Read Thado Chin Potdohbu 39 Bible Online

Potdohbu 39 - Thado Chin bible

Potdohbu 39

¹Chule Pakaiyin Mosi athupeh dungjuijin, Aaron din vontheng ho asemun, chule munthenga natohna din, kinbolna pon adum, asandup, chule asanthip min asemin ahi.

²Chule aman sana adum, asandup, asanthip chule tupat ponnemin boitong sangkhol ho asemin ahi.

³Chuin amahon pondum, ponsandup, ponsanthip chule tupat ponnem khutthem tah-a kikhongho chunga kaidin sana chu pasetnin akhengun, ajangin alheh-un ahi.

⁴Amahon hiche ding chun lengkou tomho asemun, akimatsah un, aguiteni chu akilmatnun ahi.

⁵Chule boitong sangkhol chunga konggah kidangtah chu Pakaiyin Mosi athupeh dungjuija kisem pon adum, asandup, asanthip, tupat kilhuh pon kisem chuto thakhat ahi.

⁶Israel chate minho jouse chu mutheitah in sana jemkoa Mohor namna bangin songgel chunga anamin ahi.

⁷Chule Pakaiyin Mosi athupeh bangin, Israel chate geldoh jingna song dingin boitong sangkhol lengkouva chun abeh-in ahi.

⁸Chule aman boitong sangkhol ompho jong chu sana-in pondum, ponsandup, ponsanthip, chule tupat kilhuh ponnem bang chun khutthem tah-in ompho chu asemin ahi.

⁹Hiche chu aning li ahin, Ompho chu akithop ahin adung khap khat chule avai khap khat ahi.

¹⁰Chule amahon song gol li-in akoijun; golphei masa chu; songsan, song-eng, chule song santhip ahin: hiche hi gol masa ahi.

¹¹Chule golphei nina chu; song engsel, song dumjet, chule song mantam ahi.

¹²Chule golphei thumna chu; song sandang, song vom, chule song sandup ahi.

¹³Chule golphei alina chu; song engdum, khisonggel, chule khi song pol ahi. Hicheho hi abonchan sana khaoguija akanbeh sohkeijun ahi.

¹⁴Chule songho chu Israel chate dungjuijin, aminu somleni dungjuijin mohor'a amin kitat bangin amitakip amin cheh-in phung somleni dungjuijin aumin ahi.

¹⁵Chule amahon sana-a kisem pahvui bangin ompho mongteni-a chun sana chaokol theng asemun ahi.

¹⁶Chule amahon sana jemko ni le thih chaokol ni asemin, chule ompho mong teni-a chun thih chaokol ni chu abut touvin ahi.

¹⁷Chule amahon ompho mong teni geija sana pahvui banga kisem sana chaokol akoijun ahi.

¹⁸Chule thih chaokol mong teni-a jemko teni-a chun pahvui ahenbeh-un, chule boitong sangkhol lengkou tom chunga amalama chun akoijun ahi.

¹⁹Chule amahon boitong sangkhol sungnung langa agei chunga um ompho mongteni chunga chun sana chaokol ni asemun akoijun ahi.

²⁰Chule amahon sana in chaokol ni asemuvin, hichu boitong sangkhol anoilanga chun abutnun ahi. Hichu amai langa mutheija kikhui boitong sangkhol konggah kijemhoi chunga akoijun ahi.

²¹Chule amahon boitong sangkhol chunga chun thih chaokol kil aumin, thih chaokol maman ompho-a chun akilbeh un; hiche boitong sangkhol chunga konggah phatah ahi. Hiche hi Pakaiyin Mosi athupeh dungjuija boitong sangkhola kona chu ompho chu kikangdoh louding ahi.

²²Chule aman adumngen na kikhong boitong sangkhol akon sangkhol len asemin ahi.

²³Chule sangkhol len laija chun alai khat aumin, akikhen louna dingin sangkhol ngong hom bangin ahom kimvela chun akanchahna aum me.

²⁴Chule amahon sangkhol len mongchep chunga chun, kolbuthei limin pondum, ponsandup, ponsanthip, chule tupat kilhuh ponnemin asemun ahi.

²⁵Chule amahon sanatheng changengho asemun, sangkhol len mong jouse kolbuthei limho chun asemsao changeng chu akoijun ahi.

²⁶Pakaiyin Mosi athupeh dungjuija kintheng bolna din sangkhol len pamchep kimvella chun changengin kolbuthei chu kikahhalchet nin aumin ahi.

²⁷Chule amahon Aaron le achate dingin sangkhol chol tupat ponnemin khonthon asempeh un ahi.

²⁸Chule thempu delkop tupat ponnem, ponnema kisem sangkhol sungnung, chule tupat ponnema kisem lukhuh hoiho chule tupat lhuhsa ponnem thempu delchen,

²⁹Chule Pakaiyin Mosi athupeh dungjui jin tupat lhuhsa patjang le patdum, patsandup, chule patsanthipmin konggah asemun ahi.

³⁰Chule amahon sana thenga kisem lallukhuh theng chunga chun melchihna mohor chunga kisun bangin, PAKAIYA ATHENG tin asunun ahi.

³¹Chule amahon Pakaiyin Mosi athupeh dungjuijin, hichu thempu delkop chunga sangtah-a kandetna dingin patdum kipheh-in akanun ahi.

³²Hitichun houkhom na houbuh-a natohho jouse chu akijoutan; Pakaiyin Mosi athupeh bangchun Israel chaten abol taovin ahi.

³³Chule amahon houbuh pon in, amanchah le achechah naho, thingpeh banggolho, akhomho chule akibutona koho,

³⁴Chule akhuna kelngoichal vuna kidesan, akhuna satuilut vunho chule pondal kikhai,

³⁵Hettohsahna thingkhong le mol lhon ho, chule hepi touna,

³⁶Dokhang kongle belho chule vetsahna changlhah,

³⁷Khoilu thaomei khom theng, athaomeiho le thaomei ho geichu asemtoh un, chule kongle belho chule vahding thaotwi,

³⁸Chule sana maicham, le nuding thao namtui le houbuh kotna kikhaiho,

³⁹Sum-eng maicham le sum-eng tengsa, amollhon ho le abelho jouse, twidolna le akitunna akengho,

⁴⁰Hongsunga kikhaiho le khomho chule akibutonakoho chule houkhom ho houbuh kinbolna ding kongle belho jouse,

⁴¹Muntheng sunga natohna ding vonho, kintheng tohna dinga thempupa vontheng ho Aaron le achapate vonho Pathen na atohna diuva kipe hochu Mosi henga ahin choijun ahi.

⁴²Pakaiyin Mosi athupeh jouse dungjuijin Israel chaten aboldoh sohkeitaove.

⁴³Chuin Mosi'n akitongho jouse chu amun, aman, veuvin Pakai thupeh bang bangin nanghon natongun ahi tin Mosi'n amaho chu phatthei aboh tan ahi.