Read Thado Chin Potdohbu 37 Bible Online

Potdohbu 37 - Thado Chin bible

Potdohbu 37

¹Chule Belzalel'in thinggi thingin thingkhong chu asemin; adung tongni le akeh avai tong khatle akeh, chule atun tong khatle akeh ahi.

²Chule aman asung le apose chu sana thengselin aloijin; chujongle agei kimvel chu sana lallukhuh limin ajemin ahi.

³Chule aman sana chaokol li akoijin, amaho chu aning li-a koiding ahi. Chaokol ni chu alangkhat na chule adang chaokol ni chu khatna akoijin ahi.

⁴Chuin aman thinggi thingin mol lhon asemin, chule sana twijin aloijin ahi.

⁵Chuin aman thingkhong chu aputna dingin thingkhong panga agollutnin ahi.

⁶Chuin aman sana thenga kisem hepi touna chu asemin; chule adung chu tong ni le akeh chule avai tong khat le akeh ahi.

⁷Chuin aman sana hal khatna kona kikheng Cherub ni hepi touna mong teni-a chun asemin ahi.

⁸Cherub khat chu among langkhatna, chule Cherub khat chu alang khat mongah hepi touna mong teni-a chun Cherubim asemin ahi.

⁹Chule Cherubim teni chun alha sangtah-in ajal lhonnin, chule alha teni chun hepi touna chu akhukhum lhonnin, amani akimaingat to lhonnin, hepi touna lamchu anga lhonnin ahi.

¹⁰Chule aman thinggi thingin dokhang asemin, adung tong ni ahin, avai tongkhat, atun tong khat le akeh ahi.

¹¹Chuin aman hichu sana thengin aloijin, chujongle avelchu sana lallukhuh limin ajemin ahi.

¹²Chujongleh hiche chunga chun khutpheng tebep akol kimvel asemin, chule agei kimvel chu sana lallukhuh limin ajemin ahi.

¹³Chule aman hiho ding chun sana thih chaokol li alhan, akeng liho umna aning li-a chun abupeh in ahi.

¹⁴Akimvela chun Dokhang putna mol lhon thilna ding chaokol ho chu aumin ahi.

¹⁵Chuin aman dokhang putna dingin thinggi thingin mol lhon asemin, hiche chu sana twijin aloijin ahi.

¹⁶Chule aman dokhang chunga kongle bel hochu asemin, akongho, asumkheho, asum lhengho, asinho abona sana thenga kisem ahi.

¹⁷Chule aman sana theng thaomei khom asemin, atopal khoilu thaomei khom chu asemin, alhongpi le abahho, alheng ho, abohdoh ho chule apah ho chu kibang cheh ahiuve.

¹⁸Chule abah gup chu asih-a konin ajamdoh-in, thaomei khom apang langkhat chun abah thum aneijin, chujongle apang lang khat chun abah thum aneijin ahi.

¹⁹Alang khatna chun abo khat le apah khattoh almond limin khonthum aumin, chule aleng langkhatna abo khat le apah khattoh almond jih bangin alheng thum aumin, hitichun alhung lhonin, thaomei khom abah gup ajamdoh-in ahi.

²⁰Chule thaomei khoma chun almond limin alheng lile abo chule apah ho aumin ahi.

²¹Chule amasa abah ni noija chun aboh khatma aumin, chule abanna ni noija aboh khatma aumin, chule athumna abah ni noima-a chun aboh khat ma aumkitnin, hicheho hi abah gup jamdoh dungjui ahi.

²²Abo hole abahho chu tikhat ahiuvin, hicheho jouse chu sana thenga kikheng ngen ahi.

²³Chule aman thaomei sagi, achena manchah ho, meivah koina kongho jouse sana thengin asemin ahi.

²⁴Hiche hole kong le bel ho jouse semna dingchun sana thengsel talent khat amangin ahi.

²⁵Chule aman thinggi thingin gimnamtui halna maicham asemin adung tong khat, avai tong khat ahin aningli kibangcheh tong ni ahin akiho jong akibangin ahi.

²⁶Chuin aman achung teni le akimvel ki hochu sanan aloijin; chule akimvel chu lallukhuh limin ajemin ahi.

²⁷Chuin aman aputna mol lhon thilna dingin apangteni chunga aning teni-a lallukhuh noija chun sana chaokol ni asemin ahi.

²⁸Chule aman amol lhon jongchu thinggi thingin asemin, chule sana twijin aloijin ahi.

²⁹Chule aman gimnamtui thengsel jong halnam dingin asemin, thaosempa thilsem bangtah-in asemdohtan ahi.