Read Thado Chin Potdohbu 4 Bible Online

Potdohbu 4 - Thado Chin bible

Potdohbu 4

¹Chuin Mosi'n adonbutnin ajah-a, Hijongle ven, amahon eitahsan lou dingu, kathujong angailou dingu ahi: ajehchu amahon, Nahenga Pakai akilahpoi ati dingu ahi, ati.

²Chuin Pakaiyin ahenga, Nakhutna umchu ipiham? ati. Chuin aman, Tenggol ahi, ati.

³Chuin aman, Tolla seplhan ati. Chuin aman hichu tolla aseplhan ahile gul asohtan; chuin Mosi chuche masanga konchun ajamtan ahi.

⁴Chuin Pakaiyin Mosi jah-a, Nakhut lhangin lang hichu ameijin manin; (Chuin aman akhut alhangin, amanin ahile, akhutna tenggol asoh kit tai:)

⁵Amahon apu apateu Pakai Pathen, Abraham Pathen, Isaac Pathen, chule Jacob Pathen chu nahenga ahung kilahnai ti atahsan theina dingun, ati.

⁶Chuin Pakaiyin ahenga asei kitnin, Tun nakhut chu na-opma koijin, atin ahi. Chuin aman akhut a-opma akoitan ahi: chuin hichu alahdoh phatnin, veuvin, akhutchu aphah-in buhbang bangin abangtan ahi.

⁷Hichun aman, Nakhut chu na-opma koikitnin, ati. Aman akhut chu a-opma akoikitnin ahile, a-opma akhut chu atidang bang bang ahi kit tai.

⁸Chule hung hiti ding ahi, amahon nangma natahsan lou uva, chule melchihna masajong chu angai louvule, amahon melchihna nunung joh chu atahsan dingu ahi.

⁹Chule hung hiti ding ahi, Amahon hiche melchihna ni teni jonghi atahsan lou uva, chule na thusei jong angai lou uva ahileh, nangman vadung twi nalah-a, tolgo chunga nasunlhah ding ahi. Chule nangman vadunga kona nalahdoh twi chu tolgo chunga chu thisan hungsoh ding ahi, ati.

¹⁰Chuin Mosi'n Pakai henga, Vo ka Pakai, keima tumasangin jong, chule nangman nasoh henga thu nahinseija patnin jong mi kamnal kahipoi: ahin keima thusei ngongkai le lei kipehlou kahi, ati.

¹¹Chuin Pakaiyin ama henga, Mihem kam sema koiham? Ahiloule paomo le na-ngong, chule kho muthei le mitcho sema chu koiham? Pakai keima kahi hilouham?

¹²Hijeh chun tun chen, keiman nakam kaumpi jinga, nasei ding kahil ding ahi ati.

¹³Chuin aman, Vo ka Pakai, nahenga katao ahi, nangman nasolnom dang khat solmaijin ati.

¹⁴Chuin Pakai lunghanna chu Mosi chunga akoujahtan, ahenga, Levi mi nasopipa Aaron uma hilouham? aman thu phatah-in aseitheije ti kahei. Chujongle ven, ama nangma kimupi din ahungdoh-e: aman nangma namuteng alungsung kipahding ahi.

¹⁵Chule nangman ama henga thu nasei ding, akamsunga thuho nakoipeh ding ahi: chule keiman nangma kam le ama kam kaumpi ding, chule nabol lhonding kahil ding ahi.

¹⁶Chule amachu nangma dinga mipi ho henga thuseija pangding: ama chu nangma dinga nakam khela panga, chule nangma ama dinga Pathen khela napan ding ahi.

¹⁷Chule nangman hiche tenggol hi nakhutna nakichoi ding, hichea hi melchihna ho nabolding ahi, ati.

¹⁸Chuin Mosi anupa pa Jethro henga ahung kilen, ajah-a, Nahenga katao ahi, Egypt gama kasopite henga kinungle kit dingin neisolin, hingnalai naovem gavenge, ati. Chuin Jethro'n Mosi jah-a, Lung mongin chetan, ati.

¹⁹Chuin Pakaiyin Midian gama Mosi henga, Chen, Egypt gama kilekit tan, ajehchu nangma thadinga nahol ho jouse chu athigam taove, ati.

²⁰Chuin Mosi'n a-inneipi le achapate chu apuijin, sangan chunga atousah-in, Egypt gama akiletan ahi. Chule Mosi'n Pathen tenggol chu akhutna akichoijin ahi.

²¹Chuin Pakaiyin Mosi jah-a, Ven, Egypt gama nakile teng nakhutna kakoi thil kidang ho jouse chu Pharaoh angsunga nabol ding ahi: hijongle aman miho chu asoldoh louna dinga Pharaoh lung chu katahsah ding ahi.

²²Chule nangman Pharaoh jah-a, Pakaiyin hitihin aseije, Israel chu kachapa, apeng masapen ahi.

²³ Chule keiman najah-a kasei ahi, Aman keima eijen theina dingin kachapa chu soldoh tan: chule nangman ama soldoh ding nanop louva ahile, ven, keiman nachapa katha ding, apeng masapentah chu kathading ahi, tia nasei ding ahi, ati.

²⁴Chule lampia jinlhun in'a chun ahitin ahi, Pakaiyin ama chu akimupin, thadin aholtan ahi.

²⁵Hichun Zipporah'in meituh songhem khat alan, achapa chep atanpeh-in, hichu akengbula aseplhan, Tahbeh-in nangma hi keima dinga thisanso inneipu nahi, ati.

²⁶Hitichun amachu alhadoh tan ahi. Chuin amanun, Cheptan jeh-a chu nangma keima dinga thisanso inneipu nahi ahi, ati.

²⁷Chuin Pakaiyin Aaron henga, Gamthipma Mosi kimupi din chen, ati. Chuin ama achen, Pathen molsanga chun ama akimupin, achopmin ahi.

²⁸Chuin Mosi'n Aaron henga chun asolpa Pakai thusei jouse le athupeh melchihna jouse chu aseipehtan ahi.

²⁹Chuin Mosi le Aaron achelhonin, Israel upaho jouse akhom khom lhontai.

³⁰Chuin Aaron'in Pakaiyin Mosi henga asei thu jouse chu aseijin, miho mitmun melchihna ho chu aboltan ahi:

³¹Chuin mipi chun atahsan taove. Chuin Pakaiyin Israel chate avila, athohgimnao ahinvet pehchu ajah phatnun, amaho akunun Pathen ahou taovin ahi.