Read Thado Chin Potdohbu 33 Bible Online

Potdohbu 33 - Thado Chin bible

Potdohbu 33

¹ Chuin Pakaiyin Mosi jah-a, Kipatdoh-in, keiman Abraham, Isaac, chule Jacob henga kana kihahsela, Keiman nachilhahte kapeh ding ahi, tia kaseina gama chun, nangma le Egypt gama kona nahin puidoh mipi ho chu hikoma konhin chetou taovin.

²Chule keiman namasanguva vantil kasolding; chule keiman Canaan mite, Amor mite, Hit mite, Perizz mite, Hiv mite, chule Jebus mite chu kadeldoh ding ahi.

³Khoiju le bongnoi lona gama chun chetouvun; keiman nalah uva nangho to kachetou louding ahi; ajehchu nangho milouchal tahte nahiu ahi: achuti loule lampia sumangpa getnung kate, ati.

⁴Chule mipi chun hitobang thugilou ajah phatnun, amaho alunghemun; koimacha akijema aum tapouvin ahi.

⁵Ajehchu Pakaiyin Mosi jah-a, Israel chateho koma hitihin seijin, Nangho milouchal te nahiuve: chomlouva nalahtah uva kahungtouva, kasuhmang ding nahiuve. Hijeh chun tun nachung uva ipi kabolding kahet theina dingin, nakijepnao jouse chu nangho-a konin sutlhaovin, ati ahi.

⁶Chuin Israel chate ho chun Horeb molsanga chun akijepnao jouseu asutlhagam taovin ahi.

⁷Chuin Mosi'n houbuh chu alan, gebuh pam lam gebuh-a kona gam latah in asongin; hichu houkhom ho houbuh tin aminvo tan ahi. Chuin ahung hitin ahi, amitakip Pakai holchan chu gebuh pama um houkhom ho houbuh-a chun acheuvin ahi.

⁸Chuin ahitin ahi, Mosi houbuh-a dinga ahungdoh chun, mipi chu akipat doh-un, amitakip amaho gena ponbuh kotbul cheh-a adingun, Mosi chu houbuh-a alutkahsen avetaovin ahi.

⁹Chuin ahitin ahi, Mosi houbuh-a alut tolhonin, meilom khompi khat ahung kumlhan, houbuh kotphunga chun ading denin; chuin Pakai chu Mosi to akihoulim lhontan ahi.

¹⁰Chule mipi chun houbuh kotphunga meilom khompi akitun chu amuvin ahi. Chuin mijouse akipat doh-un, amaho ponbuh kotpi cheh-a konchun Pakai chu ahou taovin ahi.

¹¹Chuin Pakaiyin Mosi chu mikhatnin agolpa akihoupi bangin kimaiton akihoupin ahi. Chuin ama gebuh mun lama chun ahungtai: ahinla asohpa Nun chapa Joshua, golhangpa vang chu houbuh-a konin ahung doh tapon ahi.

¹²Chuin Mosi'n Pakai henga, Ven nangman kahenga, Hiche mipi ho hinpui touvin natin, chule kakilhonpi dinga koi neisolpeh got ham neihetsah pon; ahinla nangman, Keiman nangma naminin kahei, chule kamitmu-a lungsetna nachange, natin ahi.

¹³Hijeh chun tun katao ahi, namitmu-a lungsetna kachana ahile, nangma kahetna ding le nangma mitmu-a lungsetna kachan nadingin nalampi neihilin; chule hiche nam mite hi namite ahi tin gelin, ati.

¹⁴Chuin aman, kaumpinan nalhonpiu vintin, chule cholngahna kapeh ding nahiuve, ati.

¹⁵Chuin aman ajah-a aseijin, Na-umpinan eilhonpi louleh hia konhin neipuitou datao vin.

¹⁶Ajehchu nangman neilhonpi lou uva ahile keima le namitehin namitmu-a lungsetna kachang-uve tihi iti kahetthei ding ham? Chutile keiho, keima le namite hi leiset chunga um miho-a kona sepkhena kaum dingu ahi, ati.

¹⁷Chuin Pakaiyin Mosi jah-a, Nangman nasei thilho jonghi kabol ding ahi: ajehchu kamitmun lungsetna nachangin, chule keiman nangma naminin kahen ahi, ati.

¹⁸Chule aman, Nahenga katao ahi, naloupi na chu neimusah-in, ati.

¹⁹ Chuin aman, Keiman kaphatna jouse namasanga kichesah ding, na-angsunga Pakai minchu kaphonjal ding ahi. Chule keiman kalungset ding chu kalungsetna, chule hepina kamusah ding pa chu hepina kamusah ding ahi, ati.

²⁰Chuin aman, Nangman kamai namuthei louding ahi: ajehchu eimu-a chu koima ahinga umlou ding ahi, ati.

²¹Chuin Pakaiyin, Ven, kakoma mun khat aume, chule nangma songpi chunga nadin ding ahi.

²²Chule hung hiti ding ahi, kaloupinan nahin jotpa tengle, nangma songpi khikeh kah khatna kakoiding, nangma kapal galkai kahse-a kakhutna kakhuding:

²³Chule keiman kakhut kalah doh-a, nangman kanunglam namu ding ahi: kamai vang namu louding ahi, ati.