Read Thado Chin Potdohbu 29 Bible Online

Potdohbu 29 - Thado Chin bible

Potdohbu 29

¹Thempu tohmuna eijen theina diuva suhtheng ahina diuva amaho chunga nabolding chu hiche hi ahi: nolna beihel bongchalgol khat le kelngoichal ni nalah ding,

²Chule cholsolou changlhah, thao toh kihal cholsolou changlhah le changlhah lum, chule thao toh kihal changlhah pheng nalah ding; hicheho chu suhlou changbong nelsela nasemding ahi.

³Hicheng chu nangman pocha sung khatna nakhol khoma, pocha puma nahin todoh ding; chule bongchal le kelngoichal teni jong chu nahin kailut paipai ding ahi.

⁴Chule Aaron le achapate chu houbuh mun'a chu nahinpuija, twija nakisil sah ding ahi.

⁵Chuteng le vonho chu nalah-a, Aaron chu boitong sangkhol leh pon sangkholen, boitong sangkhol le ompho chu navonpeh ding: chule khut themtah-a kijempah boitong sangkhol khaigahna-a chu akong nagehpeh ding ahi.

⁶Chule aluchanga chun delkop nakop peh-a, lukhuh theng chu delkop chunga chu nakhuhsah ding ahi.

⁷Chuteng nuding thao chu nalah ding, alu chunga nalhei lhah-a, amachu thao nanuding ahi.

⁸Chule achapate chu hinpuilut nahin puilut ding, sangkhol chol chungnung na-ah peh ding ahi.

⁹Chule Aaron le achapate chu konggah ho nageh peh-a, delkop nakoppeh ding: chule thempu tohmun chu amahoa dinga a-itih-a chonna dan khatna umding ahitai. Chule nangman Aaron le achapate chu nathenso ding ahi.

¹⁰Chule bongchal chu houkhom ho houbuh masanga nahin kailut sah ding; chule Aaron le achapaten bongchal luchunga chu akhutnu angapdiu ahi.

¹¹Chule houkhom ho houbuh kotphung Pakai angsunga chu bongchal chu nathading ahi.

¹²Chule bongchal thisan chu nalah-a, nakhut junga maicham sakiho chunga chu nakoiding; chule thisan jouse chu maicham bula chu nasunlhah ding ahi.

¹³Chule asunga beh athao jouse nalah-a, athin chunga athaolom, akalteni chule achunga thao ho chu maicham chunga nahalding ahi.

¹⁴Ahin chuche bongchal saphe le avun, chule a-eh chu gebuh polama meija nagovam ding ahi. Hichu chonset thilto ahi.

¹⁵Chule kelngoichal chu nalah-a, Aaron le achapate chun kelngoichal luchanga chu akhutnu angapdiu ahi.

¹⁶Chule kelngoichal chu nathading, chule athisan chu nalah-a maicham chung kimvel chu nathekhum ding ahi.

¹⁷Chule kelngoichal chu ahal ahalla nasem nonga, asung ho le akeng ho chu nasopding, ahal hala asa semnong sa le alu chutoh nakoitha ding ahi.

¹⁸ Chule kelngoichal chu apumpia maicham chunga nagoding ahi. Hichu Pakai dinga govam thilto ahin; hichu Pakaiya dinga meija kisem thilto, gimnamtui tah chu ahi.

¹⁹Chule kelngoichal dang khat chu nalah-a, Aaron le achapate chun kelngoichal luchanga chu akhutnu angapdiu ahi.

²⁰Chuteng nangman kelngoichal chu natha ding, chule athi chu nalah-a Aaron jetlam bilkol monga, achate jetlam bilkol monga, akhut jetlamu khutpi chung, chule akeng jetlamu kengpi chunga chun nanuding, chule athisan chu maicham kimvela nathe ding ahi.

²¹Chule maicham chunga um thisan le kinuding thao chu nalah-a, Aaron chung, avon chung, achate chung, aumpi achate von chunga nathekhum ding; chuteng amajong, avonjong, achate jong, chule aumpi achate von jong chu thengding ahi.

²²Nangman Kelngoichal thao le ameithao, asunga kai athaoho, ala kimvela athao le akalteni tom athao, chule alengkou jetlama chu nalah ding ahi; ajehchu kelngoichal chu ganlhaina dia kipesa ahi.

²³Chule Pakai angsunga um changlhah lum khat, thaova kikang changlhah khat, pocha sunga kon cholsolou changlhah kikang peh khat nalah ding:

²⁴Aaron le achate khutna aboncha nakoiding; chule Pakai angsunga jap thilto-a dinga najap ding ahi.

