Read Thado Chin Potdohbu 40 Bible Online

Potdohbu 40 - Thado Chin bible

Potdohbu 40

¹Chule Pakaiyin Mosi jah-a aseijin, hitin ati,

²Lha masapen, nikho masapen ni chule houkhom ho houbuh chu natundoh dingu ahi.

³Chule asunga chu hettohsahna thingkhong chu nakoi ding, chule thingkhong chu pondal nakhu khum ding ahi.

⁴Chule dokhang chu nahin putlut ding, achunga goltoh ding thilho chu nagoltoh ding; chule thaomei khom chu nahin pohlutna, thaomei ho chu navah ding ahi.

⁵Chule nangman hettohsahna thingkhong masanga chu gimnamtui halna sana maicham chu nakoiding; chule houbuh kotpi-a chu pondal nakhai ding ahi.

⁶Chule houkhom ho houbuh kotphung masanga chu govam thiltona maicham nakoiding ahi.

⁷Chule twikholna kong chu houkhom ho houbuh le maicham kikah-a nakoija, asunga chu twi nasunding ahi.

⁸Chule akimvela chu ahongsung nasem ding, chule hong sung kimvel kotpi-a chu pondal hochu nakhai ding ahi.

⁹Chule nangman nuding thao chu nalah-a, houbuh le asunga umho jouse nanu-a, nasuhtheng ding, chule asunga kong le belho jouse toh: chuteng atheng hiding ahi.

¹⁰Chule govam thiltona maicham le akongho jong chu thao nanu-a nasuhtheng ding: chutengle maicham thengpen hiding ahitai.

¹¹Chule nangman twikholna kong le akeng chu thao nanu-a nasuhtheng ding ahi.

¹²Chule nangman Aaron le achapate chu houkhom ho houbuh kotphunga nahinpui ding, chule amahochu twija nasil ding ahi.

¹³Chule nangman Aaron chu vontheng navonpeh ding; thempu natohna mun'a atoh theina dinga thao nanu-a, nasuhtheng ding ahi.

¹⁴Chule nangman achapate chu nahinpui ding, sangkhol chol na-ahpeh ding:

¹⁵Chule nangman apao nabol banga amahon thempu natohna munthenga na atoh theina dinguva, amaho jong thao nanu ding ahi: hiche athao kinu-u chu akhang khanguva atonsotna thempu ahi nadingu ahitai, ati.

¹⁶Hitichun Pakaiyin athupeh bangchun Mosi'n atongsoh keijin, chutobang chun aboltan ahi.

¹⁷Chuin ahitin ahi, akum nina lhamasa penna nikho masapen nin houbuh chu akitungdoh tan ahi.

¹⁸Chule Mosi'n houbuh chu atungdoh-in, akibutona koho akanchah-in, athingpehho, abanggol ho, chule akhomho chu atundoh-in ahi.

¹⁹Chule aman houbuh chunga chun ponjal chu ajalin, chule ponjal chu achungvuma akhun, Pakaiyin Mosi koma athupeh bang chun aboltanin ahi.

²⁰Chuin aman hettohsahna chu alan, thingkhong sunga akhumin, amol lhonho chu thingkhonga abutona ding kisem chaokol sunga chun ahenglutnin, chule hepi touna chu thingkhong chunga chun akoijin ahi.

²¹Chule aman thingkhong chu houbuh sunga ahin polutnin, chule akhuna pondal chu akhaijin, hettohsahna thingkhong chu akhun; Pakaiyin Mosi athupeh bangchun aboltan ahi.

²²Chule houkhom ho ponbuh in sung, houbuh sahlam sang, pondal polama chun dokhang chu akoijin ahi.

²³Chuin aman Pakaiyin Mosi henga athupeh dungjuijin, Pakai angsunga chun changlhah chu agoltan ahi.

²⁴Chuin aman houkhom ho ponbuh lhanglam sang, dokhang maijona chun thaomei khom chu akoitan ahi.

²⁵Chuin Pakaiyin Mosi henga athupeh bangin aman thaomei chu Pakai masanga chun avahtan ahi.

²⁶Chule aman houkhom ho pon in sunga pondal masanga chun sana maicham chu akoitan ahi.

²⁷Pakaiyin Mosi henga athupeh dungjujin aman gimnamtui chu ahaltan ahi.

²⁸Chule aman houbuh kot maija chun pondal chu akhaitan ahi.

²⁹Chule aman houkhom ho houbuh kot koma chun govam thiltona maicham chu akoijin, chule hia chun Pakaiyin Mosi athupeh dungjuijin aman govam thilto le anneh thilto atohtan ahi.

³⁰Chule aman kisuhthengna ding twikholna chu mipi houkhom ho pon-in le maicham kikah-a chun akoijin, kisil thengna din hia chun twi akoijin ahi.

³¹Chule Mosi, Aaron, chule achapate chun hichea chun akhut akeng akisilun ahi.

³²Amaho houkhom ho pon-in sunga alut tengu, chule maicham anai tengule, Pakaiyin Mosi athupeh dungjuijin akisil jiuvin ahi.

³³Chuin aman houbuh le maicham vela chun ahongsung asemin, kotpi chungjola chun pondal akhaitai. Hitichun Mosi'n anatoh ajoutan ahi.

³⁴ Hichun houkhom ho pon-in chu meilom'in ahinkhun, Pakai loupina chun houbuh chu adiptan ahi.

³⁵Chuin Mosi chu houkhom ho pon in'a chun alut thei tapon ahi; ajehchu meilom chu aumdentan, Pakai loupina chun houbuh chu adiptan ahi.

³⁶Houbuh chunga kona meilom chu akilahdoh phatnin, Israel chate chun akholjina ajomtaovin ahi.

³⁷Amavang meilom chu akitoldoh louva ahile, akitoldoh kahsen amaho akholjinji pouvin ahi.

³⁸Ajehchu Israel insung pumpi mitmun akholjina sung seuvin Houbuh chunga chun sunle Pakai meilom chu aumjin, chule jan le meikongin aumjin ahi.