Read Thado Chin Potdohbu 7 Bible Online

Potdohbu 7 - Thado Chin bible

Potdohbu 7

¹Chuin Pakaiyin Mosi henga, Ven, keiman nangma Pharaoh henga dingin pathen'in kasemtai; chule nasopipa chu nangma themgao hiding ahi.

²Nangman kathupeh jouse chu aboncha naseidoh ding; chule nasopipa Aaron'in agamma kona Israel chate chu asoldohna dinga Pharaoh henga aseiding ahi

³ Chule keiman Pharaoh lungchang kasuhtah ding, Egypt gamsunga chu kamelchih naho le kathil kidangho kapunsah ding ahi.

⁴Hijongleh Egypt gamsunga kakhut kalhah nading le, kagalsat miho le kami Israel chate chu thutanna nasatah-a Egypt gamsunga kona kapuidoh nadinga Pharaoh'in nasei angaideh louding ahi.

⁵Chule keiman Egypt chunga kakhut kajah-a, amaho lah-a kona Israel chate kapuidoh teng, keima Pakai kahi chu Egypt miten ahet dingu ahi, ati.

⁶Chutichun Mosi le Aaron'in Pakaiyin athupeh bang bangin abol lhonin, chuti chun abol lhon tai.

⁷Chule amanin Pharaoh henga thu aseilhon chun Mosi kum somget alhingtan, chule Aaron chu kum somget le kum thum alhingtan ahi.

⁸Chuin Pakaiyin Mosi le Aaron henga thu aseijin, hitin ati,

⁹Pharaoh'in najah lhona, Nangnin thilkidang vetsah lhonin atiteng; nangman Aaron hengah, Natenggol chu lanlang Pharaoh angsunga seplhan, natiding ahi. Chuteng hichu gul hungsoh ding ahi, ati.

¹⁰Chuin Mosi le Aaron Pharaoh henga alutlhonin, Pakai thupeh bangchun abol lhontan ahi. Chuin Aaron'in atenggol chu Pharaoh masang le asohte masanga aseplhan ahile, hichu gul asohtan ahi.

¹¹Chuphatnin Pharaoh'in jong miching ho le doi themho akoukhom tai. Tun Egypt mitpheldoi themho, amaho jong chun adoijuva konin chutobang bang chun aboltheijun ahi.

¹²Ajehchu amaho amitakipmin atenggol cheh-u chu aseplhaovin ahile hicheho chu gul asohtan ahi: ahivangin Aaron tenggol chun atenggol hou chu avallhum gamtan ahi.

¹³Chuin Pharaoh lungsung chu Pakaiyin aseibang chun amani thusei angailouna dingin, Aman atahsah tan ahi.

¹⁴Chuin Pakaiyin Mosi henga, Pharaoh lungsung akisuh tah jeh-a aman miho chu achesah nomlou ahi.

¹⁵Nangma jingkah le Pharaoh henga gachen: ven, ama twikhuh lama chun achei; chule nangma amato kimuto dinga vadung panga chu nanading ding; chule gul naso sahna tenggol chu nakhutna nakichoi ding ahi.

¹⁶Chutengle nangman ama henga, Hebrew mite Pakai Pathen'in nangma henga, Amahon keima gamthipma eijen theina diuvin kamite chesah-in, tia seidinga eihinsol ahi: ahinla ven, tugeihin hichu nangman nangaipoi.

¹⁷ Pakaiyin hitin aseije, Hichea konahi Pakai kahi chu neihet ding ahi. Ven, kakhut na tenggola hi vadunga twi chu kajepding ahin, chule hichu thisan sohding ahi.

¹⁸Chule vadunga um nga hochu thiding, vadung chu uiding ahin; chule Egypt miten vadunga twi chu donding akidah diu ahi, ati.

¹⁹Chuin Pakaiyin Mosi henga, Aaron jah-a, Natenggol chu lanlang Egypt twiho chunga, aluidung hou chunga, vadung ho chunga, atuikul hou chunga, chule atuikul hou jouse chunga aboncha thisan asotheina ding le Egypt gam pumpi-a thing kongho le song kongho-a jong thisan aumna dingin nakhut jahdoh-in tin seijin, ati.

²⁰Chuin Pakai thupeh bang chun Mosi le Aaron'in abol lhontan ahi; chuin aman atenggol chu alamin, Pharaoh mitmu le asohte mitmun vadunga um twi chu ajeptan ahi; chuin vadunga um twi jouse chu thisan asohtai.

²¹Chuin vadunga um nga ho chu athin; vadung chu a-uitan, Egypt miten vadung twi chu adonthei tapouvin; chule Egypt gamsung pumpi-a chun thisan aumtan ahi.

²²Chuin Egypt mitpheldoi themho chun adoi uva konin chutobangma chun abolun ahi. Chule Pharaoh lung chu tahsah-in aumin, Pakaiyin aseibang chun aman amani thusei angai dehpon ahi.

²³Chuin Pharaoh chu akiheijin a-insunga aluttan, hiche thuhi alungsunga angaito pon ahi.

²⁴Chuin Egypt miten donding twi holna-in vadung vel chu alaitauvin ahi; ajehchu amahon vadung twi chu adonthei louvu ahitai.

²⁵Chule Pakaiyin vadung chu avoh-a pat nisagi alhingtan ahi.