Read Thado Chin Potdohbu 36 Bible Online

Potdohbu 36 - Thado Chin bible

Potdohbu 36

¹Hichun Pakaiyin athupeh dungjuijin, Pakaiyin muntheng natohna-a natoh dingdan jouse hetthemna dinga chihna le hetna apeh miching jouse, chule Belzalel le Aholiab'in natoh chu apan taovin ahi.

²Chuin Mosi'n Belzalel le Aholiab, chule Pakaiyin alungthim uva chihna apeh michingho, chule natohna-a hunga na hungtong dinga alungthim kisuthou chan chu akouvin:

³Chule amahon muntheng sahna dingle asunga natoh thilbol na-a dinga Israel chaten ahin tokhom houchu Mosi khutna konin alauvin ahi. Chule amahon jingkah seh le ama henga lungcham thilpeh ahin choijing nalaijun ahi.

⁴Chuin munthenga natohho jouse tonga miching jouse amitakip anatohna-a konin ahungun;

⁵Chuin amahon Mosi henga, Miho hin natohna-a dinga Pakai thupeh sanga tamjo ahinchoi taovin ahi, atiuve.

⁶Chuin Mosi'n thupeh apen, hichu amahon gebuh jouse, Nangho pasal hihen numei hijongle koimachan muntheng natohna-a dinga ima natobe lou dingu ahitai, tin aphongjal leuvin ahi. Hitichun mipi chu athilto naova konchun asutang taovin ahi.

⁷Ajehchu athilnei houchu natohna dinga lhingset ahin, chule avalset ahitai.

⁸Chuin alah uva milungching takip houbuh-a natong ho chun tupat pon hoile mantam tah-in ponjal som adum, asanthip le asandup asemun; khutthem tah-in Cherub ho pumin hiho chu asemun ahi.

⁹Ponjal khatchu asao tong somni le get, ponjal khatchu avai tongli ahin, ponjal jouse chu akibangsoh-e.

¹⁰Chuin ponjal nga ho chu akhuimat nin, chule adang ponjal nga jong chu akhuimat nin ahi.

¹¹Chuin aman ni kisuhmatna ageilom laija konchun ponjal khat geija chun adum ajolkhat abil hom asemin ahi. Hibang chun aman anina kisuhtona sunga chun adang ponjal pamnung pena chun abollin ahi.

¹²Aman ponjal khatna chun abil somnga asemin, chule aman ani lhina ponjal patoh akisuhtona-a jong chun ponjal geilaijah abil somnga asemin, ponjal liho chu khatle khat akimatnin ahi.

¹³Chuin aman chechahna somnga sana-in asemin achechah sah-in ahi. Chule ponjal chu hiche achechahna mun'a chun akikolmat tan ahile hitichun houbuh khat asohtan ahi.

¹⁴Chuin aman houbuh chunglama chun pon in dingin kelmullin ponjal asemin ahi. Aman ponjal somlekhat asemin ahi.

¹⁵Ponjal asaodan chu tong somthum ahin, chule aponjal aletdan chu tong li ahi, ponjal somlekhat chu akibangsoh-in ahi.

¹⁶Chuin aman ponjal nga chu akhuimat nin, chule adang gup jong chu akhuimat nin ahi.

¹⁷Chuin aman ponjal kikilmatho mongpena chun abilhom somnga asemin chujongle ani lhina ponjal kikil monga jong chun abil hom somnga asemin ahi.

¹⁸Chuin aman khatseh ahitheina dingin chechahna somnga sum-eng in asemin ahi.

¹⁹Chule aman pon-in khukhumna dingin kelngoivun kinusan asemin, chule achunga chun satuilut vun akhun ahi.

²⁰Chule aman houbuh-a din thinggi thingpeh asemin, atungin ahi.

²¹Thingpeh saodan chu tong som ahin, chule avai chu tong khatle akeh ahi.

²²Thingpeh khat chun ako le abil kibangchet ni aneijin, hitobang chun aman houbuh thingpeh jouse chu asemin ahi.

²³Chule aman houbuh-a din thingpeh asemin; chule thingpeh somni chu noilam sanga noilam panga din aseme.

²⁴Chule aman hichu thingpeh somni noijachun dangka-a kisem kibutona somli asemin; akibuto naho ni-a ding chun thingpeh khat noija chun akibutona kohomni asemin; chule bulutna muh ni chu adang thingpeh-a bulutna muh ni ding ahi.

²⁵Chule houbuh pang langkhat sahlang ninga chun thingpeh somni asemin ahi.

²⁶Chule dangka-a abil somli kisem achun akibutona ko ni chu thingpeh khat ding ahin, chule adang akibutona ko ni chu thingpeh adang ding ahi.

²⁷Chule lhumlang sang houbuh panga chun aman thingpeh gup asemin ahi.

²⁸Chule aman thingpeh ni chu houbuh apang teni aning ni-a dingin asemin ahi.

²⁹Chule amaho chu anoija akimatnin, chule achung chu chaokollin akimatnin; hitichun aning jouse-a chun abollin ahi.

³⁰Chule hichun thingpeh get asemin, chule akibuto naho chu dangka-a kisem akisuhto naho somlegup ahi, thingpeh khat khat noija chun akibutona ko ni ni aumin ahi.

³¹Chule aman thinggi thingpeh in banggol ho asemin; houbuh pang lang khatna din thingpeh nga,

³²Chule adang thingpeh banggol nga chu houbuh alangkhat nading ahin, chukit le adang thing banggol nga chu houbuh lhumlang sanga ding ahi.

³³Chule aman akima che banggol jong abollin, hichun thingpeh jouse chu akima avut vangin among geijin aumin ahi.

³⁴Chule thingpeh ho chu sanatwi jin aloijin, chule banggol jouse matchahna din sana chaokol akisemin, chule banggol ho chu sanatwi jin aloijin ahi.

³⁵Chule aman ponjal hochu pondum, ponsandup, ponsanthip, chule tupat ponnemin asemin, thilbol kidang tah-in Cherubim limin ajemin ahi.

³⁶Chule hichea chun aman thinggi thingin khom li asemin, hicheho chu sana twijin aloijin; akoika ho chu sana-a kisem ahin, chule aman dangka-in akibutona ko li akoipeh-in ahi.

³⁷Chule aman houbuh kotna din pondal adum, asandup, asanthip chule tupat ponnema kisem phatah-a kikhui akhaijin ahi.

³⁸Chule khom nga ho-a chun koika aumcheh-in, chule aman alupal jouse le agolho jouse sana twijun aloi jolin ahi. Ahivangin akibutona ko nga ho vang chu sum-enga kisem ahi.