Read Thado Chin Potdohbu 32 Bible Online

Potdohbu 32 - Thado Chin bible

Potdohbu 32

¹ Chuin mipi chun Mosi molsanga kona ahung kumlhah vahlou amu phatnun, mipi chu Aaron koma ahung kikhom khomun, ahenga, Kipatdoh-in, keiho masanga che dingin pathenho neisem peh-un: ajehchu Egypt gama kona eihin puidoh uva hiche Mosi hi iti hitam kahe tapouve, atiuvin ahi.

²Chuin Aaron'in amaho jah-a, Nanghon na inneipi teo, nachapa teo, nachanu teo sana bilba chu abonchan ladoh-un lang, hicheho chu kahenga hinchoijun, ati.

³Chuin mipi jouse chun abiluva um sana bilba jouse chu aladoh-un, Aaron henga ahinchoi taove.

⁴ Chuin aman amaho khutna konchun hicheho chu alan, asemna manchah mangin asemin, bongnou lim khat asemin ahi. Chuin amahon, Vo Israel, hichehi Egypt gama kona nahin puidoh uva na pathen hou chu hihen ati.

⁵Chuin Aaron'in hichu amuphatnin, amasanga maicham khat asemin; chule Aaron'in, Jing nikho khu Pakaiya dinga kut ahi, tin aphongdoh tan ahi.

⁶ Chuin amaho ajingin matah-in athoudoh-un, govam thilto atoh-un, chule chamna thilto ahinchoijun; chuin mipi ho chu adon dingle ane dingin atouvun, chule alam dingin akipat doh-un ahi.

⁷Chuin Pakaiyin Mosi jah-a, Chen, kumlhan: ajehchu Egypt gama kona nahin puidoh namite khu akisuboh gam taovin ahi.

⁸Amaho gangtah-in keiman kathupeh-a konchun lamchom beh-a akihei taovin: amahon bongnou kilhajol asemun, hichu ahouvun, chule ahenga kilhaina abolun, Vo Israel, hichehi Egypt gama kona nahin puidoh uva na pathen hou chu hihen atiuvin ahi, ati.

⁹Chule Pakaiyin Mosi jah-a, Hiche miho hi ken kamutan, chule ven, amaho hi milouchal tah te ahiuve.

¹⁰Hijeh chun tun achunguva kalunghan na asoudoh-a, amaho kasuh manghel nadingin, keima neichang lhan: chule keiman nanga kona nam lentah khat kasem ding ahi, ati.

¹¹ Chuin Mosi Pakai a-Pathen henga ataovin, Pakai, thilboltheina nasatah le khut thahat tah-a Egypt gama kona nahin puidoh namite chunga ibola nalunghanna soudoh jenga ham?

¹²Ipi dinga Egypt miten, Molsang ho-a thagam dingle, leiset chunga kona suhmang dinga aman dihlou tah-a amaho khu apuidoh ahi, ati dingu ham? Nalunghan na nasatah-a konin kile heijinlang, namite douna-a thil gilou na ngaitona-a konhin nalung hinheijin.

¹³ Chule keiman nachilhah kapunsah-a, van'a ahsijat kaphahsah ding, chule keiman kasei hiche gam jouse hi nachilhahte kapeh ding, amahon atonsotna alo dingu ahi tia Abraham, Isaac, chule Jacob henga nangma le nangma nana kihahsela nasei chu geldoh-in, ati.

¹⁴Chuin Pakaiyin amite chunga thilphalou bol ding angaitona-a konin alung aheitan ahi.

¹⁵Chuin Mosi akiheijin, molsanga konchun achesuh-in, hettohsahna songpheng teni chu akhutna achoijin ahi. Songpheng chu ani lang to-a kisun ahin; langkhat le akileh lang panga chu akisuna ahi.

¹⁶Chule songpheng chu Pathen khutsoh ahin, akisun chu Pathen khutsut, songpheng chunga chu kisuna ahi.

