Read Thado Chin Potdohbu 28 Bible Online

Potdohbu 28 - Thado Chin bible

Potdohbu 28

¹Chule Israel chate lah-a konin nasopipa Aaron le akoma um achapate chun thempu tohmuna eijen theina dingun, Aaron le chapate Nadab, Abihu, Eleazar chule Ithamar chu nakoma lhengdoh-in.

²Chule nasopipa Aaron loupina le vet hoina dinga vontheng nagon pehding ahi.

³Chule alungthim them le chihna lhagaova kadip dimho jouse henga chun nangman thu seijin lang, Aaron chun thempu tohmuna chu keima eijen theina dinga suhthenga aum theina dingin avonho chu sempeh uhen.

⁴Chule amahon asemdiu vonho chu: ompho, boitong sangkhol, sangkhol len, akijempah delkop, konggah hiding; hitia chu amahon thempu tohmuna keima eijentheina diuva, amahon Aaron le achapatea dinga vontheng ho asempeh dingu ahi.

⁵Chule amahon sana, pondum, ponsandup, ponsanthip, chule tupat naljet amandiu ahi.

⁶Chule amahon sana le pondum, ponsandup, ponsanthip, chule tupat naljetna boitong sangkhol chu khut themtah-a asemdiu ahi.

⁷Akijopmat theina dinga chu alengkou teni chunga agenhon kikilmatna aneiding ahi.

⁸Chule boitong sangkhol chunga um akijempah konggah jong chu thakhat hiding; sana, pondum, ponsandup, ponsanthip, chule tupat naljetna akisem hiding ahi.

⁹Chule khisonggel ni nalah-a achunga chu Israel chate min nasutding ahi.

¹⁰Aminu gup chu songkhat chunga chu nasutna, adang minchom gup chu apendolu dungjuija songchom chunga chu nasutding ahi.

¹¹Min kitana mohor chunga songkheng themin akhenji banga, songpheng teni-a chu Israel chate minho nakhet ding: hiho chu sana jemho-a nasemdoh ding ahi.

¹²Chule Israel chate dinga hetjingna songho hidinga, chuche song teni chu boitong sangkhol lengkoupeh teni-a chu nakoiding; chule Aaron'in hetjingna dinga alengkou teni chunga minho chu Pakai masanga apohjing ding ahi.

¹³Chule nangman sana jemkoho semin,

¹⁴Chule nangman sana chaokol thengtah jangni pahvui kithil banga nasema, jemkoho-a chu nahenchah ding ahi.

¹⁵Chule thutana ompho khut themtah-a nasem ding: boitong sangkhol kisem bang banga sana, pondum, ponsandup, ponsanthip, chule tupat naljetna nasem ding ahi.

¹⁶Aning li kibanga atho-a kilhep ding; adung khapkhat, avai khapkhat ma hiding ahi.

¹⁷Chule chua chu song buding ho chu nabuding; song chu gol li-a nabuding ahi. Agol masa chu songsan, song-eng, chule song santhip hiding: hichu agol masa hiding ahi.

¹⁸Chule agol nina chu song engsel, song dumjet, chule song mantam hidiu ahi.

¹⁹Chule agolthum na chu song sandang, song vom, chule song sandup hiding ahi.

²⁰Chule agol lina chu song engdum, khisonggel, chule khi song pol hiding ahi. Hiho chu akiphunao muncheh-a sana lonkhumcheh ding ahi.

²¹Chule song ho chu Israel chate dungjuija, amin dungjui cheh uva somleni hiding: mohor kikheng ho banga phung som le phungni dungjuija khatcheh chu amintoh umcheh ding ahi.

²²Chule ompho chunga chu sana chaokol thengtah pahvui kithil banga sana sumgui nasemding ahi.

²³Chule ompho chunga chu sana chaokol ni nasema, chaokol teni chu ompho ning teni-a chu nabuding ahi.

²⁴Chule pahvui banga kisem sana sumgui teni chu ompho ning gela um thih chaokol sunga chu thillut ding ahi.