²⁵Chule hichu nangman amaho khutna kona chu nalah-a, Pakai angsunga gimnamtui tah hidinga maicham chunga chu nago ding ahi: hichu Pakaiya dinga meija kisem thilto ahi.

²⁶Chule Aaron'in kipehthenga atodohsa kelngoi om chu nalah-a, Pakai angsunga jap thilto-a dinga najap ding ahi: chule hiche chu nang chan hiding ahi.

²⁷Chule Aaron'a ding le achate-a dinga kithensona kelngoija kona chu jap thilto a-om le, thilto adah bul chu nathenso ding; hichu jap thilto le dop thilto ahi.

²⁸Hichu Israel chate-a kona tonsot chondan dinga Aaron le achapate chan hiding ahi. Ajehchu dop thilto ahin: chule hichu Israel chaten Pakaiya dinga adop thiltou, achamna thiltou ganlhaina-a kona dop thilto dingu chu ahi.

²⁹Chule hichea chu thao akinu uva chule akipehtheng nadinguva, Aaron vontheng hochu ama nungteng achate-a hiding ahi.

³⁰Chule acha ama khela thempu-a pangpa chun muntheng mun'a natong dinga houkhom na houbuh-a mun'a chu ahung tengleh, vonho chu nisagi akivon ding ahi.

³¹Chule kipeh thengna kelngoi chu nangin nalah-a, chule apheho chu munthenga chu nahon ding ahi.

³²Chule Aaron le achapaten kelngoi sa chu pocha sunga kikoi changlhah chutoh, houbuhho houbuh kot koma chu anehdiu ahi.

³³Chule amahon longlhenna kibolho chu akipehtheng nadiu le akisuhtheng nadiuva anehdiu: amavang thiltheng ahijeh-a, gamdang mi vang anehsah loudiu ahi.

³⁴Ijemtia kipeh thengna saphe le changlhah chu jingkah geija aval aumle, nangman hicheho chu meija nahalvam ding ahi: ajehchu atheng ahi jeh-a nehlou ding ahi.

³⁵Chule keiman kathupeh banga nangman Aaron le achapate chunga nabol ding ahi: nisagi sung amaho dinga kipeh thengna nabolpeh ding ahi.

³⁶Chule nangnam niseh le longlhen na-a dinga chonset thilto-a bongchal khat natoding: chule nangman hiche-a dinga chu longlhena naboljou tengle maicham chu nasop thengding; chule suhthengna dinga thao nanu ding ahi.

³⁷Nangman ni sagi sunga maichama dinga longlhenna nabola chule nasuhtheng ding; chutengle maicham thengchung nung hiding ahitai: ipi hijongle maicham tongkha chanchu thengjeng ding ahi.

³⁸Tun maichama natoding chu hiche hi ahi: kum khat lhingbep kelngoi ni niseh-a nato ding ahi.

³⁹Kelngoi khat chu jingkah lamleh natoding; chule kelngoi dang khat chu nilhah lamle natoding ahi.

⁴⁰Chule kelngoi khat dinga chu changbong neljet ephah hopsom-a hopkhat le thao kihehdoh hin khat hopli hopkhat hiding; chule don thilto-a dinga lengpitwi hin hopli-a hopkhat hiding ahi.

⁴¹Chule kelngoi khat jopa chu nilhah lamle natoding, chule jingkah-a anneh thilto kitoh bang le don thilto kitoh banga Pakaiya dinga meija kisem thilto, gimnamtui tah hidinga nato ding ahi.

⁴²Hiche hi nangma kihoupi dinga kakimuto pina ding mun Pakai angsunga houkhom ho houbuh kotphunga nakhang khanguva dinga tanglouva govam thilto kiboljing chu hiding ahi.

⁴³Chule hiche mun'a chu Israel chatetoh kakimuto ding, chule houbuh chu kaloupi na-a suhthenga umding ahi.

⁴⁴Chule keiman houkhom ho houbuh le maicham chu kasuhtheng ding: chujongle Aaron le achapate chu thempu natohna mun'a keima lhacha natong dinga kasuhtheng ding ahi.

⁴⁵Chule keima Israel chate lah-a kachena, chule a-Pathen'u kahiding ahi.

⁴⁶Chule amahon amaho lah-a kachen theina dinga, Egypt gama kona amaho hinpui dohpa, Pakai a-Pathen'u kahi ahet dingu ahi: keima Pakai a-Pathen'u chu kahi.