¹⁷Chuin Joshua'n mipi awgin thong chu ajah phatnin, Mosi jah-a, Gebuh-a gal husa aume, ati.

¹⁸Ahin aman, Galjona-a kisam awgin ahipon, chule gal lelna-a kisam awgin jong ahipoi, amavang keiman kajah hi la kisa awgin ahi, ati.

¹⁹Chuin ahitin ahi, ama gebuh ahungnai phatnin, bongnou lim kisem le alamu chu amutai. Chuin Mosi alunghana asoudoh tan, akhutna songpheng ni chu aseplhan, chule mol bula chun asukehtan ahi.

²⁰Chuin aman asemu bongnou lim chu alan, meija agouvin, chule asubong selin, twi chunga athen, Israel chate chu adonsah-in ahi.

²¹Chuin Mosi'n Aaron jah-a, Mipi hohin nachunga ipi aboluva, nangman hitobang chonset nasatah hi achunguva nalhunsah ham? ati.

²²Chuin Aaron'in, Ka pakai lunghanna hi soudoh hih hen: nangman hiche mite hi thilphalou bolnom mi ahiu nahen ahi.

²³Ajehchu amahon kahenga, Keiho masanga che dingin pathenho neisem peh-un: ajehchu Egypt gama kona eihin puidoh uva hiche Mosi hi iti hitam kihe tapouve, atiu ahi.

²⁴Hichun keiman amaho koma, Koi hijongle sana neijousen hinsut lhaohen, kati. Hitichun amahon keima eipeovin: chule keiman hichu meija kalelut le hiche bongnou hi hungsoh doh-a ahi, ati.

²⁵Chuin Mosi'n mipi ho chu sagoh keuva aumu amu phatnin; (ajehchu Aaron'in amaho chu agalmite lah-a ajachat na dinguva von beija akoi ahi.)

²⁶Hichun Mosi gebuh kotpi phunga adingin, Pakai lama panga umem? amaho chu kahenga hunghen, ati. Chuin Levi chapate jouse chu ahenga akikhom khom taovin ahi.

²⁷Chuin aman ajah uva, Israel Pakai Pathen'in hitin ati, Amitakipmin apanga chemjam kikocheh henlang, gebuh sung jouse-a kotpi khatna konin kotpi khatna lutle potleu hen, chule amitakipmin asopi, amitakipmin akivop piho, chule amitakipmin aheng akom that hen, tin aseije, ati.

²⁸Chuin Levi chapate chun Mosi thu seibangin abol taovin: hiche nikho-a chun mi sangthum tobang athin ahi.

²⁹Hitichun Mosi'n, Tunia hi aman nangho phatthei naboh theina dingun, tunikho hin nangho amitakip achapa chungle asopipa chunga Pakaiya dingin kithensouvin ati.

³⁰Chuin ajingin ahitin ahi, Mosi'n mipi ho jah-a chun, Nangho nasatah-in nachonse taove: chule tu-a hi keima Pakai henga kache touva; ahitheile nachonset nao longlhenna kagabol ding ahi, ati.

³¹Chuin Mosi Pakai henglama ahung kilen, ahenga, Ohe, hiche miho hin chonset nasatah abol taovin, chule sana-in bongnou pathenho akisem taove.

³² Hijongle tun, nangman achonsetnao nangaidam dinga ahile -; chule nangaidam louding ahile, katao ahi, nangman nasutsa lekhabua konin kamin ladohtan, ati.

³³Chuin Pakaiyin Mosi jah-a, Koi hijongle keima douna-a chonse chan chu, kalekhabua kona kalahdoh ding ahi.

³⁴Hijeh chun tun chen, mipi ho chu keiman nahenga kaseipehna mun'a chun puitan: ven, kavantil namasanga cheding ahi: hijeng jongle keiman kavil nikho leh achunguva chonset naho chu kavil ding ahi, ati.

³⁵Chuin Aaron'in asempeh-u bongnou chunga athilbol jeh-u chun, Pakaiyin mipi ho chu hise-in agot tan ahi.