Read Thado Chin Potdohbu 31 Bible Online

Potdohbu 31 - Thado Chin bible

Potdohbu 31

¹Chuin Pakaiyin Mosi henga aseijin, hitin ati,

²Ven Keiman Judah phunga kon Uri chapa, Hur chapa, Bezalel chu aminin kakouve;

³Chule amachu chihna-in, hetna-in, lungthimin, chule tohna dan jouse-a Pathen lhagaova kadimsah-in,

⁴Khut them natoh ho hichu sana, dangka, chule sum-eng,

⁵Song tanboh le settoh, thingpeh vutoh, chule khut them natoh jouse tongdingin.

⁶Chule ven, Dan phunga kon Ahisamach chapa Aholiab chu ahenga kapetai. Chule keiman nangma kapeh thupeh jouse chu amahon aboltheina dingun miching jouse lungsunga chihna kakoipehtan ahi.

⁷Houkhom ho houbuh le hettohsahna thingkhong, chule hiche chunga um hepi touna le houbuh manchah jouse chu,

⁸Chule dokhang le amanchah jouse, thaomei khom tuna theng le amanchah jouse, chule gimnamtui halna maicham,

⁹Chule govam thiltona maicham le amanchah jouse, twidol le akeng,

¹⁰Lhacha natohna ponho, Aaron thempu von thengho, thempuho natohna mun'a akivondiu achate von,

¹¹Chule nuding thao le munthenga dinga gimnamtui: hicheho jouse hi keiman thu kapeh jouse dungjuija amahon aboldingu ahi, ati.

¹²Chuin Pakaiyin Mosi henga aseijin, hitin ati,

¹³Nangman Israel chate jah-a jong hitihin seijin, Tahbeh-a nanghon kacholngah nikhoho nanit dingu ahi: ajehchu nanghon keimahi nasutheng uva Pakai kahi ti nahettheina dinguva; hichu nakhangu lhumkeija keima le nangho kikah-a melchihna hiding ahi.

¹⁴Hijeh-a chu nanghon Sabbath nanitdiu ahi; ajehchu hichu nangho dinga atheng ahi. Koi hijongleh asuboh chanchu kithat ding ahi: ajehchu chuche nikho-a natonga tapou chu, hiche hinna chu amite lah-a kona paidoh-a umding ahi.

¹⁵ Nigup sunga na natohdiu ahin, ni sagi ni vang chu choldo nadinga cholngahni, Pakaiya dinga atheng ahi: koi hijongle cholngah nikho-a natoh kiti tapou tonga chu thatei ding ahi.

¹⁶Hijeh-a chu Israel chaten kumkho-a kitepna hidinga akhang khanguva cholngah nikho chu anit theina dinguva, cholngahni chu anit dingu ahi.

¹⁷ Hichu a-itih-a dinga keima le Israelte kikah-a melchihna hiding ahi: ajehchu nigup sungin Pakaiyin van le lei asemin, chule nisagi nin akicholdon, akitha-olin ahi.

¹⁸Chuin Sinai molsang chunga akihoupi jou phatchun, aman Mosi henga hettohsahna songpheng ni, Pathen khutna kisun songpheng chu apetan ahi.