Read Thado Chin Potdohbu 6 Bible Online

Potdohbu 6 - Thado Chin bible

Potdohbu 6

¹Chujouvin Pakaiyin Mosi henga, Keiman Pharaoh chunga ipi kabol ding tu-a hi nangman namu ding ahi. Ajehchu khut thahat hin amaho chu asol ding, chule khut thahat hin amaho chu agamsunga kona adeldoh tho sah ding ahi, ati.

² Chuin Pathen'in Mosi henga thu aseijin, ajah-a hitin aseije, keima Pakai chu kahi.

³Chule keima Abraham, Isaac, chule Jacob hengah Pathen hat chungnung minin kana kilah-in; ahinla amahon kamin JEHOVAH hin eina hepouvin ahi.

⁴Chule gamdangmi ahinao akholjina gamu Canaan gam chu amaho pehdingin keiman amahotoh kakitepna kaphut doh-in ahi.

⁵Chule Egypt miten sohchanga ahennaova Israel chate akhoisatnao jong chu kajan; chule kakitepna chu kageldoh tan ahi.

⁶Hijeh chun Israel chate henga hitin seijin, Keima Pakai kahin, chule Egypt mite pohgih ho noija kona kapui diu, apohgih houva kona kalhadoh uva, chule keiman ban jahdoh le thutanna nasatah puma kahuhdoh ding nahiuve.

⁷Chule nangho kamite hidinga kalah uva, chule keima na-Pathen'u kahi ding: chule Egypt mite pohgih ho-a kona napuidoh uva Pakai na-Pathen'u kahichu nahetdingu ahi.

⁸Abraham, Isaac, chule Jacob henga pehdinga kana kihahselna gamachu kapuilut ding nahiuvin; chule hichu nagoulo diuva kapeh ding nahiuve: keima Pakai chu kahi, tin, ati.

⁹Chuin Mosi'n Israel chate hengah thu aseijin; ahivangin alhagaovu ahesoh jehle asoh channu akhoh behseh jehchun Mosi thusei chu angaipeh pouvin ahi.

¹⁰Chuin Pakaiyin Mosi henga aseijin, hitin ati.

¹¹Chenlang Egypt lengpa Pharaoh chun agama kona Israel chate asoldoh nadingin gaseijin, ati.

¹²Chuin Mosi'n Pakai henga, Vetan, Israel chaten bon kathu angailou uva ahile; Pharaoh'in keima kam chepkitanlou thuhi iti angaiding ham? ati.

¹³Chuin Pakaiyin Mosi le Aaron henga thu aseijin, Egypt gama kona Israel chate puidoh nadingin, Israel chate le Egypt lengpa Pharaoh'a henga seiding thu apen ahi.

¹⁴Hichenghi apu apateo insung aluchangho chu ahiuve; Israel'a kona apeng masapen Reuben chapate chu Hanoch, Pallu, Hezron le Carmi ahiuve. Hichenghi Reuben insung mite ahiuve.

¹⁵Chule Simeon chapate chu Jemuel, Jamin, Ohad, Jachin le Zoher, chule Canaan numeinu chapa Shaul ahiuve. Hichenghi Simeon insung mite ahiuve.

¹⁶ Chule hicheng hi amaho khanggui dungjuija Levi chapate min chu ahi; Gershon, Kohath, chule Merari ahiuve. Chule Levi damsung kumkho chu kum jakhat le somthum le sagi ahi.

¹⁷Gershon chapate chu, a-insungu dungjuijin Libni le Shimei ahilhone.

¹⁸Chule Kohath chapate chu, Amran, Izhar, Hebron, chule Uzziel ahiuve. Chule Kohath damsung kumkho chu kum jakhat le somthum le thum ahi.

¹⁹Chule Merari chapate chu, Mahli le Mushi ahilhone. Hichenghi akhangguiju dungjuija Levi insung mite ahiuve.

²⁰Chuin Amram'in apa sopinu chanu Jochebed chu aji dingin akipuijin; amanun Aaron le Mosi ahinpeh-in ahi. Chule Amram damsung kumho chu kum jakhat le somthum le sagi ahi.

²¹Chule Izhar chapate chu, Korah, Napheg, chule Zichri ahiuve.

²²Chule Uzziel chapate chu Mishael, Elzaphan, chule Zithri ahiuve.

²³Chuin Aaron'in Amminadab chanu Nahshon sopinu Elisheba chu aji dingin akipuijin; chule amanun Nadab, Abihu, Eleazar, chule Ithamar ahinpeh-in ahi.

²⁴Chule Korah chapate chu, Assir, Elkanah, chule Abiasaph ahiuve. Hichenghi Korah insung mite ahiuve.

²⁵Chuin Aaron chapa Eleazar chun Putiel chanute lah-a khat aji dingin akipuijin; chule amanun Phinehas ahinpeh-in ahi. Hichenghi a-insungu dungjui cheh-a Levi ho pate bulpiho ahiuve.

²⁶Hiche teni hi Pakaiyin, Egypt gama konin Israel chate chu galsat miho dungjuijin puidoh lhonin tia asei na Aaron le Mosi chu ahillhone.

²⁷Hiche teni hi ahi Egypt gama kona Israel chate puidohna dinga Egypt lengpa Pharaoh henga thusei teni chu: Hiche teni hi chuche Mosi le Aaron chu ahilhone.

²⁸Chuin Egypt gama Pakaiyin Mosi henga thu aseini chun ahitin ahi,

²⁹Pakaiyin Mosi henga thu aseijin, Keima Pakai chu kahi: keiman nahenga kasei jouse chu Egypt lengpa Pharaoh henga seijin, ati.

³⁰Chuin Mosi'n Pakai angsunga chun, Vetan, keima kam cheptanlou kahin, chule Pharaoh'in iti kasei angaiding ham, ati.