Read Thado Chin Potdohbu 38 Bible Online

Potdohbu 38 - Thado Chin bible

Potdohbu 38

¹Chule aman thinggi thingin govam thiltona maicham chu asemin, adung tong nga, avai tong nga atun tong thum ahi.

²Chule aning li-a aki asemin, akiho chu akibangin, achung sum-eng in aloijin ahi.

³Chule aman maicham kongho, abelho, akheho, vutlonaho, meitina belho, kong dang jouse sum-eng in asemin ahi.

⁴Chuin aman maicham lailung tah-a asandan vetna noitah-a chun sum-enga kisem thihvang khat maicham ding chun asemin ahi.

⁵Chuin aman mol lhonho thilnading sum-eng thihvang mongli-a chun chaokol li asemin ahi.

⁶Chule aman mol lhonho chu thinggi thingin asemin, sum-eng in alutnin ahi.

⁷Chule aman thingpeh aputna din maicham sih-a chaokol ho-a chun agolho chu athilin alaihomin asemin ahi.

⁸Chule aman houbuh maija mipi ahung kikhop tengleh numei ho dingin twikholna kong le akengho chu sum-eng val leh phatvetnin asemin ahi.

⁹Chule aman lhang lama chun ahongsung asemin, hiche tupat ponnem tong jakhat-in hong chu akai kullin ahi.

¹⁰Akhomho chu somni, akibutona koho jong somni asemin chule akhomho akoikahou le agolho chu sum-enga kisem ahi.

¹¹Sahlang sanga kikhailha ding chun tupat ponnem tong jakhat-in akisemuvin, akhom jong somni chule sum-enga kisem akibuto naho jong somni ahicheh in, chule akhomho akoikaho le agolho dangka-a kisem ahi.

¹²Chule lhumlang sanga akikhai ponchu tong somnga ahin, akhomle akibutona koho chu som cheh ahi, akhomho akoikaho le agolho chu dangka-a kisem ahi.

¹³Chule solama chu tong somnga ahi.

¹⁴Akotpi panga kikhai ponho chu tong somnga ahin, akhom thum ahin chule akibutona kothum ahi.

¹⁵Chule ahongsung mun langkhat kotna ponjal chu tong somlenga akikhaijin chule akibutona ko-hole khomho chu thum thum ahi.

¹⁶Ahongsung kimvella kikhai pon jouse chu tupat kilhuh pona kisem cheh ahi.

¹⁷Chule akhom kibutonaho jouse chu sum-eng in asemin, sutkhom bille agolho jouse dangkan asemin, amuhhal jouse chu dangkan aloijin ahi. Chule ahongsung sutkhom ho jouse chu dangkan akitomin ahi.

¹⁸Chule ahongsung kotpi-a kikhai pondal hochu akikhontho ahin, adum, asandup, asanthip chule tupat kilhuh pon ahin; chule adung tong somni, availam le asan tong nga ahin, hiho chu ahongsung mun'a pon kikhai ho toh kitoh ahi.

¹⁹Chule akhomho chu li ahin, asunga kisem butona koho chu li, akoika chu dangka-a kisem ahin, chule achungho jouse le agolho chu dangka-a kilonkhum ahi.

²⁰Chule houbuh kilnaho jouse le ahongsung kimvel kikilna jouse chu sum-enga kisem ahi.

²¹Hiche hi houbuh thudol chu ahi, hettohsahna houbuh ngei jong chu Mosi thupeh dungjuija Aaron thempupa chapa Ithamar khutna chu Levi ho kinbolna dinga kisema ahi.

²²Chule Pakaiyin Mosi koma athupeh jouse chu Juda phunga um, Hur chapa Uri chapa Bezalel'in abolsoh keijin ahi.

²³Chule aman akilhonpi chu Dan phunga Ahisamach chapa Aholiab, song geithem natong khutthem chule pondum, ponsandup, ponsanthip chule tupat ponnem hoitah jempahthei ahi.

²⁴Munthenga natohna-a dinga kisulut sana jouse, thilto sanaho geijin, munthenga kimang shekel dungjuijin, abonin talent somni le ko leh shekel jasagi le somthum ahi.

²⁵ Chule mipi kikhom simsaho lah-a kisundoh dangka ho jouse chu talent jakhat ahin, chule munthenga ding chu shekel sangkhat le jasagi le somsagi le nga ahi.

²⁶ Munthenga shekel kitena dungjui chun mikhat dingin bekah khat hichu shekel keh ahi. Koi hijongle kum somni-a pat chunglama kisim ho chu khat khatnin abonun mi sangjagup le sangthum le janga le somnga ahiuvin ahi.

²⁷Ponjal butona koho le muntheng butona koho sunga chun dangka talent jakhat akileh lutnin, butonako khat khat dinga talent khat ahijehchun butonako jakhatna chun talent jakhat ahi.

²⁸Chule akhomho, koikaho, alupal chule apehkhat akikhukhum asemin, hiho-a chun shekel sangkhat le jasagi le somsagi le nga alutnin ahi.

²⁹Chule sum-eng kitohdoh ho chu talent somsagi le shekel sangni le jali ahi.

³⁰Chule hikoma chun mipi houkhom ho houbuh mun nachun butona koho le sum-eng maicham, sum-eng thihvang chule maicham kong dangho,

³¹Chule ahongsung kimvella akibutonako, ahongsung kotpi-a koho, chule houbuh kihena akilho chule hongsung avel pumpi-a akihena thihkil hochu asemin ahi.