong li hiding; chule pondal jouse chu kibang chehdiu ahi.

³Pondal nga chu khat le khat kijopmat sah ding; chule pondal dang ngajong chu chutima chu kijop matsah ding ahi.

⁴Akimatna sunga agola kona chu pondal khat geija a-enga abil nasemding, chutobanga chu anina gola aponung pen geija jong nasem ding ahi.

⁵Pondal khatna geija chun abil somnga nasemding, chule pondal ani chana gola aponungpen pondal geija chun abil somnga nasemding, abilho chu khat le khat kikoimat ding ahi.

⁶Chule sana-a ponche chahna somnga nasema, chule pon chechah na ho-a chu pondal ho chu achemat toding: chutengleh houbuh khat hung hiding ahitai.

⁷Chule houbuh chung khuna dinga chu kelmula kisem pondal ho nasemding: pondal somlekhat nasemding ahi.

⁸Pondal khat chu tong somthum cheh saoding; chule pondal khat avaichu tong li cheh hiding: chule pondal somlekhat chu kibang chehdiu ahi.

⁹Chule pondal ngaho chu khatle khat kikoimat ding: chule pondal gupho jongchu khatle khat kikoimat ding: chule houbuh mailam pondal gupna chu thoni hiding ahi.

¹⁰Chule akil matna ponungpen pondal geija chu abil somnga nasema, chule akoimatna ani channa pondal geija jong abil somnga ma nasemding ahi.

¹¹Chule sum-enga ponche chahna somnga nasema, ponche chahna hochu abil ho-a chu nathilding: pon in ahithei na dinga nakoimat sohkei ding ahi.

¹²Pon in'a pondal ho aval chengse, pondal akeh valdoh chengse chu houbuh tomlama kikhaiding ahi.

¹³Chule alang khatna tongkhat, alang chom khatna tong khat, pon in pondal ho adungjuija avaldoh chu, houbuh hilam pang le khulam panga akhudinga kikhai lhato gelding ahilhone.

¹⁴Chule chuche pon in chung khuna ding chun kelngoichal vunho akide san nasemding, hiche chungvuma achung khuna ding chun satuilut vunho nasemding ahi.

¹⁵Chule houbuh thingpeh ho chu thinggi thing ading jang keija nasemding ahi.

¹⁶Thingpeh khat chu adung tong som, chule thingpeh khat chu availam tong khat le akeh hiding ahi.

¹⁷Thingpeh khat cheh-a chu butonako dinga aki-at kot ni cheh umding: chutia chu houbuh thingpeh jouse chu nasemding ahi.

¹⁸Chule nangman thingpeh somni chu lhanglama pangdinga, houbuh thingpeh ho nasemding ahi.

¹⁹Chule thingpeh somni ho noija chun dangka khombul butona ding ko somli nasemding; thingpeh khat noija butonako ni dingin khombul kigeitong ni, chule thingpeh chom dang noija butona ko hidingin khombul kigeitong ni ma nasem kitding ahi.

²⁰Houbuh pang ani chana sahlam panga chu thingpeh somni hiding ahi.

²¹Chule dangka khombul kigeitong somli ho, thingpeh khat noija khombul butona ko ni, chule thingpeh chomdang khat noija khombul butonako ni cheh nasem ding ahi.

²²Chule houbuh tomlama, lhumlam sanga chu thingpeh gup nasem ding ahi.

²³Chule houbuh tomlam aning ni-a dinga thingpeh ni nasemding ahi.

²⁴Chule hiteni chu anoilama chu kithokop lhonding, chule achunglama chu achina thih chaokol khatna tuhmat hiding ahi. Chutia chu anigel lhona dinga chu chutiding; hiteni chu aning teni-a ding hiding ahi.

²⁵Hitia chu thingpeh getna chu sana butonako ho, thingpeh khat noija chu abutona ko ni, adang thingpeh noija jong chu nima abona somlegup umding ahi.

²⁶Chule thinggi thinga banggol ho nasem ding; houbuh pang langkhatna thingpeh ho-a ding chu banggol nga,

²⁷Chule houbuh pang langkhatna thingpehho dinga chu banggol ngama; chule lhanglam houbuh tomlama thingpeh ho dingin banggol ngama nasemding ahi.

²⁸Chule thingpeh ho lah-a akima banggol chu among khatna pat among langkhat geija kigolpai ding ahi.

²⁹Chule thingpeh ho chu sana-a nalonkhum ding, abangolho thunlutna dinga chu chaokol nasemding: chule abanggol jong chu sana-a nalonkhum ding ahi.

³⁰Chule houbuh chu molsang chunga nakimusah lim bang banga chu nasah ding ahi.

³¹Chule pondala dinga pat adum, asandup, asanthip, chule tupat ngatsel akilhuh-a kikhong nasemding: chule Cherub limho chu khut them tah-a nasemding ahi.

³²Chule sana kilonkhum dangka khombul ho-a kiphut thinggi thing khom li chunga chu nakhai ding; koikaho chu sana hiding, dangka-a kisem butonako li chunga chu kibut ding ahi.

³³ Chule hettohsahna thingkhong chu pondal sunga napohlut theina dinga, pondal chu pon chechahna ho noija chu nakhai ding, chule pondal chun munthengle muntheng chungnung chu nahopkhen pehding ahi.

³⁴Chule muntheng chungnung sunga chu hepi touna chu hettohsahna thingkhong chunga nakoiding ahi.

³⁵Chule pondal polama chu dokhang chu nakoiding, chule meivah khom chu dokhang jon, houbuh pang lhanglam sanga nakoiding: chule dokhang chu sahlam sanga nakoiding ahi.

³⁶Chule houbuh kotna dinga chu ponjal adumloi, asandup, asanthip, chule tupat ngatsel kilhuh-a kikhong, heova kijemhoiho chu kikhai ding ahi.

³⁷Chule akikhai nading chu thinggi thinga khom nga nasemding, chule sana nalonkhum ding, akoika hojong chu sana kisem hiding ahi. Chule hicheho dinga chu sum-enga khombul butonako nga nalhah ding ahi.