Read Thado Chin Potdohbu 34 Bible Online

Potdohbu 34 - Thado Chin bible

Potdohbu 34

¹Chuin Pakaiyin Mosi henga, Nangman amasa bang bang chun songpheng ni khengin; chule nangman nasuhchip songpheng chunga kisun thu tobang bang chu hiche songpheng teni chunga chu kasut ding ahi.

²Chuleh jingkah leh kigonlang Sinai molsanga hungin, chule molsang vuma khun kakoma hung kilah-in.

³Chule koimacha nangma toh hunglhon tou louding, chule molsang pumpi-a jong koimacha kimulou ding; chule kelngoi hon ho le ganchahon jong hiche molsang panga chu an nanehsah lou dingu ahi, ati.

⁴Chuin aman amasa bangin songpheng ni akhengin ahi. Chuin Mosi jingpitah-in athouvin, Pakaiyin athupeh bangin Sinai molsanga chun akaltouvin, songpheng ni chu akhutna achoijin ahi.

⁵Chuin Pakai chu meibol lah-a ahung kumlhah, amatoh chua ading khomin, chule Pakai minchu aphongjal tan ahi.

⁶ Chuin Pakaiyin amasang ahin jotpan, Pakai, Pakai Pathen, lungset le hepina-a dim, chule phatna le thutah-a bulhingset,

⁷Sang tamtah chunga hepina nei, khangilouna, suhkhelna le chonsete ngaidam, themona mohseh-a subeilou; pate khangit louna chate chung le achate chateho chunga khangthum khangli changeija viljing, tin aphongjalin ahi.

⁸Chuin Mosi mangang tah-in tollah akunin, ama chu ahoutan ahi.

⁹Chuin aman, Vo Pakai, tu-a hi namitmu-a lungsetna kachana ahile, nahenga katao ahi, ka pakai chu keihotoh lhonkhom hen; ajehchu milouchal tahte ahiuve; chule kakhangit lounao le kachonsetnao ngaidamin lang, nagou lodin neilaovin, ati.

¹⁰Chuin aman, Ven, keiman kitepna kaseme: keima namite jouse masanga leiset chung jouse-a koima nam lah-a jong ana kibol khalou thil kidang kabol ding: chule naumna namite jousen Pakai natoh chu amudingu ahi. Ajehchu nangtoh katoh ding chu tijat umtah thil hiding ahi.

¹¹Tunia nahenga kathupeh hi nitnin: ven, keiman Amor mite, Canaan mite, Hit mite, Perizz mite, Hiv mite chule Jebus mite chu nangho masanga kadelmang ding ahi.

¹²Kichih theijin, achutiloule nachena gama miho toh kitepna semun natin, ajole hichu nalah uva thang hung hikha ding ahi.

¹³ Amavang nanghon amaichamu nasuh mangdiu, amilim hou navoh bohdiu, chule adoikhom hou chu naphuh lhuh diu ahi.

¹⁴Chule pathen dangho nahou loudiu ahi: ajehchu Pakai amin thangthip kitipa chu, thangthip Pathen ahi:

¹⁵Achuti loule agama cheng hotoh kitepna neijin natin, amahon a-pathenhou toh jonthanhoi aboluva, a-pathenhou henga ganlhaina aboldingu, chule khat touvin nahin kou-a, aganlhaina sachu naganeh khah dingu;

¹⁶Chule nangman nachapate dinga achanu teo nalah-a, chule achanuteu chu a-pathenhou henga jonthanhoi boldinga chediu, chuteng nachapateo jong a-pathenhou henga ajonthanhoi sah dingu ahi.

¹⁷ Nangho-a dinga semthu pathen nakisem lou dingu ahi.

¹⁸ Nanghon cholsolou changlhah kut nabol jing dingu ahi. Abib lha phat sunga keiman kathupeh dungjuija, nisagi cholsolou changlhah naneh dingu ahi: ajehchu nangho Egypt gama kona Abib lha-a nahung doh-u ahi.

¹⁹ Naobu hinphukeh tapou chu keija ahin; chule gancha lah-a apeng masapen jouse, bong hihen, kelngoi hijongleh achal jouse chu keija ahi.

²⁰ Ahivangin sangan apeng masapen jouse chu kelngoija nalhatdoh dingu ahi: ijemtia nalhatdoh lou dinga ahileh, angong naheboh dingu ahi. Nachateo asoh masa jouse chu nalhatdoh dingu ahi. Chule koimacha akhutgoh-a ka-angsunga kilah louding ahi.

²¹ Nigup sunga na natoh ding ahin, amavang nisagi chan nileh nacholdo ding: loukai laile chang-at laija jong nacholdo dingu ahi.

²² Chule nanghon suhlou chang gamasapen ahunglhun tengle hapta kut nanit dingu, chule kum kichai tengle lhoga khoptup kut nanit dingu ahi.

²³Nachapateo jouse chu kumkhat sunga thumvei Pakai Pathen, Israel Pathen masanga hungkilah chehdiu ahi.

²⁴Ajehchu namasanga kona namtinho chu kadeldoh ding, nagamgiho kakehlet ding ahi. Chuche kumkhat sunga Pakai na-Pathen angsunga kilah dinga thumvei nachetou kah-a chu, koimachan jong nagam avetlel louding ahi.

²⁵ Nangman keima dinga ganlhaina kibol thisan chu chol toh natotha louhel ding; chule kalchuh kut ganlhaina ho jong chu jingkah geija nakoi louding ahi.

²⁶ Nagam ga masaho lah-a aga masapen chu Pakai na-Pathen in'a nahinchoi ding ahi. Nangman kelnou sa chu api noitwija nahonlou ding ahi, ati.

²⁷Chuin Pakaiyin Mosi henga, Nangman hiche thuho hi sunin: ajehchu hiche thuho banga hi nangma le Israelte toh kitepna kasem ahi, ati.

²⁸Chuin ama chua chun Pakai toh nisomli le jan somli aumin; aman changlhah jong anepon twi jong adonpon ahi. Chule aman songpheng chunga chun kitepna thu, thupeh som chu asuntan ahi.

²⁹ Chuin ahitin ahi, Mosi Sinai molsang kona kitepna songpheng teni akhutna ahinchoija ahungsuh phatnin, molsang chunga kona ahung kumsuh chun, amatoh akihoupetna amai vah chu Mosi'n ahepon ahi.

³⁰Chuin Aaron le Israel chate jousen Mosi amuphatnuvin, veuvin, amaiso chu avah-in, amahon ama kom naiding akichauvin ahi.

³¹Chuin Mosi'n amaho akouvin ahile, Aaron le mipi kikhomho lah-a lamkaiho jouse chu ahenga ahung kinungleu vin; Mosi'n amaho akihoupitan ahi.

³²Chuchejouvin Israel chate jouse chu ahung naijun: chuin aman Sinai molsanga Pakaiyin asei jouse chu amaho koma thupeh-in apetan ahi.

³³Chule Mosi'n athusei ajo kahsen, amai chu maikhu akhun ahi.

³⁴Ahivangin Mosi Pakai kihoupi dinga a-angsunga achelut tengle ahungdoh kit kahsen amai ahohdohjin ahi. Chule ahungdohjin ama thu kipe chu Israel chate aseipeh jin ahi.

³⁵Chule Israel chate chun Mosi maiso chu amu phat uvin, Mosi maiso chu avah-in ahi: chuin Mosi amatoh kihou dinga alutkit kahsen, amaija maikhu akhukit tan ahi.