Read Thado Chin Potdohbu 5 Bible Online

Potdohbu 5 - Thado Chin bible

Potdohbu 5

¹Chuche jouchun Mosi le Aaron alut lhonin, Pharaoh henga, Israel Pakai Pathen'in hitin aseije, gamthipma keima dinga Kut aboltheina diuvin kamite solin ati, tin asei lhonin ahi.

²Ahinla Pharaoh'in, Pakai chu koi hija, keiman athu kangaija Israelte kasoldoh ding ham? Keiman Pakai chu kahepon, Israelte jong kasoldoh louding ahi, ati.

³Hichun amanin, Hebrew mite Pathen'in eikimupi lhon ahi. Nahenga kataolhon ahi, Pakai ka Pathen'u henga ganlhaina gabol dingin nithum lampia neisolun: achutiloule aman ichunguva gamna hise ahiloule chemjam achuhsah ding ahi, atilhone.

⁴Chuin Egypt lengpan amani henga, Nangni Mosi le Aaron'in ipidinga mipi hohi anatoh-u nangahsah lhonham? napohgih hou gakipoh thim thimun, ati.

⁵Chuin Pharaoh'in, Veuvin, hiche gam mihohi tun tamtah ahiuvin, nangnin amaho chu apohgih houva konin nakicholdo sah lhontan ahi, ati.

⁶Chuin chuche nile le chun Pharaoh'in tohvai poho le alamkai ho athupeh-in, ajah uva,

⁷Nanghon masanga banga chu miho chu cheh aden nadingu changpol napehkit lou dingu ahitai: amaho cheohen lang amaho ding cheh pol gakihol khomu hen.

⁸Chule tumasanga acheh denjiu jatjat chu nadensah jing dingu: hichea kona chu nalhomsah loudiu ahi: ajehchu amaho thaseuva ahi; hijeh-a, Ka-Pathen'u henga ganlhaina gabol dingin neisolun tia pengu ahi.

⁹Hahsa tah-a atoh diuvin chuche miho chunga chun natoh hahsacheh koibe peh-un; amahon thumanlou ngaisah daohen, ati.

¹⁰Chuin mipi tohvai poho le toh lamkai chu achedoh-un, mipi ho henga chun, Pharaoh'in hitihin aseije, Keiman nangho changpol kapehlou dingu ahitai.

¹¹Nangho cheovin lang namu nathei theijuva pol gakiholun; hijongle nanatoh-u chu kilhomsah deh louding ahi, agatiuve.

¹²Chutichun mipi chu changpol khela manding changkung gakhom khom dingin Egypt gam pumpi-a akithecheh taovin ahi.

¹³Chuin tohlamkai ho chun amaho chu anouvin, nanitin natoh houchu changpol aumlai bang chun tong bukimun, atiuve.

¹⁴Chuin Pharaoh toh lamkaiho chun mipi ho chunga apansah Israel chate lamkaiho chu avouvin, Ipi dinga nacheh dennu natoh chu masanga banga janhi le tunia nabol bulhit lou uham? tin aphohsal taovin ahi.

¹⁵Hichun Israel chate lamkaiho chu ahungun Pharaoh henga agakapmun, Ibola nangman nasohte hi neihiti bolu hitam?

¹⁶Nasohte hi changpol la eikipe pouvin, chule amahon kahenguva, Cheh denguvin eitiuvin ahi. Chule ven, nasohte hi eivouvin, ahivangin athemmo chu namite ahiuve, atiuvin ahi.

¹⁷Ahivangin aman, Nangho thase nahiuve, nangho thase nahiuve: hijeh-a chu nanghon, Cheohitin Pakai henga ganlhaina gabolu hite natiu ahi.

¹⁸Hijeh chun tun cheovin lang na gatongun: ajehchu nangho changpol kipelou ding nahiuve, hijongle nacheh dendiu jat chu nabulhit dingu ahi, ati.

¹⁹Nanghon niseh-a nanatoh naova na cheh dendiujat chu nalhomsah loudiu ahi tia akiseipeh phatnu chun, Israel chate lamkaihon achunguva thilphalou chua ahitai ti amudoh taovin ahi.

²⁰Chuin amaho Pharaoh koma kona ahungpot doh-u toh kilhonin, lampia anading Mosi le Aaron chu akimutopi taovin ahi.

²¹Chuin amahon amani henga, Pakaiyin nave lhonhen lang nachung thu lhon tanhen; ajehchu nangnin keiho thana dinga akhutnuva chemjam koina dingin Pharaoh mitmu le asohte mitmun thet umtah in neisem taovin ahi, atiuve.

²²Chuin Mosi Pakai henga akinungle kitnin, Pakai, ipi dinga hiche mite chungahi phalou tah-a na natoh ham? Ipi dinga neisol ham?

²³Ajehchu Pharaoh henga namina thusei dinga kahunga pat hin, aman hiche mite chunga thilse abol jingin; chule nangman jong namite nahuhdoh hihhelin ahi, ati.