Read Thado Chin Potdohbu 30 Bible Online

Potdohbu 30 - Thado Chin bible

Potdohbu 30

¹Chule nangman gimnamtui halna maicham nasem ding: hichu nangman thinggi thinga nasemding ahi.

²Hichu adung tongkhat chule avai tong khat hiding; aningli hiding, chule atun tongni hiding, akijong hitobangma chu sangding ahi.

³Chule nangman achungvum, avel pumpi-a, chule akiho chu sana-a natomding; chule nangman akimvel chu sana lallukhuh-a nasemding ahi.

⁴Chule nangman sana chaokol ni lallukhuh lim noija chun nasemding, aningtenia jong, apangtenia jong, chule hicheho chu amoljolho kithilna hiding ahi.

⁵Chule nangman amoljolho chu thinggi thinga nasema, sana-a nalonkhum ding ahi.

⁶Chule nangman hichu kakimutopi nading mun, hettohsahna thingkhong kom, hepi touna maija, hiche pondal maija chu nakoiding ahi.

⁷Chule Aaron'in hikoma chu jingkah sehleh gimnamtui ahalding; thaomei avahjou tengle, achunga gimnamtui ahalding ahi.

⁸Chule Aaron'in nilhah lama thaomei avahteng le gimnamtui chu ahalding, nakhang lhumkei uva Pakai masanga gimnamtui kihal hiding ahi.

⁹Nangman hiche chunga chu gimnamtui chomdang khat nahal lou ding, govam thilto, anneh thilto jong nato louding, chule achunga don thilto jong nasunlhah louding ahi.

¹⁰Chule longlhena chonset thilto-a chu Aaron'in kumkhat le saki chunga chu longlhenna khatvei abolding; akhang akhanga chu kumkhatna khatvei hiche chunga chu longlhenna abolding ahi: hichu Pakaiya dinga atheng chungnung ahi.

¹¹Chuin Pakaiyin Mosi henga aseijin, hitin ati,

¹²Nangman Israel chate chu ajatnu hetna dinga aminu nasim tengle, nangman nasim tengu le alah uva hise aumlouna dinga; ajatnu nasim dungjuija amitakipmin amading cheh-a Pakai henga ahinna man dingu apeh cheh dingu ahi.

¹³ Apeh dingu chu hichehi ahi, akisim sahho lah-a lutding jouse chun muntheng shekel dungjuija shekel kehkhat cheh apehdiu ahi: (shekel khat chu gerah somni ahi:) Shekel keh chu Pakaiya thilto hiding ahi.

¹⁴Akisim saho lah-a lutding jouse, kum somni apat chunglang sechun Pakaiya dinga thilto apeh cheh dingu ahi.

¹⁵Nahinna longlhenna dinga Pakai koma thilto abol tengule, ahaovin jong shekel kehval apehlou ding, chule avaijin jong shekel keh lhinglou apehlou ding ahi.

¹⁶Chule nangman Israelte longlhenna sum chu nalahding, hichu houkhomna houbuh natohna-a naman ding ahi; hichu nahinnao longlhenna bolna dinga, Pakai angsung Israel chatea dinga melchihna hiding ahi.

¹⁷Chuin Pakaiyin Mosi henga aseijin, hitin ati,

¹⁸ Nangman kisilnading sum-enga kisem, akeng jongchu sum-eng hiding, twidol khat nasem ding ahi: chule hichu houkhom ho houbuh le maicham kah-a nakoija, chule asunga twi nakoi ding ahi.

¹⁹Ajehchu hichea chu Aaron le achapaten akhut akeng akisilngim ji dingu ahi:

²⁰Amaho mipi houkhom na houbuh sunga alut tengule, ahiloule Pakaiya dinga meija kisem thilto hal dinga maichama ahung tengule; athilouna dinguva chu akhut akeng akisildiu ahi.

²¹Hitia chu athi louna dinguva akhut akengu akisildiu: chule hichu akhang khanguva a-itih-a dinga ama le achate-a dinga tonsot chondan hijing ding ahitai.

²² Chukalvalin Pakaiyin Mosi henga aseijin, hitin ati,

²³Nangman gimnamtui loupiho, myrrh thengtah-a kisem shekel janga, chule thingthal namtui tah-a kisem shekel jani leh somnga, chule kolchu lhum shekel jani le somnga jong,

²⁴Chule munthenga shekel dungjuijin halnamtui shekel janga, chule olive thao hin khat nahenga lan.

²⁵Chule nangman hicheho-a chu lou sem themho sem banga thaotheng nasem ding; hichu kinuding thao theng hiding ahi.

²⁶Chule nangman hichea chu houkhom ho houbuh le hettohsahna thingkhong chu thao nanu ding ahi.

²⁷Chule dokhang le akong le bel jouse, athaomei khomle avahna lhengho, chule gimnamtui halna maicham,

²⁸Chule govam thiltona maicham le akong le bel jouse, chule sum-eng twidol le akhomjong hiche thao chu nanu ding ahi.

²⁹Chule theng chungnung ahina dinguva nangman nasuhtheng ding; chule hicheho atongkha jouse atheng hiding ahi.

³⁰Chule amaho thempu mun'a kalhacha na atoh theina dinguva, Aaron le achapate jong chu thao nanu-a nasuh theng ding ahi.

³¹Chule nangman Israel chate koma hitia naseiding ahi, Hichehi nakhang khanguva keima-a dinga kinu ding thao theng ahitai.

³²Hichehi mihem tahsaphe chunga nasunlhah loudiu, ahiloule hitobanga kihal thao tobang hi adang jong nasemlou dingu ahi: atheng ahin, nangho-a dinga atheng hiding ahi.

³³Koi hijongle hiche tobanga kihal thao sema, ahiloule hetlou mi chunga sunglha-a aumleh, amachu amite lah-a kona kipaidoh ding ahi.

³⁴Chule Pakaiyin Mosi henga aseijin, Nangman gimnamtui ho, thingnai, ngavun namtui, ankam namtui; hicheho tohin bego thengtah agih danu kibang chetnin lan.

³⁵Chule nangman lou semhon phatah-a asem bangun, phatechan ngimsel le thengselin gimnamtui semin.

³⁶Chule nangman phabep chu navoh bongselin lang, nangma kakimutopi nading mun, houkhom ho houbuh sunga hettohsahna masanga chun koijin: hichu nangma dinga theng chungnung hiding ahi.

³⁷Chule hiche gimnamtui nasem banga chu, nangman nangma-a dinga hitobanga kihal gimnamtui nasem louding ahi: hichu nangma-a dinga Pakaiya atheng ahi.

³⁸Koi hijongleh manchah dinga hitobang thao chu asema aumle, amite lah-a kona paidoh-a umding ahi.