²⁵Chule pahvui banga kisem thih chaokol mong teni chu jemko ni-a chu nahetlut ding, boitong sangkhol lengkou anglam sanga chu nakhichah ding ahi.

²⁶Chule sana chaokol ni nasema, hichu boitong sangkhol bantah-a, asungnung geija ompho ning teni-a chu nabuding ahi.

²⁷Chule sana chaokol chomdang ni nasemding, boitong sangkhol lengkou teni noilamsang, amasanglam, atho-a kilhepna noi, boitong sangkhol khut kijempah-a konggah chung laitah-a chu nabuding ahi.

²⁸Chule amahon ompho chaokol ho le boitong sangkhol chaokol ho chu amahon patdum kipheh khatna akan matdiu, hiche chu phatah-a kipheh boitong sangkhol konggah chunga aumtheina ding le boitong sangkhola kona chu akikan louna dinga ahi.

²⁹Chule Aaron chun Pakai masanga hetjingna dinga munthenga chu achelut seh a-op phang dontah-a Israel chate min kijihna thutana ompho chu tantih neilouva apoh jingding ahi.

³⁰ Chule nangman Urim le Thummim chu thutana ompho sunga chu nakoilut ding, chule Aaron Pakai anga ache tengle hichu alungchang dontah-a umding ahi. Hitia chu Aaron'in Israel chate thutana chu alung chung dontah-a imatih chana Pakai anga apohding ahi.

³¹Chule nanghon chuche boitong sangkhol chol chu adum jenga nasem dingu ahi.

³²Chule hichu achung le alai dona ahom khat umding; chule ahom kimvela chu a-eh louna dinga akhichahna tupat sangkhol ponung ngong khina khaokipheh detchet umding ahi.

³³Chule chuche geiho-a chu adum, asandup, asanthipma kolbuthei ho nasemding: chule akahho kimvela sana changeng ho nakhai ding ahi.

³⁴Sangkhol len gei kimvela chu sana changeng le kolbutheiga, sana changeng le kolbutheiga nasem ding ahi.

³⁵Hichu kinbolna dinga Aaron'in akivon ding; chule athi louna dinga, Pakai anga munthenga alutle apotle tengle agin kija ding ahi.

³⁶Chule sana thengsela kong khat nasemding, achunga chun mohor kikhen banga PAKAIYA DINGA ATHENG tia nakhet ding ahi.

³⁷Chule hichu delkop chunga aumtheina dinga patkhao dum khatna nabuding: hichu delkop masang jontah-a chu umding ahi.

³⁸Chule Aaron'in Israel chaten athiltheng tohouva athensona diu akhan gitlouna hou chu apoh nadinga hichu Aaron chalpanga umding ahi. Chule amaho chu Pakai anga san ahitheina dinguva hichu achalpanga apoh jingding ahi.

³⁹Chule tupat ngatsela sangkhol chol chungnung chu khut themtah-a najep hoi ding, tupat ngatsela delkop nasemding, chule konggah chu hoitah-a nakhui ding ahi.

⁴⁰Chule Aaron chapate dinga loupina ding le hoina dinga sangkhol sungnung nasema, amaho dinga konggah ho nasemding, chule delkop ho jong nasem ding ahi.

⁴¹Chule hicheho chu nasopipa Aaron le aumpi achapate navonpeh ding; chule amaho chun kamasanga thempu tohmuna keima eijentheina diuva thao nanu-a nasuhtheng ding, chule nachom khending ahi.

⁴²Chule asagoh-u khukhumna dingin amaho chu tupat pon tokaho nasempeh ding; hichu akonga pat apheigei lhungding ahi.

⁴³Chule hichu Aaron le achapaten houbuh ahunglut phatnu ham, ahiloule munthenga lhacha dinga maicham ahinnai phatnu ham tengule, khangit louna apoh uva athi louna dinguva achen chehdiu ahi. Hichu amale anunga achilhah channa jong a-itih-a dinga chonna dan kisun hiding ahi.