Read Thado Chin Potdohbu 35 Bible Online

Potdohbu 35 - Thado Chin bible

Potdohbu 35

¹Chuin Mosi'n Israel chate houkhom ho jouse akoukhomin, ajah uva, Nanghon nabol dinguva Pakaiyin nathupeh-u thuho chu hicheho hi ahi.

² Nigup sunga na natoh dingu ahin, ni sagini vang chu nangho dinga nitheng ni hiding, Pakai dinga kicholdona cholngahna ni hiding ahi. Chuche ni-a natong chanchu thading ahi.

³Nangho nachennao gam pumpiuva cholngahni le mei nati louhel dingu ahi.

⁴Chuin Mosi'n Israel chate mipi houkhom ho jouse jah-a hitin ati, Hichehi Pakai thupeh ahi,

⁵Nanghon nalah uva konin Pakai henga toding thilpeh khat choicheh-un: koi hijongleh alungsunga penom channin Pakai henga thilpeh hinchoi hen; sana, dangka, sum-eng,

⁶Pon dum, ponsandup, ponsanthip, ponnem, chule kelmul,

⁷Kelngoichal vun kidesan, satuilut vun, chule thinggi thing,

⁸Vahding thaotwi, nuding thao namtui, chule gimnamtui,

⁹Khisonggel ho, boitong sangkhol le ompho-a behding songho.

¹⁰Chule nalah uva mi lungching chengse hunguntin, chule Pakai thupeh jouse hi aboldingu ahi.

¹¹Houbuh le achungkhu chule athingpehho, abanggol ho, akhom ho, achechah naho,

¹²Thingkhong, mol lhon ho, hepi tounamun, chule achung khuna pon,

¹³Dokhang le mol lhon ho, akong ho jouse, chule vetsahna changlhah,

¹⁴Avah dinga khoilu thaomei jong, athil le lo, athaomeiho, vahding thaotwi ho toh,

¹⁵Chule gimnamtui halna maicham mol lhonho, akinu ding thao, gimnamtui ho, chule houbuh lutna kotna kikhai ding pondal,

¹⁶Govam thiltona maicham, asum-eng ho, amol lhon ho, chule aum le abelho jouse le twiluina kong le akeng,

¹⁷Ahong sunga pondal kikhainaho le, akhomho akibutona ho, ahong kotpi pondal ho,

¹⁸Houbuh kilnaho, ahong kilna, chule akhaoho,

¹⁹Munthenga kinbolna ding, kinbolna ponho, thempu dinga vontheng ho le achapate vonho, thempu natohna mun'a kinbol nading, tin aseijin ahi.

²⁰Chule Israel chate houkhom ho jouse chu Mosi angsunga konin apotdoh taove.

²¹Chule alung kisuhthou le alhagaovin peh nomna apehchu ahungun, akinbolna ngaicha ding jouse le von thengho jouse din, mipi houkhom ho houbuh natohna-a Pakaiya thilto chu ahinchoijun ahi.

²²Chuin pasal ahin numei ahin alungsunga peh nomna nei jouse ahunguvin, chaojangho, bilbaho, khutjemho, khiho, chule sana kijepnaho jouse chu ahinchoijun: thilpeh pejouse chun Pakai henga thilto dingin sana atoh uvin ahi.

²³Chuin amijouse chun, koihile pon dum, ponsandup, ponsanthip, tupat ponnem, kelchavun, kelngoichal vun san theng, satuilut vunho neijousen ahin choijun ahi.

²⁴Amitakip dangka le sum-eng thilto pechan chun Pakaiya thilpeh ahin choijun: chule amitakip thinggi thing neijouse chun lhacha kinbolna din ahin choijun ahi.

²⁵Chule numei lungching jouse chun akhutnuva akheh-un pon dum, ponsandup, ponsanthip, tupat ponnem hochu ahin choijun ahi.

²⁶Chule chihna-a alungthimu kisuthou numei ho chun kelcha mul akheh-un ahi.

²⁷Chule vaipoho chun khi songgel hole songdang dangho chu boitong sangkhol le ompho-a beh dingin ahin choijun;

²⁸Lou namtui, vah-a ding thao, kinuding thao, chule gimnamtuija ding ahin choijun ahi.

²⁹Israel chaten Pakai henga lungcham thilto hochu ahinchoijun; numei ahin pasal ahin, alungin peh nomna aneisah jouse chun Pakaiyin Mosi khutna boldinga athupeh jouse bolna dingin ahin choijun ahi.

³⁰Chuin Mosi'n Israel chate koma, Veuvin, Pakaiyin Judah phunga, Hur chapa, Uri chapa Belzalel aminin akouvin;

³¹Chuin aman amachu chihna-in, hethemna-in, lungthim themna-in, chule natoh dan jouse-a dingin Pathen lhagaovin adimsah-in;

³²Sana, dangka, chule sum-eng natoh kidangho gongtoh dingin,

³³Chule songho at-tan dingdan, asettoh dingdan, thing-at dan, chule khutthem natoh jouse-a dingin Pathen lhagaovin adipmin ahi.

³⁴Aman ama le Dan phungmi Ahisamach chapa Aholiab chu mihil thei ahilhona dingin alungsung lhona chihna akhumpeh tan ahi.

³⁵Aman amanichu natohna jouse tohtheina, khutthem nale natoh themnalna, thil jih themna, pon dum, ponsandup, ponsanthip chule tupat ponnem jepthemna, ponkhom themna, mihemin abolthei jouse boltheina le, khutthem jouse thepna-in alungsunghon chihnan adipmin ahi, ati.